26 no Titema - Tetephano peata

26 no TITEMA

TETEPHANO PEATA
e maratiri matamua

Oro’a

TAIORAA MATAMUA

« Inaha, te ite atu ra vau i te ra’i, ua vevehia »

A taio tatou i te Ohipa a te mau Apotoro 6, 8-10 ; 7, 54-60

I taua mau mahana ra, ua ï Setephano i te karatia ʻe te mana, ʻe e rave rahi te ohipa maere ʻe te tapao rarahi täna e rave i roto i te nunaa. Ua ti’a a’era rä te taata no roto mai i te sunago i parauhia ra e, no te feia i faatiamahia ʻe no to Kurene ʻe to Alekanederia ʻe no te mau taata i Kilikia ʻe i Asia, ʻe ua märö maira ʻe o Setephano. ʻE, ore atura i ti’a ia ratou ia patoi mai i te paari ʻe te Varua e aratai i täna parau. I to ratou faarooraa i taua parau ra, riri roa atura ratou, ʻe ua aati atura to ratou po’a iana. Area oia ra, ua ï a’era ïa i te Varua-Maitai ; ua tiatonu atura oia i te ra’i, ʻe ua ite atura i te hanahana o te Atua ʻe ia Iesu i te ti’araa i te rima atau o te Atua. Ua na ö a’era oia : « Inaha, te ite atu ra vau i te ra’i, ua vevehia, ʻe te Tamaiti a te taata i te ti’araa i te rima atau o te Atua. » Porutu maira to ratou reo, opanipani ihora i to ratou taria, horo pupara noa maira ratou atoa i nia iana ra. Aratö atura ratou iana i rapae i te oire, ʻe ua pëhi atura iana i te ofai. Ua tuu atura te mau ite i to ratou ahu i te pae avae o te hoe taata api, o Saulo te i’oa. A pëhi noa ai ratou iana i te ofai, te pure ra Setephano, i te na öraa : « E te Fatu e, a faarii mai oe i ta’u varua. » Ua tuturi ihora oia i raro, ʻe ua tiaoro hua atura : « E te Fatu e, eiaha oe e haamairi i teie hara i nia ia ratou. » Tei te parauraa oia i taua parau ra, mairi atura töna taoto.

- O te Parau ïa a te Atua.

SALAMO 30, 3bc.4b, 6.8a.9b, 17.20cd

R/ Te tupu atu nei au i to’u varua i to rima na, e te Fatu e.

Ia riro oe ei pare etaeta na’u,
e ei pa-aua e ora’i au nei.
E no to oe ra ioa, a faatere mai ia’u,
a aratai mai ia’u !

Te tupu atu nei au i to’u varua i to rima na,
o oe hoi tei faaora mai ia’u, e te Fatu e, e te Atua parau mau e.
Ia ouaua vau i te oâoâ e ia popou vau i to oe na aroha !
Ua tuu râ oe i to’u avae i te atea è.

Ia anaana mai to mata i nia i to tavini nei,
e ia ora vau i to oe na aroha.
Ta oe e opere nei na te feia i tiaturi i ta oe paruru,
i mua i te aro o te tamarii a Adamu.

ALLELUIA

Alleluia. Alleluia.
Ia haamaitai hia te ioa o te Fatu, oia tei haere mai !                          
Ps 117, 26a.27a
Te Fatu ra, o te Atua ïa, ua hiti mai tona maramarama i nia i tatou.
Alleluia.

EVANELIA

« E ere hua hoi o outou te parau, o te Varua rä o to outou Metua »

Evanelia o Iesu-Kirito a Mataio peata 10, 17-22

I teie tau ra, ua parau atura oia Iesu i tana mau Apotoro : « E ara i te taata : e tuu hoi ratou ia outou i te mau fare haavaraa ra ʻe e papa’i mai ia outou i roto i te mau sunago. ʻE, no tö’u nei i’oa, e arataihia outou i mua i te aro o te mau tavana ʻe o te mau arii, a riro ai outou ei ite no’u i mua ia ratou ʻe i mua hoi i te mau etene ra. Ia tuuhia rä outou, eiaha outou e tapitapi e, e aha ta outou e parau atu ʻe nafea hoi outou ia parau atu, no te mea, ei taua hora ra e faaitehia mai ai ia outou te parau e au ia parau atu. E ere hua hoi o outou te parau, o te Varua rä o to outou Metua te parau i roto ai outou na. E tuu hoi te tuaana i töna teina ia pohe, ʻe te metua tane i täna tamaiti, e ti’a mai te tamarii e rave i to ratou metua ʻe e taparahi ia ratou. E riri-roa-hia hoi outou e te taata atoa no tö’u nei i’oa. O te tamau maite rä e tae noa atu i te hopea, o oia ïa te ora.

- Haapopou tatou i te Parau a te Atua.