3 no Tiurai - TOMA peata

3 no TIURAI

TOMA PEATA
e apotoro

Oro’a

TAIORAA MATAMUA
                                             « Ua patuhia outou i nia iho i te niu ’e taua niu ra o te mau apotoro »
A taio tatou i te epitore a Paulo peata i to Ephesia         2, 19-22
E au mau taeae e, i teie nei, i roto ia Iesu-Kirito, e ere atura outou i te taata ’e’ē ’e te purutia, ua riro rā outou ei huiraatira hoe ’e te feia mo’a atoa ra, ’e tei roto atoa outou i te fetii o te Atua. Ua patuhia outou i nia iho i te niu, ’e taua niu ra o te mau apotoro ïa ’e te mau peropheta, ’e te ofai tihi o te Kirito ïa. Nona te fare atoa e ati-maite-hia ai, a riro atu ai ei hiero haamo’ahia e te Fatu ra. ’E na roto i to outou atiraa iana, ua patu-atoa-hia outou, ia riro outou ei nohoraa no te Atua na roto i te Varua.

- O te Parau ïa a te Atua.

SALAMO                                      116, 1, 2
R/
E haere outou e ati noa a’e te ao nei
e poro i te Evanelia

E aore râ :  Alleluia !

A haamaitai i te Fatu, e te mau nunaa atoa e !
A faateitei iana, e te mau taata’toa e !

E mea puai tona aroha i nia ia tatou nei,
e tana ra parau-mau e tia i te vairaa e a muri noa’tu.

ALLELUIA
Alleluia. Alleluia.
E Toma e, no te mea ua ite mata mai oe ia’u i faaroo ai oe,  
Ioa 20, 29
te na ô maira te Fatu.
E ao to te feia aore i ite mata, ua faaroo rä !

Alleluia.

EVANELIA
                                         « E ta’u Fatu, e ta’u Atua e »
Evanelia o Iesu-Kirito a Ioane peata     20, 24-29
I to Iesu haereraa mai, aita te hoe o te tino ahuru ma piti ia ratou ra, o Toma ïa, o tei parauhia ra e, o Maehaa. Ua parau atura te mau pipi iana ra : « I ite a’enei matou i te Fatu. » Area oia, ua parau maira ïa : « Ia ore au ia ite i te puta auri i roto i tōna pu’e rima, ia ore au e tuu i ta’u rima i roto i tōna aoao, e ore roa ïa vau e faaroo. » ’E, mairi a’era e va’u mahana, tei roto faahou ā tana mau pipi i taua fare ra, tei reira atoa hoi o Toma. ’E, a vai-tamau-noa-hia ai te mau opani, ua haere maira Iesu, ua ti’a noa ihora i ropu, ’e ua parau maira : « Ei ia outou na te hau. » ’E, muri a’era, ua parau maira oia ia Toma : « A faatoro mai na tō rimarima i ō nei, ’e a hio mai oe i ta’u pu’e rima. A faatoro mai tō rima, ’e a tuu mai oe i roto i ta’u aoao. Eiaha to oe ei faaroo ’atā, ei faaroo papu rā. » Ua pahono atura Toma, na ō atura : « E ta’u Fatu, e ta’u Atua e. » Ua parau maira Iesu iana : « No te mea au ite mata mai oe ia’u i faaroo ai oe. E ao to te feia aore i ite mata, ua faaroo rā. »

- Haapopou tatou i te Parau a te Atua.