9 no Novema - te haamo'araahia o te Ariihiero i Laterana

9 no NOVEMA

TE HAAMO’ARAAHIA O TE ARIIHIERO I LATERANA

Oro’a

Ia tano teie oroa i te dominika, e ravehia te mau taioraa i faataahia no te dominika

TAIORAA MATAMUA

E tia ia maite hoe taioraa i roto i na taioraa e piti i raro nei :

1. « Ua ite au i te pape ora i te hîraa mai no roto mai i te hiero e te feia atoa i ti’a’ia i taua pape ra, e ora ïa »

A taio tatou i te puta a Ezekiela peropheta 47, 1-2.8-9.12

I taua mau mahana ra, ua ite i ta’u orama, e ua faahoi mai oia ia’u i te uputa o te fare ra ; e inaha, e pape i te taheraa mai no raro ae i te taahiraa o te uputa o te fare i te hitia o te râ ra : te hio ra hoi te aro o te fare i te hitia o te râ ra ; area te tahe maira te pape na te pae atau o te hiero i te pae Apatoa o te fata. E ua aratai mai oia ia’u i rapae na te èâ o te uputa i Apatoerau, e ua faahoi mai oia ia’u na te èâ i rapaeau o te uputa i rapaeau ra, na te èâ tei hio i te hitia o te râ, e inaha, e pape rahi tei tahe na te pae atau. E ua naô maira oia ia’u : E tahe teienei pape i te pueraa one i te hitia o te râ, a tahe atu ai i te vahi papu o te medebara, e haere i roto i te miti, e e haere hoi i rapae, e e haamaitai hia te mau pape. E te mau mea e ora nei e te nee, e ora ïa, ia roohia i te pape i reira ; e e rahi roa te îâ i reira, ia tae taua pape i reira ra, e e ora ïa ; e e ora’toa te mau mea’toa ia roohia i taua pape ra. E i nia iho i na hiti pape, i na pae e piti ra e tupu ai te mau raau atoa nei ai maâ ; e ore hoi tona rau e topa, e ore hoi tona maâ e mou ; e faahotu oia i te maâ api i te mau marama’toa ; no te mea i na te vahi moâ tona pape i te haereraa’tu ; e tana e hotu mai, ei maâ ïa, e tona mau raoere ei raau maî ïa. »

- O te Parau ïa a te Atua.

E aore râ :
2. « E nao outou no te Atua »

A taio tatou i te epitore matamua a Paulo peata i to Korinetia 3, 9b-11.16-17

E au mau taeae e, o outou hoi te faaapu ta te Atua e faaapu nei ’e te fare tāna e faatia ra. Mai te au i te karatia i horoahia mai e te Atua, ua haamau vau i te niu, mai te hoe tamuta aravihi ra, ’e te patu nei te tahi i nia i taua niu ra. Ia ara rā te taata tataitahi i te huru o tāna paturaa. I te niu rā, aita e taata e ti’a ia haamau i te niu ’ē atu i tei haamauhia ra, oia hoi o Iesu-Kirito. Aita anei outou i ite e : o outou te nao o te Atua ’e te parahi nei te Varua o te Atua i roto ia outou. Ia vavahi te tahi taata i te nao o te Atua, e vavahi-atoa-hia oia e te Atua ; no te mea, e mea mo’a te nao o te Atua, ’e o outou hoi taua nao ra.

- O te Parau ïa a te Atua.

SALAMO 45, 2-3, 5-6, 8-9a.10a

R/ E anavai rahi ! Na tana mau amaa e faaoâoâ i te oire o te Atua,
nana e haamo’a i te mau fare o te Teitei-Rahi ra.

O te Atua, to tatou haapuraa, to tatou puai
e to tatou hoi tauturu i pupuhia mai i roto i te ahoahoraa.
No reira, eita roa matou e mataû ia faahuru è hia te fenua,
ia arori noa ra te mau moua i rotopu i te moana.

E anavai rahi ! Na tana mau amaa e faaoâoâ i te oire o te Atua,
nana e haamo’a i te mau fare o te Teitei-Rahi ra.
Tei roto iana te Atua, e ore roa oia e arori,
e e tauturu te Atua iana i te aahiata ra.

Te ia tatou te Fatu no te mau nuu ;
e pare-paruru hoi no tatou te Atua o Iakoba !
A haere outou, a hiotutonu atu i te mau ohipa maere a te Fatu,
ua faaoti oia i te mau tamairaa e tae noa’tu i te hopea o te fenua nei.

ALLELUIA

Alleluia. Alleluia.
Ua maiti hoi au e ua haamoâ i teienei vahi, te na ô maira te Fatu,    
  2 Par 7, 16
ia vai to’u ioa i reira e a muri noa’tu.
Alleluia.

EVANELIA

« O tōna iho tino te nao tāna e parau ra »

Evanelia o Iesu-Kirito a Ioane peata 2, 13-22

Te fatata maira te Pāsa a te Ati-Iuda. Haere atura Iesu i Ierusalema. Ua ite atura oia, i roto i te hiero, i te taata e hoo ra i te puaatoro, te mamoe ’e te ’ū’ū’aira’o, ’e te feia taui moni i te parahiraa i ta ratou mau hooraa. Hamani ihora oia i te taura ei tairi, ’e ua tiahi atura oia ia ratou i rapae i te hiero ’e ta ratou mau mamoe ’e ta ratou mau puaatoro. Ua hue atura oia i te moni a te feia taui moni, faatī’opa atura i ta ratou mau iri. ’E ua parau atura oia i te feia hoo ’ū’ū’aira’o : « A hopoi ’ē atu i tena mau mea : eiaha e faariro i te fare o ta’u Metua ei fare hooraa. » Haamanao ihora tana mau pipi i tei papaihia ra : « Ua ’ā vau i te itoito i tō fare. » Ua parau maira rā te Ati-Iuda, na ō maira iana : « E aha ta oe tapao e rave ei faaiteraa mai ia matou e, e ti’a ia oe ia na reira ? » Ua pahono atura Iesu, na ō atura : « A vavahi na i teie nei nao, ’e ua mairi anae e toru mahana, ua faatia-faahou-hia e au. » Ua parau maira te Ati-Iuda : « E maha ahuru ma ono matahiti i te faatiaraa i teie nei nao, ’e ua mairi anae e toru mahana, ua oti ïa nao i te faatia-faahou-hia e oe ? » Area oia, o tōna iho tino te nao tāna e parau ra. No reira, ia tiafaahou a’era oia no roto mai i te feia pohe, haamanao ihora tana mau pipi e, ua na reira oia i te parau, ’e ua faaroo atura ratou i te papairaa mo’a ’e te parau hoi i parauhia e Iesu.

- Haapopou tatou i te Parau a te Atua.