10 no Mé - Damiano no Molokai Peata

10 no ME
Damiano no Molokai Peata
Oro’a i roto i te Epikoporaa Tefenuaenata

TAIORAA MATAMUA

« Ua riro atoa te mau ati nei ei teoteoraa na tatou »

A taio tatou i te epitore a Paulo peata i to Roma 5, 1-8
E au mau taeae e, no te mea ua faarirohia tatou ei feia parautia i te mana o te faaroo, ua hau atoa ïa tatou ’e te Atua na roto i to tatou Fatu ra ia Iesu-Kirito. Na roto atoa hoi iana e tae atu ai tatou i te karatia o te horoahia i te feia faaroo. Te parahi nei hoi tatou i roto i te karatia, ’e ua riro to tatou tiairaa i te hanahana o te Atua ei teoteoraa na tatou. E ere rā o te reira anae ra, ua riro atoa te mau ati nei ei teoteoraa na tatou. Ua ite hoi tatou e, e faatupu te ati i te faaoroma’i. ’E na te faaoroma’i e faatupu i te haapao tamau, ’e na te haapao tamau e faatupu i te tiaturi. E ore hoi te tiaturi e haavare, no te mea ua niniihia mai te here o te Atua i roto i to tatou nei mau mafatu e te Varua-Maitai, o tei horoahia mai ia tatou nei. I to tatou vai-paruparu-raa hoi i pohe ai te Kirito no te feia paieti ore ra, i te tau i faataahia e te Atua ra. E ore e roaa ohie te taata e faarii i te pohe no te hoe taata parautia. Penei a’e e itea te hoe o te faaoroma’i i te pohe no te tahi taata maitai. Teie rā te mea e ite ai tatou i te aroha o te Atua ia tatou : a vai taata hara noa ai tatou, i te tau i faataahia e te Atua, ua pohe te Kirito no tatou.

O te Parau ïa a te Atua.

SALAMO 33, 2-3, 6-7, 8-9, 20-21

R/ A tamata na, e ia ite outou
mai te aha te maitai o te Fatu.
E haamaitai â vau i te Fatu i te mau tau atoa,
ia vai tuutuu-ore â te arueraa iana i roto i to’u nei vaha ;
e arue atu to’u varua iana iho i roto i te Fatu,
ia faaroo mai te feia haehaa, e ia oâoâ !

E anaana atoa mai te taata i hio tia’tu i te Fatu ;
e aore e haama i nia i tona ra mata.
Ua pii hua’tura te hoe taata veve ra, e ua faaroo maira te Fatu,
e ua faaora oia iana i tona’toa ra mau ahoahoraa.

Ua puhapa mai te melahi a te Fatu
e ati noa’e tona feia haapao maitai atoa nona ra, e e haamatara oia ia ratou.
A tamata na, e ia ite outou mai te aha te maitai o te Fatu,
e ao to te taata i tiaturi iana ra.

E ati huru ati to te mau taata parautia,
e faaora hia râ oia i taua mau ati atoa ra ;
Na te Fatu e tiai i to ratou atoa ra mau ivi ;
e ore te hoe noa ae e ofati hia.

ALLELUIA

Alleluia. Alleluia.
O vau te tiai mamoe maitai, te na ô maira te Fatu,  
     Ioa 10, 11
e pupü te tiai mamoe maitai i töna iho ora no te mau mamoe.
Alleluia.

EVANELIA

« Ua faaite au ia outou i te hioraa, ’e o tā’u i rave iho nei ia outou, ia na reira atoa outou »

Evanelia o Iesu-Kirito a Ioane peata 13, 1-5.12-17
Hou te oroa i te Pāsa ra, ite a’era Iesu e, ua tae i tōna hora e haere ai oia mai teie atu nei ao i te Metua ra, oia i here i tōna mau taata i te ao nei, here atura oia ia ratou e tae roa atura i te hopea. ’E, i roto i te hoe amuraa māa, (ua faatupu ’ē na ïa te diabolo i te opuaraa e haavare iana i roto i te mafatu o Iuda a Simona Isakariota), ’e no te mea ua ite oia e, ua hope te mau mea atoa i te tuuhia mai i roto i tana rima e te Metua ra, i te mea atoa hoi no ō mai oia i te Metua ’e te hoi atu ra oia i te Atua ra, ti’a a’era oia i nia, iriti a’era i tōna iho mau ahu, rave ihora i te tahi ahu ’ē, ’e ua pareu maira iana i taua ahu ra. Ninii ihora oia i te pape i roto i te hoe farii, ’e ua haamata atura i te horoi i te avae o tana mau pipi ’e i te tamarō i te ahu tāna i pareu mai. ’E, oti a’era to ratou avae i te horoihia e ana, ua ahu faahou ihora oia i tōna ahu, ’e ua parahi ihora i nia i te amuraa māa, ’e ua parau atura oia ia ratou : « Ua taa anei ia outou te auraa o te ohipa tā’u i rave iho nei ia outou ? Te parau mai nei hoi outou ia’u : E te Orometua, e te Fatu, ’e ua tano ta outou parau, oia mau ā hoi au nei. Ua horoi ’unā hoi au, o vau te Orometua ’e te Fatu, i to outou avae, ia horoi atoa outou i to outou avae te tahi i te tahi e ti’a ai. Ua faaite au ia outou i te hioraa, ’e o tā’u i rave iho nei ia outou, ia na reira atoa outou. Amene, amene, te parau atu nei au ia outou : aita te tavini i hau i tōna ra fatu, aita atoa te apotoro i hau i tei tono mai iana. E ao mau to outou, ia ite outou i te reira ’e ia haapao.

- Haapopou tatou i te Parau a te Atua.