15 no Atete - Te Afai-Tino-raa-hia o Maria

15 no ATETE

TE AFAI-TINO-RAA-HIA O MARIA I TE RA’I

Oro’a hanahana

I TE PURE TUTIA NO TE PÔ NA MUA AE

TAIORAA MATAMUA

« Ua afai maira ratou i te aruna o te Atua e ua tuu i ropu i te sekene ta Davida i hohora no te reira »

A taio tatou i te puta 1 Paralipomeno 15, 3-4.15-16 ; 16, 1-2.

I taua mau mahana ra, ua haaputuputu maira oia Davida ia Iseraela paatoa ra i Ierusalema no te afai raa mai i te aruna o te Atua i tona vairaa ra, tana i faanahonaho no te reira. E na reira’toa i te mau tamarii a Aarona, e te mau Ati-Levi. Ua afai maira te mau tamarii a Levi, ma te raau amo, i nia i to ratou tapono, i te aruna o te Atua, mai ta Mose i faaue mai ra, mai te au i te parau a te Fatu. Ua parau atura Davida i te mau tavana o te Ati-Levi ia faataa ratou i te tahi pae o to ratou mau taeae ei feia himene ma te faaoto i te mau mea i faaoto hia ra, oia hoi te nabala e te kitara, e te kumebalo, e ia faaoto ratou ma te faateitei i te reo no te oâoâ. Ua afai maira ratou i te aruna o te Atua, e ua tuu i ropu i te sekene ta Davida i hohora no te reira : e ua pupu ihora ratou e te tutia taauahi e te tutia faahau i mua i te Atua. E ia oti aera te mau tutia taauahi e te mau tutia faahau i te pupu hia e Davida, ua haamaitai ihora oia i te taata i te ioa o te Fatu ra.

- O te Parau ïa a te Atua.

SALAMO 131, 7-8, 9-10, 13-14

R/ A tia i nia, e te Fatu e, i to faaearaa,
o oe, e te aruna o te puai !

A tomo tatou i roto i te vahi no tona puhaparaa,
a tahopu tatou i mua i tona taahiraa avae.
A tia i nia, e te Fatu e, i to faaearaa,
o oe, e te aruna o te puai.

Ua faaahu hia to oe mau tahua i te parautia,
e te umere nei to mau tavini i te oaoa.
No to oe tavini nei, no Davida,
eiaha e fariu è i to mata i tei faatahinu hia e oe ra.

Ua maiti hoi te Fatu ia Siona,
ua hiaai oia i te reira ei parahira nona ra :
« Te iô nei to’u faaearaa e a muri noa’tu,
te i reira to’u parahira ».

TAIORAA PITI

« Tei horoa mai te Atua i te rē no tatou na roto i to tatou Fatu o Iesu-Kirito »

A taio tatou i te epitore matamua a Paulo peata i to Korinetia 15, 54-57

E au mau taeae e, ua riro anae teie nei tino tahuti noa ei tino tahuti ore, ’e teie nei tino pohe noa ei tino pohe ore, ei reira ïa e tupu ai te parau i papaihia ra : Ua horomii-roa-hia te pohe e te rē. E te pohe e, teihea to oe rē ? E te pohe e, teihea to oe tara ? O te hara te tara o te pohe, ’e o te ture te mana o te hara. Ia haamaitaihia te Atua o tei horoa mai i te rē no tatou, na roto i to tatou Fatu o Iesu-Kirito.

- O te Parau ïa a te Atua.

ALLELUIA

Alleluia. Alleluia.
E ao to te feia e faaroo i te parau a te Atua, ’e e haapao.            
Luk 11, 28
Alleluia.

EVANELIA

« E ao to te opu i hopoi ia oe ! »

Evanelia o Iesu-Kirito a Luka peata 11, 27-28

I taua anotau ra, te parau noa ra Iesu i taua parau ra, faateitei a’era te tahi vahine i tana reo i roto i te tiaa rahi taata, na ō maira iana : « E ao to te opu i hopoi ia oe ’e to te ū ta oe i ote ra ! » Ua parau atura rā Iesu : « E ao maoti to te feia e faaroo i te parau a te Atua ’e e haapao. »

- Haapopou tatou i te Parau a te Atua.

I TE PURE TUTIA NO TE AO

TAIORAA MATAMUA

« E vahine, ma te mahana i te ahuraa tei raro a’e i tana avae te marama »

A taio tatou i te Apokalupo a Ioane peata 11, 19a ; 12, 1-6a.10ab

’E ua iritihia a’era te uputa o te nao o te Atua i nia i te ra’i ra, ’e ua itehia ihora te aruna o te Faufaa i roto i tōna nao. E tapao rahi tei itehia i nia i te ra’i : e vahine, ma te mahana i te ahuraa, tei raro a’e i tana avae te marama, e taraunu hoe ahuru ma piti fetia tei nia i tana upoo. Ua hapu oia, ’e te ’auē ra oia i te faananau ’e te mauiui fanau. I reira ïa te iteraahia o te tahi atu tapao i nia i te ra’i : e teni rahi uteute ; e hitu ōna omii ’e hoe ahuru tara ’e e hitu taraunu i nia i taua mau omii nona ra. Ua āu maira tōna itere i te tuhaa toru o te mau fetia o te ra’i, ’e ua tīri maira i nia i te fenua nei. Haere maira taua teni ra i mua i te vahine i fatata i te fanau, ’e ua faaineine ihora oia e horomii i te tamarii, ia fanauhia mai oia. Fanau maira ta taua vahine ra, e tamaroa. Nana e aratai i te mau etene atoa ma te turu tootoo auri. ’E ua hopoihia a’era tāna tamaiti i pihai iho i te Atua ’e tōna ra terono. Horo atura taua vahine ra i te medebara ra, e parahiraa hoi tei faanahonahohia nona i reira e te Atua ra. ’E ua faaroo atura vau i te reo rahi i nia i te ra’i, i te na ōraa e : « Teie mai nei te ora a to tatou Atua ’e tōna mana ’e tōna ra hau ’e te mana hoi o tāna Kirito. »

- O te Parau ïa a te Atua.

SALAMO 44, 11-12a, 12b.13b, 14a, 14b.16

R/ I to rima-atau te hoe arii-vahine,
i te tiaraa i vehi hia i te mau auro.

A faaroo mai na, e ta’u tamahine e, a hio mai e a fariu mai i to taria,
ia aramoina ia oe to nunaa e te fare o to oe na metua.
I reira te arii e nounou ai i to aiai rahi ra.

Oia hoi to oe na Fatu, a tipapa oe i mua iana !
E te mau nunaa taoarahi-ae ra,
i te mau ofai-taoa huru rau i haamau hia i roto i te auro ra.

Ua aratai hia’tu te tamahine a te arii i ahu hia
i te ahu hiti-auro,
i roto ra iô te arii.

Ma te apee hia ra e te hoe pupu paretenia ra.
Tomo atura ratou i roto i te aorai
ma te oâoâ e te umere ra.

TAIORAA PITI

« Oia hoi te Kirito; i muri mai, te feia i mahere iana »

A taio tatou i te epitore matamua a Paulo peata i to Korinetia 15, 20-27a

E au mau taeae e, teienei rā, ua tiafaahou mau ā te Kirito mai i tei pohe ra, oia te matamua o te feia i mairi to ratou taoto. Mai te pohe i tupu mai na roto i te hoe taata, oia atoa te tiafaahouraa : na roto i te hoe taata e tupu mai ai te tiafaahouraa. Mai te taata atoa e pohe na roto ia Adamu, na roto i te Kirito te ora e noaa ai ia ratou atoa. Mai te au rä i te ti’araa o te taata : na mua roa te oho, oia hoi te Kirito ; i muri mai, ia tae i te fāraa mai o te Kirito, te feia i mahere iana. ’E muri roa a’era, o te hopea ïa ; ei reira te Kirito e pūpū atu ai i tōna Basileia i te Atua, te Metua ra ; ua hope roa ïa te mau hau, te mau mana ’e te mau puai i te faaorehia e ana. Ia hau hoi oia e ti’a ai e hope roa a’e tōna mau enemi i te tuuhia e ana i raro a’e i tōna avae. ’E te enemi hopea e haamouhia ra, o te pohe ia. Ua tuu hoi oia i te mau mea atoa i raro i tana avae.

- O te Parau ïa a te Atua.

ALLELUIA

Alleluia. Alleluia.
I teie mahanaua vetea te uputa o te Ra'i :
ua tomo Maria i roto i te hanahana o te Atua ;
a arue iana, e te mau Merahi o te ra'i e !
Alleluia.

EVANELIA

« No te mea e mau ohipa maere ta te Mana hope i rave no’u : ’e ua faateitei oia i tei haehaa te mafatu »

Evanelia o Iesu-Kirito a Luka peata 1, 39-56

Ti’a a’era Maria i taua mau mahana ra, ’e ua haere oioi atura i te hoe oire no Iuda, i te mau vahi mou’a ra. Ua tomo atura oia i roto i te fare o Zakaria, ’e ua aroha atura ia Elisabeta. ’E tei te faarooraa mai Elisabeta i to Maria aroharaa atu iana ra, ou’au’a ihora te tamaiti i roto i tōna opu, ’e ua ī a’era Elisabeta i te Varua-Maitai. Ua pii hua maira oia ma te reo puai, na ō maira : O oe tei haamaitaihia i rotopu i te mau vahine atoa, ’e ua haamaitai-atoa-hia te huaai o to oe na opu. O vai hoi au, i tae mai ia’u nei te metua vahine o tō’u Fatu. Inaha hoi, i te ōraa mai ā tō reo aroharaa i roto i tō’u nei taria, ua ou’au’a ihora te tamaiti i te oaoa, i roto i tō’u nei opu. E ao to oe, o oe i faaroo ! E tupu hoi te mau parau i faaitehia mai ia oe na roto i te faaueraa a te Fatu. O to Maria ïa parauraa atu e : « Te faateitei nei ta’u varua i te Fatu, ’e ua oaoa ta’u mafatu i te Atua, i tō’u Faaora. O oia i hio aroha mai i te haehaa o tana tavini nei. Oia mau, mai teie atu nei, e parau mai te mau u’i atoa e, e ao rahi tō’u. No te mea e mau ohipa maere ta te Mana hope i rave no’u. E mo’a tōna i’oa. E vai maite tōna aroha i te feia e mata’u iana ra, i tera u’i ’e i tera u’i. Ua faaite mai oia i te puai o töna ra rima ; ua haapuraa oia i te feia manao teoteo ; ua huri oia i te feia mana i raro i to ratou terono, ’e ua faateitei oia i tei haehaa te mafatu. Ua faaï oia i tei poia i te mea maitatai, ’e tei taoahia ra, ua faahoi ïa oia ma te ere. Ua tauturu mai oia i tana tavini ia Iseraela, ua haamanao hoi oia i töna aroha ia Aberahama ’e tōna ra huaai e a muri noa atu, mai tāna i parau mai i to tatou hui tupuna ra. » E riro e toru ava’e to Maria parahiraa ia Elisabeta, ’e ua hoi atura i tōna iho ra utuafare.

- Haapopou tatou i te Parau a te Atua.