10 no Atete - Raureni peata

10 no ATETE

RAURENI PEATA
e diakono e te maratiri

Oro’a

TAIORAA MATAMUA

« Te here nei hoi te Atua i te taata e horoa ma te oaoa »

A taio tatou i te epitore piti a Paulo peata i to Korinetia 9, 6-10

E au mau taeae e, teie tā’u parau : O te ueue ma te faaherehere ra, e ooti ïa ma te iti ; o te ueue rā ma te faaherehere ore, e ooti ïa ma te rahi. Ia horoa maoti te taata i tāna i opua i roto i tōna mafatu, eiaha ma te oto, eiaha mai te mea ua titauhia ; te here nei hoi te Atua i te taata e horoa ma te oaoa. E ti’a hoi i te Atua ia horoa ia outou i te karatia huru rau, ia ravai outou i te mau mea atoa i hinaarohia no to outou oraraa ’e ia rahi atu ā, ia rave outou i te mau ohipa maitatai atoa. Mai tei papaihia ra e : Ua faaau oia, ua horoa na te taata veve, e vai maite noa tāna parautia e a muri noa atu. ’E teienei, o tei tuu mai i te huero na te veve ’e te faraoa hoi ei māa na te taata, nana atoa e horoa mai i te huero na outou, ’e nana e faarahi mai, ’e nana e faatupu i te hoturaa o ta outou parautia.

- O te Parau ïa a te Atua.

SALAMO 111, 1-2, 5-6, 7-8, 4b.9

R/ E aroha to te taata maitai, e e horoa tipee atu oia.

E ao to te taata i mataû i te Fatu,
tei oâoâ i tana ra mau faaueraa !
E mana tana huaai i te fenua nei,
e e haamaitai hia te mau tamarii a te feia parau’tia ra.

E aroha to te taata maitai, e e horoa tipee atu oia,
e faaau oia i tana mau ohipa ma te tia.
E ore hoi te taata parau-tia e turorirori, e hoè iti noa’e,
e manaonao tamau hia ra oia e a muri noa’tu ?

E ore oia e mataû ia faaite atea hia mai te ati ra,
ua mau tona mafatu i te tiaturiraa i te Fatu.
Ua papu tona mafatu, e ore oia e mataû.
E i te hopea e tiatonu-tia-atu oia i tona ra mau enemi.

Mafatu maru e te aroha e te parau-tia,
ua opere noa oia, e ua horoa oia i tei veve ra,
e tia tana parau-tia i te vai maite raa e a muri noa’tu.
Faateitei hia tona tara ma te tura.

ALLELUIA

Alleluia. Alleluia.
O te pee mai ia’u, e ore ïa e haere na te pouri,          
cf. Ioa 8, 12bc
te na ô maira te Fatu,
e roaa rä iana te maramarama e ora ai.
Alleluia.

EVANELIA

« Ia tavini mai te tahi taata ia’u ra, e faatura ta’u Metua iana »

Evanelia o Iesu-Kirito a Ioane peata 12, 24-26

I teie tau ra, ua parau atura oia Iesu i tana mau pipi : Amene, amene, te parau atu nei au ia outou : ia ore te huero sitona ia mairi i raro i te repo, ’e ia ore ia pohe, e vai hoe noa ïa ; ia pohe rā, e hotu mai ïa i te māa e rave rahi. O te nounou i tōna iho ora, e ere ïa i te ora ; ’e o te au ore i tōna iho ra i teie nei ao, e tapea oia i tōna ora no te ora mure ore. I hinaaro te tahi taata i te tavini mai ia’u, ia pee mai ïa oia ia’u, ’e, i te vahi e parahihia e au ra, ei reira atoa ta’u tavini parahi ai. Ia tavini mai te tahi taata ia’u ra, e faatura ta’u Metua iana.

- Haapopou tatou i te Parau a te Atua.