24 no Atete - Baretotomeo peata

24 no ATETE

BARETOLOMEO PEATA
e apotoro

Oro’a

TAIORAA MATAMUA

« Te patu haaati o taua oire ra ’e ua papaihia i nia iho te i’oa o te mau apotoro tino ahuru ma piti a te Arenio »

A taio tatou i te Apokalupo a Ioane peata 21, 9b-14

O vau nei, o Ioane, ’e ua ite atura vau i te tahi melahi ’e ua na ō maira oia ia’u : « A haere mai, ’e na’u e faaite atu ia oe i te vahine faaipoipo api, te hoa faaipoipo o te Arenio. » ’E ua hopoi atura oia i ta’u varua i nia i te hoe mou’a teitei rahi, ’e ua faaite maira oia ia’u i taua oire mo’a ra, ia Ierusalema, i te pouraa mai mai nia i te ra’i, mai ō mai i te Atua ra. Te anaana ra oia i te hanahana o te Atua. E au tūna anaana i te ofai maitai roa, mai te isephe kerehe ra. ’E ua ati te oire i te patu me’ume’u ’e te teitei. Auahuru ma piti ōna uputa, ’e na melahi ahuru ma piti i taua mau uputa ra, ’e e i’oa anae tei papaihia i nia iho, te mau i’oa ïa o te mau opu ahuru ma piti o te tamarii a Iseraela. I te pae i te hitia-o-te-rā ra, e toru ïa uputa ; i te pae i apatoerau, e toru ïa uputa ; i te pae i apatoa, e toru ïa uputa ; i te pae o te tō’ō’a-o te-rā, e toru ïa uputa. Auahuru ma piti niu o te patu haaati o taua oire ra, ’e ua papaihia i nia iho te i’oa o te mau apotoro tino ahuru ma piti a te Arenio.

- O te Parau ïa a te Atua.

SALAMO 144, 10-11, 12-13ab, 17-18

R/ Ia to oe mau taua ia oe, e te Fatu e,
ia parau ratou i te hanahana o to oe ra hau.

Ia arue ta oe mau ohipa’toa ia oe, e te Fatu e,
e ia haamaitai to oe mau taua ia oe,
ia parau ratou i te hanahana o to oe ra hau,
e ia faaite ratou i to oe mana.

No te faaiteraa i te mau taata, i ta oe mau ohipa maere
e te anaana o to oe hanahana no to oe ra hau ;
O to oe ra hau, e hau ïa no te mau ui atoa ra ;
e to oe basileia e vai ïa i tera ui e i tera ui.

E parautia te Fatu i tona’toa ra mau haerea,
e te aroha i tana’toa ra mau ohipa ;
Te fatata nei te Fatu i tei tiaoro atu iana,
i te feia’toa i tei tiaoro atu iana ma te parau mau.

ALLELUIA

Alleluia. Alleluia.
E Rabi, o te Tamaiti oe a te Atua !   
Ioa 1, 49b
O te arii oe o Iseraela !
Alleluia.

EVANELIA

« Teie te hoe Ati-Iseraela mau : e taata haavare ore »

Evanelia o Iesu-Kirito a Ioane peata 1, 45-51

I taua anotau ra, farerei a’era Philipa ia Natanaela, ua parau atura Philipa iana : « Oia tei papaihia i roto i te Ture a Mose ’e i roto i te mau peropheta, ua itea ïa ia matou, o Iesu i Nazareta, te tamaiti a Iosepha ra. » Ua parau maira Natanaela iana : « E ti’a anei ia tupu mai te hoe maitai no roto mai i Nazareta ? » Ua parau atura Philipa iana : « A haere mai, a hio. » Hio atura Iesu ia Natanaela i te haereraa mai iana ra, ’e ua parau a’era nona : « Teie te hoe Ati-Iseraela mau, e taata haavare ore. » Ua parau maira Natanaela : « I hea oe i ite mai ai ia’u ? » Ua parau atura Iesu : « Hou Philipa a parau atu ai ia oe, a parahi noa ai oe i raro a’e i te tumu suke, ua ite au ia oe. » Ua pahono maira Natanaela : « E Rabi, o te Tamaiti oe a te Atua, o te arii oe o Iseraela. » Ua parau atura Iesu : « I te mea e, ua parau atu vau ia oe : ua ite au ia oe i raro a’e i te tumu suke i faaroo ai oe ! E iti tena i te mau mea ta oe e ite atu ā. » ’E ua parau atura oia iana : « Amene, amene, te parau atu nei au ia oe : teie outou a ite i te ra’i i te vetearaahia ’e te mau melahi a te Atua i te ’a’eraa i nia ’e i te pouraa mai i raro, i nia a’e i te Tamaiti a te taata nei. »

- Haapopou tatou i te Parau a te Atua.