25 no Mé 2017 - Te Maueraa o te Fatu - A

Mahana maha i muri mai i te ono dominika no te tau Pakate

TE MAUERAA O TE FATU

Oro’a hanahana

TAIORAA MATAMUA

« Ua afaihia atura oia i nia i mua i te mata o te mau Apotoro »

A taio tatou i te Ohipa a te mau Apotoro 1, 1-11

Ua papai au i tā’u puta matamua, e Theophilo e, ei faaiteraa i te mau mea atoa ta Iesu i rave ’e haapii, mai te haamataraa mai ā, e tae noa mai i te mahana i afaihia atu ai oia i nia, ia oti te mau apotoro tāna i maiti ra i te haapiihia e ana ma te mana o te Varua-Maitai. I muri mai i tōna poheraa, ua faaite oia iana iho ia ratou, ’e te ora ra oia ; ’e e rave rahi te tapao i haapapu i te reira ia ratou : ua fā mai hoi oia ia ratou, ’e ua haapii mai ia ratou i te parau o te Basileia i na mahana e maha ahuru. ’E, te tamāa ra oia ’e o ratou atoa, ua faaue maira oia ratou : eiaha ratou e haere ’ē atu i Ierusalema, e tiai rā i tei parau fafauhia mai e te Metua, ’e ua na ō maira oia : « O te parau ïa ta outou i faaroo na no roto mai i ta’u vaha. I papetito na hoi Ioane i te pape, area outou, e papetitohia outou i te Varua-Maitai i teie mau mahana i mua nei. » Ua putuputu ratou, ’e au ui atura ratou iana : « E te Fatu, ei teienei anei oe e haamau faahou ai i te basileia no Iseraela ? » Ua parau maira Iesu ia ratou : « E ore e faaitehia ia outou te tau ’e te taime i faataahia e te Metua i tōna iho mana ; e horoahia mai rā ia outou te mana o te Varua-Maitai, o te pou mai i nia ia outou, ’e e riro outou ei ite no’u i Ierusalema e ati a ’e o Iudea ’e Samaria e tae noa atu i te hopea o te fenua nei. » ’E, te parau noa ra oia i taua parau ra, ua afaihia atura oia i nia, i mua noa i to ratou mata, ’e ua huna maira te hoe ata iana, mo’e atura oia i to ratou mata. ’E, te tiatonu noa ra ratou i te ra’i e hio ia Iesu i te revaraa atu, inaha ti’a maira na taata toopiti ma te ahu teatea. Ua na ō maira raua : « E teie nei mau taata Galilea e, e aha outou e ti’a noa ai ma te tiatonu i te ra’i ? Iesu, o tei rave-’ē-hia a’enei mai rotopu mai ia outou, ’e tei afaihia i nia i te ra’i, e hoi mai ā ïa ; ’e mai ta outou i ite iana i te revaraa atu i nia i te ra’i, mai te reira atoa ia hoi mai oia. »

- O te Parau ïa a te Atua.

SALAMO 46, 2-3, 6-7, 8-9

R/ Uaae te Atua ma te umere ;
e te Fatu ma te haruru o te pu ra.

e aore râ : Alleluia !

E te mau nunaa e, a popo atu i te rima,
a pii hua na i te Atua ma te reo umere !
E au hoi ia mataû hia te Fatu te Teitei-Rahi roa e,
te Arii rahi i nia i te fenua’toa nei.

Uaae te Atua ma te umere ;
e te Fatu ma te haruru o te pu ra :
a faatai i te himene, no to tatou Atua, a faatai i te himene,
a faatai i te himene, no to tatou Arii, a faatai i te himene !

E arii oia no te fenua’toa ra ;
a himene outou i te himene aravihi roa no te Atua, ma to outou ite atoa ra !
Tei te Atua hoi te hau i nia i te mau etene,
e te parahi ra oia i nia i tona terono mo’a ra.

TAIORAA PITI

« ’E ua haaparahi te Fatu iana i töna rima atau i te ra’i ra »

A taio tatou i te epitore a Paulo peata i to Ephesia 1, 17-23

E au mau taeae e, ia ti’a i te Metua o to tatou Fatu o Iesu-Kirito, te Metua nono te hanahana ra, ia horoa mai ia outou i te varua o te paari ’e te ite, ia ite outou iana ra. Ia maramarama te mata o to outou mafatu, ia ite outou i te tiaturi i noaa mai ia outou no täna nominoraa mai ia outou ’e i te faufaa rahi o te hinuhinu o te ’äi’a täna i faataa no outou i rotopu i te feia mo’a. ’E ia ite outou i te rahi hau a’e o töna mana i roto ia tatou, te feia e faaroo nei. Töna puai ’e töna mana hope, ua faaohipahia ïa e ana i roto i te Kirito : ua faatia hoi oia iana mai roto mai i tei pohe ra, ’e ua haaparahi iana i töna rima atau i te ra’i ra, i nia ’ë roa te mau arii ’e te mau mana ’e te mau puai ’e te mau fatu ’e te mau i’oa atoa e faahitihia nei, eiaha i teie nei ao anae ra, i te ao atoa rä a  muri atu. Ua tuu oia i te mau mea atoa ra i raro a’e i tana avae, ’e ua faariro iana ei upoo no täna Etaretia i nia i te mau mea atoa ra. O te Etaretia hoi töna tino ’e te ï nona, no tei faaï-roa-hia e te Atua.

- O te Parau ïa a te Atua.

ALLELUIA

Alleluia. Alleluia.
A haere outou ! A faariro i te mau nunaa atoa ei pipi na’u,       
  Mat 28, 19a.20b
te na ô maira te Fatu.
’E inaha, tei ia outou va vau, i te mau mahana atoa
e tae noa atu i te hopea o teie nei ao.
Alleluia.

EVANELIA

« Ua hope roa i te püpühia mai ia’u te mau mana i te ra’i ’e i te fenua nei »

Evanelia o Iesu-Kirito a Mataio peata 28, 16-20

I taua anotau ra, area na pipi tino ahuru ma hoe ra, haere atura ia i Galilea i te mou’a ta Iesu i faaue ia ratou e haere i reira. ’E, ite a’era ratou iana, ua tahopu ihora ratou ; feaa ihora rä te tahi pae. Ua faafatata maira Iesu, ’e ua parau maira ia ratou, na ö maira : « Ua hope roa i te püpühia mai ia’u te mau mana i te ra’i ’e i te fenua nei. No reira, a haere outou, a faariro i te mau nunaa atoa ei pipi na’u, a papetito atu ai ia ratou i te i’oa o te Metua ’e o te Tamaiti ’e o te Varua Maitai. Ma te haapii atu ia ratou i te mau mea atoa tä’u i faaue atu ia outou. ’E inaha, tei ia outou na vau, i te mau mahana atoa e tae noa atu i te hopea o teie nei ao. »

- Haapopou tatou i te Parau a te Atua.