3 no Mé -Philipa e Iakobo peata

3 no ME

PHILIPA PEATA & IAKOBO PEATA
apotoro

Oro’a

TAIORAA MATAMUA

« Ua fā mai oia ia Iaa, ’e, i muri mai, i te mau Apotoro »

A taio tatou i te epitore matamua a Paulo peata i to Korinetia 15, 1-8

Te haamanao atu nei au ia outou, e au mau taeae, i te Evanelia tā’u i faaite atu ia outou na, ta outou hoi i faarii mai ra, ’e ta outou hoi i mau maite. E ora outou i taua Evanelia nei ia tapea maite ā, mai tā’u i faaite atu ia outou na. Ia ore rā outou e tapea i taua Evanelia, e riro ïa to outou faaroora ei mea faufaa ore. Ua tuu atu hoi au ia outou, i mua roa, I tei tuuhia mai na ia’u : ua pohe te Kirito no ta tatou mau hara, mai tei papaihia ra. Ua hunahia oia, ua tiafaahou oia i te toru o te mahana, mai te au i tei papaihia ra. Ua fā mai oia ia Kepha, ’e, i muri mai, i te tino ahuru ma piti ra. ’E muri a’era hoi, ua fā mai oia i te hoe pupu taeae i hau i te pae hanere, te ora noa nei ā te rahiraa o taua feia ra, ua taoto rā te tahi pae. ’E muri a’era hoi, ua fā mai oia ia Iakobo, ’e i muri mai, i te mau apotoro atoa. ’E, i te hopea roa, ua fā mai oia ia’u, i te fanau-hopea nei.

- O te Parau ïa a te Atua.

SALAMO 19, 2-3, 4-5ab

R/ Ua parare atura to ratou mau reni na te ao nei.

E aore râ :     Alleluia !

Te faaite hua nei te mau rai i te hanahana o te Atua,
e te parau nei te reva i te ohipa a tona ra rima.
Te haapii nei te tahi ao i te tahi i taua parau nei,
e te faaite nei te tahi rui i te tahi i taua ite ra.

E ere teie i te faatiaraa-parau, e ere i te tuuraa-reo,
e ere i te reo o te tia ia faaroo hia ;
ua parare atura to ratou mau reni na te ao nei,
e ta ratou mau parau i te hopea mai o te ao nei.

ALLELUIA

Alleluia. Alleluia.
O vau te ea, te parau mau 'e te ora,  
Ioa 14, 6b.9c
te na ô maira te Fatu.
E Philpa e, o tei hio atu ia’u, ua hio ïa i te Metua.
Alleluia.

EVANELIA

« E tau maoro tō’u parahiraa ’e outou na, ’e aita ā oe i ite mai ia’u ! »

Evanelia o Iesu-Kirito a Ioane peata 14, 6-14

I teie tau ra, ua parau atura oia i Toma : « O vau te ea, te parau mau ’e te ora. Aore e taata e tae i te Metua, maori ra na roto ia’u. Ahiri outou i ite mai ia’u, ua ite atoa ïa outou i ta ‘u Metua, ’e i teienei, ua ite outou iana ’e ua hio outou iana ». Ua parau maira Philipa : « E te Fatu, a faaite mai na i te Metua, atira atu ai ». Ua parau atura Iesu iana : « E tau maoro tō’u parahiraa ’e outou na, ’e aita ā oe i ite mai ia’u, e Philipa e ? O tei hio mai ia’u, ua hio ia i te Metua. E aha oe e parau ai e : a faaite mai na i te Metua ? Aita anei oe e faaroo na e : tei roto vau i te Metua ’e tei roto hoi te Metua ia’u ? Te mau parau tā’u e parau atu ia outou, e ere ïa i tā’u iho, na te Metua rā, o tei parahi i roto ia’u, nana e rave i tāna iho mau ohipa. A faaroo mai na : tei roto vau i te Metua ’e tei roto hoi te Metua ia’u. ’E, ia ore outou e faaroo noa i te reira, a faaroo ïa ne te mau ohipa.           Amene, amene, te parau atu nei au ia outou : o te faaroo mai ia’u, e rave atoa oia i te mau ohipa tā’u e rave nei, ’e e ohipa rahi a’e i teie tāna e rave, no te mea te haere nei au i te Metua ra. ’E te mau mea atoa ta outou e ani ma tō’u nei io’a, e rave ïa vau, ia faahanahanahia te Metua i roto i te Tamaiti. Ia ani mai outou i te hoe mea ma tō’u nei io’a, e rave ïa vau. »

- Haapopou tatou i te Parau a te Atua.