Dom 12 i te tau noa - A

DOMINIKA 12 i te tau noa

TAIORAA MATAMUA

« Ua faaora oia i te varua o te feia veve no roto i te rima o te mau taata iino »

A taio tatou i te puta a Ieremia peropheta 20, 10-13

O vau, o Ieremia, ua faaroo hoi au i te mau parau faaino a te mau taata e raverahi, e e haamataûraa e atinoa’e. A auau na, e a auau tatou iana ; o te mau taata’toa tei parahi hau ra e o vau atoa, e o tei tiai maira i to’u aoao, i te naôraa e : ia vare oia, e ia upootia tatou iana, e ia noaa mai to tatou tahooraa i nia iana. Te ia’u râ te Fatu mai te aeto puai ra, no reira o te auau mai ia’u, e hiâ ïa ratou, e e paruparu ïa ; e faahaama rahi roa hia ratou, no te mea aore ratou i haroaroa i te haama mure ore o te ore e parai hia. E o oe, e te Fatu o te mau nuu, tei tamata i te taata parautia, e tei hio i te ââu e te mafatu o te taata, te ani nei au ia ite au i to tahoo i nia ia ratou ; ua faaite hoi au i ta’u ohipa ia oe. A himene i te Fatu, a haamaitai i te Fatu : no te mea ua faaora oia i te varua o te feia veve no roto i te rima o te mau taata iino.

- O te Parau ïa a te Atua.

SALAMO 68, 8-10, 14.17, 33-35

R/ E te Atua e, a pahono mai i te parau mau.

No oe mau i faaoromai ai au i te faaino.
No oe i purou hia’i tau mata i te haama.
Ua riro vau ei taata é i to’u mau taeae,
ei taata matau ore i te mau tamaroa a ta’u metua vahine.
Inaha, ua ama’tu vau i te itoito no to fare,
ua iria vau i te faaino a te feia i faaino ia oe.

Te pure nei râ vau ia oe, e te Fatu e,
i te tau au maitai.
Na roto i te aroha mau, e te Atua e,
a pahono mai i te parau mau o te ora na oe ra.
A pahono mai ia’u, e te Fatu e, e hamani maitai hoi to aroha,
na roto i to here rahi, e hio mai oe ia’u.

Ua ite atu ra te feia haehaa e te oaoa nei ïa ;
e te feia imi Atua e ! Ia ora to outou mafatu.
No te mea e faaroo te Atua i te taata veve,
aita oia i tahitohito i tona mau tîtî.
Ia haapopohia oia e te rai e te fenua
e te tai e te mau mea e hauti i roto i te tai.

TAIORAA PITI

« E mea ‘ê te huru o te hara, e mea ‘ê te huru o te ô a te Atua »

A taio tatou i te epitore a Paulo peata i to Roma 5, 12-15

E au mau taeae e, no te taata hoe roa i tomo mai ai te hara i te ao nei, ’e na te hara i faatomo mai i te pohe, ’e ua taea-atoa-hia te taata atoa i te pohe, no te mea ua hara paatoa ratou. I vai na te hara i te ao nei hou te ture a horohia mai ai, aita rä te Atua i haapao i te reira ei hara, no te mea aita te ture e vai ra. I mana noa na rä te pohe mai ia Adamu mai ä e tae roa a’era ia Mose, i nia atoa ia ratou i tei ore i rave i te hara, mai te hara a Adamu ra. E taipe Adamu nona, no te tae mai ra. E mea ’ë rä te huru o te hara ’e e mea ’ë te huru o te ö : e rave rahi te taata i pohe no te hara a te taata hoe ra, e rahi roa atu rä te aroha o te Atua ’e te ö hoi e horohia i te taata e rave rahi, no te karatia i roaa mai i te taata hoe ra, ia Iesu-Kiroto.

- O te Parau ïa a te Atua.

ALLELUIA  

Alleluia. Alleluia.
E riro oia ei ite no’u                              
cf. Ioa 15, 26b.27a
te Varua parau mau, te na ô maira te Fatu.
E riro atoa rä outou ei ite no’u.
Alleluia.

EVANELIA

« Eiaha outou e mata’u atu i te feia e taparahi i te tino nei »

Evanelia o Iesu-Kirito a Mataio peata 10, 26-33

I taua anotau ra, ua parau atura Iesu i tāna mau Apotoro : « Eiaha maoti outou e mata’u i te taata : aore roa hoi e mea tapoihia e ore i te faaitehia, ’e aore atoa e mea huna e ore i te itehia. O tä’u e parau atu nei ia outou i roto i te pouri, e faaite hua atu ïa outou i te maramarama, ’e tei parau-riirii-hia i roto i to outou taria, e poro atu ïa outou i nia iho i te mau fare. Eiaha outou e mata’u atu i te feia e taparahi i te tino nei ’e e ore e ti’a ia ratou ia taparahi i te varua. E mata’u rä iana i te ti’a iana ia rave pohe roa te tino ’e te varua atoa i roto i Gehena. E ere anei e, e piti manu rii e hoohia nei i te hoe noa pene ? Eita rä te hoe a’e o ratou e mairi i raro i te repo ma te faatia-ore-hia e to outou Metua i te ra’i ra. Ua hope te rouru o to outou mau upoo i te taiohia. Eiaha maoti outou e mata’u : e hau a’e hoi outou i te mau manu rii atoa. Te taata te fa’i hua i mua i te taata nei e, no’u oia, oia atoa vau i mua i te aro o tö’u Metua i te ra’i ra, e fa’i hua vau e, no’u taua taata ra. O të huna rä ia’u i mua i te taata nei, e huna atoa vau iana i mua i te aro o tö’u Metua i te ra’i ra. »

- Haapopou tatou i te Parau a te Atua.