Dom 3 i te tau 40raa - A

DOMINIKA 3 i te tau MAHA AHURURAA

TAIORAA MATAMUA

« Hō mai na i te pape, ia inu tatou »

A taio tatou i te puta Exodo 17, 3-7

I te mau mahana ra, ua poiha ra te taata i reira i te pape ore, e ua amuamu ratou ia Mose, e ua naô maira : « E aha oe i aratai mai ai ia matou mai Aiphiti mai ia pohe matou e ta matou mau tamarii e ta matou maupuaâ’toa i te poiha ? » Ua tiaoro atura Mose i te Fatu, naô atura : « E aha vau i teienei feia ? Arauae ratou e pehi mai ai ia’u i te ofai ! » Ua parau maira te Fatu ia Mose : « E haere oe i mua i taua mau taata nei, o oe e te tahi pae o te feia paari o Iseraela ra ; e rave atoa i te raau ta oe i tairi i te anavai ra i to rima  a haere ai ! E inaha, e i mua vau ia oe i reira, e i nia vau i te mato i Horeba, e na oe e tairi i te mato, e e tahe mai te pape no roto mai ia inu te taata ! » Ua na reira hoi Mose i mua i te aro o te feia paari o Iseraela ra. Mairi ihora oia i te ioa o taua vahi « Te Aâraa’tu », no te avauraa a te tamarii a Iseraela, e no te mea ua ââ’tu ratou i te Fatu, i te naôraa e : « Te i ropu anei te Fatu ia tatou e aita anei ? »

- O te Parau ïa a te Atua.

SALAMO 94 (95.), 1-2, 6abc, 6d-8-9

R/ I teie nei mahana, eiaha e faaetaeta i to outou na mafatu,
ia tia ia outou te faaroo i tona ra reo.

A haere mai outou, a haamaitai tatou i te Fatu ma te oâoâ,
A himene hua tatou i te mato e ora’i tatou nei ;
E haere tatou i mua i tona aro ma te haamaitai,
e ma te salamo e himene hua’tu ai iana.

A haere mai outou, e a haamori tatou, e tahopu ;
e tuu i to tatou turi i mua i te Fatu tei hamani mai ia tatou nei !
O oia hoi to tatou Atua, o tatou hoi te taata
o tana ra aua e te mau mamoe a tona ra rima.

I teie nei mahana, ia tia ia outou te faaroo i tona ra reo :
« Eiaha e faaetaeta i to outou na mafatu mai i te Meriba ra,
                       e mai tei te mahana i Masa, i te medebara ra,
a faaooo mai ai to outou huimetua i’au,
i e noa’tu ratou i ta’u ra mau ohipa. »

TAIORAA PITI

« Ua niniihia mai  te here o te Atua i roto i to tatou nei mau mafatu er te Varua-Maitai, o tei horohia mai ia tatou nei »

A taio tatou i te epitore a Paulo peata i to Roma 5, 1-2.5-8

E au mau taeae e, no te mea ua faarirohia tatou ei feia parautia i te mana o te faaroo, ua hau atoa ïa tatou ’e te Atua na roto i to tatou Fatu ra ia Iesu-Kirito. Na roto atoa hoi iana e tae atu ai tatou i te karatia o te horoahia i te feia faaroo. Te parahi nei hoi tatou i roto i te karatia, ’e ua riro to tatou tiairaa i te hanahana o te Atua ei  teoteoraa na tatou. E ore hoi te tiaturi e haavare, no te mea ua niniihia mai te here o te Atua i roto i to tatou nei mau mafatu e te Varua-Maitai, o tei horoahia  mai ia tatou nei. I to tatou vai-paruparu-raa hoi i pohe ai te Kirito no te feia paieti ore ra, i te tau i faataahia e te Atua ra. E ore e roaa ohie te taata e faarii i te pohe no te hoe taata parautia. Penei a’e e itea te hoe o te faaoroma’i i te pohe no te tahi taata maitai. Teie rā te mea e ite ai tatou i te aroha o te Atua ia tatou : a vai taata hara noa ai tatou, i te tau i faataahia e te Atua, ua pohe te Kirito no tatou.

- O te Parau ïa a te Atua.

IRAVA I MUA I TE EVANELIA                                                                

Ei hanahana i te Kirito, te paari etereno o te Atua ora.
Ei hanahana ia oe, e te Fatu e.
O oia mau ā te Faaora o te ao nei, e te Fatu e !         
cf. Ioa 4, 42.15
Ho mai na i taua pape ra na’u,
ia ore au ia poiha faahou.
Ei hanahana i te Kirito,te paari etereno o te Atua ora.
Ei hanahana ia oe, e te Fatu e.

EVANELIA

« Ei pape e pihaa noa i roto iana no te ora mure ore »

Evanelia o Iesu-Kirito a Ioane peata 4, 5-42

Taioraa taatoa

I taua anotau ra, tae atura oia Iesu i te hoe oire i Samaria, o Sikara te i’oa, i pihai iho i te fenua i horoahia e Iakoba i tana tamaiti, ia Iosepha. Tei reira te apoo pape a Iakoba.’E no te mea ua rohirohi Iesu i te haereraa, ua parahi ihora oia i pihai iho i te apoo pape. Ua huru taea te ono o te hora. Haere maira te hoe vahine Samaria e huri i te pape. Ua parau atura Iesu iana : « Hō mai na i te pape, ia inu vau. » Ua reva hoi tana mau pipi i te oire ra, e hoo mai i te māa.Ua parau maira taua vahine Samaria ra : « E aha oe, te Ati-Iuda na, i ani mai ai i te pape ia’u, i te vahine Samaria nei ? » E ore hoi te Ati-Iuda e parauparau’e to Samaria. Ua pahono atura Iesu iana : « Ahiri oe i ite i te ō a te Atua ’e iana hoi i tei ani atu ia oe : 'Hō mai na i te pape, ia inu vau', o oe ïa tei ani mai iana, ’e ua horoa oia i te pape ora na oe. » Ua parau maira taua vahine ra : « E te Fatu, aita a oe e farii, ’e e apoo hohonu hoi teie, ei hea ta oe pape ora e noaa ai ? E rahi a’e anei oe i to matou metua ia Iakoba, o tei horoa mai i teie apoo no matou, ’e ua inu i to teie nei apoo ’e tana mau tamarii ’e tana mau puaa ? » Ua pahono atura Iesu iana : « O te inu i teie nei pape, e poiha faahou oia. O te inu rā i te pape tā’u e horoa atu nana, e ore roa oia e poiha faahou e a muri noa atu. Te pape tā’u e horoa nana, e riro ïa ei pape e pihaa noa i roto iana no te ora mure ore. » Ua parau maira taua vahine ra iana : « E te Fatu, hō mai na i taua pape ra na’u, ia ore au ia poiha faahou’e ia ore au ia hoi faahou mai i ō nei, e huti i te pape. » Ua parau atura Iesu iana : « A haere, a tii i tō tane, a hoi mai ai i ō nei. » Ua pahono maira taua vanine ra : « Aita ā’u tane. » Ua parau atura Iesu : « Ua ti’a ta oe parau : aita ā’u tane. Inaha hoi : A toopae a’enei a oe tane, ’e tena ta oe e taoto ne, e ere ïa i ta oe tane mau. No reira e parau mau ta oe i parau mai nei. » Ua parau maira taua vahine iana ra : « E te Fatu, ia hoi vau, e peropheta oe. I haamori na to matou hui metua i nia i teie mou’a, area outou, te parau nei ïa e : ei Ierusalema te Atua e haamorihia ai. » Ua parau atura Iesu iana : « A faaroo mai na, e teie vahine e, ua fatata te hora e ore ai outou e haamori i te Metua i nia i teie mou’a, ’e e ore atoa hoi e haamori ai i Ierusalema. Te haamori nei outou i ta outou i ore i ite, te haamori nei matou i ta matou i ite ; no te Ati-Iuda mai hoi te ora. Ua fatata te hora – ’e ua tae hoi i taua hora ra – e haamirihia ai te Metua e te feia haamori mau ra, ma te varua’e te parau mau ; o te reira hoi te feia haamori ta te Metua e hinaaro nei. E Varua te Atua, ’e te feia e haamori iana ra, ia haamori ïa ma te varua’e te parau mau e ti’a ai. » Ua parau maira taua vahine ra iana : « Ua ite au e : te haere mai nei te Mesia, oia i parauhia i te Kirito ’e, ua tae anae mai oia, e faaite mai oia i te mau mea atoa ia tatou. » Ua parau atura Iesu iana : « O vau ïa e parau atu nei ia oe. » O te taeraa mai ä tana mau pipi. Maere ihora ratou, oia e paraparau ra i te hoe vahine. Aita rā te hoe o ratou i parau mai e : « E aha ta oe e ani ra iana ? » E aore rā : « A aha oe i parau ai iana ? » Faarue ihora te vahine i tāna farii ’e ua haere atura i te oire ’e ua parau atura i te taata : « E haere mai na e hio i te hoe taata o tei parau mai ia’u i te mau mea atoa tā’u i rave. E ere anei oia i te Kirito ? » Haere maira ratou ia Iesu ra i rapae i te oire. Hou rā taua vahine ra a hoi faahou mai ai’e to te oire atoa ra, ua parau maira te mau pipi ia Iesu : « E Rabi, a tamāa ai. » Ua parau atura rā oia ia ratou : « Ia amu vau i te hoe māa itea-ore-hia e outou e ti’a ai. » Ua uiui a’era te mau pipi ratou ratou iho : « Ua afai mai anei te tahi taata i te māa nana ? » Ua parau atura Iesu ia ratou : « Tā’u māa, o te haapao ïa i te hinaaro o tei tono mai ia’u, e te faaoti roa i tāna ra ohipa. E ere anei te parau na outou e : “e maha ava’e toe e ootihia ai te sitona” ? Te parau atu nei rā vau ia outou : A nānā to outou mata i nia, a hio atu i te mau aua, ua teatea roa ïa, ’e ua au ia ootihia. Inaha te aufauhia ra te utua a te taata ooti ; te haaputu nei oia i te māa no te ora mure ore, a oaoa apiti ai te ueue huero ’e te ooti sitona. Ti’a iho nei teie ma’a parau : “Na te hoe e ueue, na te tahi e ooti.” Ua tono vau ia outou e ooti i tei ore i faarohorohi ia outou ; o vetahi ’ē tei rohirohi, area outou, ua fanao ïa i ta ratou ohipa. » I roto i taua oire ra, e rave rahi te taata Samaria i faaroo ia Iesu no te parau a taua vahine ra ; ua na ō atura hoi oia ia ratou : « Ua parau mai oia i te mau mea atoa tā’u i rave. » ’E no reira, i te taeraa mai taua mau taata ra ia Iesu ra, ua ani maira ratou ia parahi oia io tatou. Parahi ihora oia i reira i na mahana e piti. E rave rahi atu ā tei faaroo no ta Iesu iho parau. ’E ua parau a’era ratou i taua vahine ra : « Te faaroo nei matou, e ere atura rā no te parau ta oe i parau mai ra ; i faaroo iho nei hoi matou iana ’e ua ite atura matou e : o oia mau ā te Faaora o te ao nei. »

- Haapopou tatou i te Parau a te Atua.

E aore râ, taioraa haapotohia :

Evanelia o Iesu-Kirito a Ioane peata 4, 5-15.19b-26.39a.40-42

I taua anotau ra, tae atura oia Iesu i te hoe oire i Samaria, o Sikara te i’oa, i pihai iho i te fenua i horoahia e Iakoba i tana tamaiti, ia Iosepha. Tei reira te apoo pape a Iakoba. ’E no te mea ua rohirohi Iesu i te haereraa, ua parahi ihora oia i pihai iho i te apoo pape. Ua huru taea te ono o te hora. Haere maira te hoe vahine Samaria e huri i te pape. Ua parau atura Iesu iana : « Hō mai na i te pape, ia inu vau. » Ua reva hoi tana mau pipi i te oire ra, e hoo mai i te māa. Ua parau maira taua vahine Samaria ra : « E aha oe, te Ati-Iuda na, i ani mai ai i te pape ia’u, i te vahine Samaria nei ? » E ore hoi te Ati-Iuda e parauparau’e to Samaria. Ua pahono atura Iesu iana : « Ahiri oe i ite i te ō a te Atua ’e iana hoi i tei ani atu ia oe : 'Hō mai na i te pape, ia inu vau', o oe ïa tei ani mai iana, ’e ua horoa oia i te pape ora na oe. » Ua parau maira taua vahine ra : « E te Fatu, aita a oe e farii, ’e e apoo hohonu hoi teie, ei hea ta oe pape ora e noaa ai ? E rahi a’e anei oe i to matou metua ia Iakoba, o tei horoa mai i teie apoo no matou, ’e ua inu i to teie nei apoo ’e tana mau tamarii ’e tana mau puaa ? » Ua pahono atura Iesu iana : « O te inu i teie nei pape, e poiha faahou oia. O te inu rā i te pape tā’u e horoa atu nana, e ore roa oia e poiha faahou e a muri noa atu. Te pape tā’u e horoa nana, e riro ïa ei pape e pihaa noa i roto iana no te ora mure ore. » Ua parau maira taua vahine ra iana : « E te Fatu, hō mai na i taua pape ra na’u, ia ore au ia poiha faahou’e ia ore au ia hoi faahou mai i ō nei, e huti i te pape. Ia hoi vau, e peropheta oe. I haamori na to matou hui metua i nia i teie mou’a, area outou, te parau nei ïa e : ei Ierusalema te Atua e haamorihia ai. » Ua parau atura Iesu iana : « A faaroo mai na, e teie vahine e, ua fatata te hora e ore ai outou e haamori i te Metua i nia i teie mou’a, ’e e ore atoa hoi e haamori ai i Ierusalema. Te haamori nei outou i ta outou i ore i ite, te haamori nei matou i ta matou i ite ; no te Ati-Iuda mai hoi te ora. Ua fatata te hora – ’e ua tae hoi i taua hora ra – e haamirihia ai te Metua e te feia haamori mau ra, ma te varua’e te parau mau ; o te reira hoi te feia haamori ta te Metua e hinaaro nei. E Varua te Atua, ’e te feia e haamori iana ra, ia haamori ïa ma te varua’e te parau mau e ti’a ai. » Ua parau maira taua vahine ra iana : « Ua ite au e : te haere mai nei te Mesia, oia i parauhia i te Kirito ’e, ua tae anae mai oia, e faaite mai oia i te mau mea atoa ia tatou. » Ua parau atura Iesu iana : « O vau ïa e parau atu nei ia oe. » I roto i taua oire ra, e rave rahi te taata Samaria i faaroo ia Iesu ’E no reira, i te taeraa mai taua mau taata ra ia Iesu ra, ua ani maira ratou ia parahi oia io tatou. Parahi ihora oia i reira i na mahana e piti. E rave rahi atu ā tei faaroo no ta Iesu iho parau. ’E ua parau a’era ratou i taua vahine ra : « Te faaroo nei matou, e ere atura rā no te parau ta oe i parau mai ra ; i faaroo iho nei hoi matou iana ’e ua ite atura matou e : o oia mau ā te Faaora o te ao nei. »

- Haapopou tatou i te Parau a te Atua.