Dom 5 i te tau 40raa - A

DOMINIKA 5 i te tau MAHA AHURURAA

TAIORAA MATAMUA

« E ia tuu hia e au ta’u varua i roto ia outou na, e ia ora outou »

A taio tatou i te puta a Ezekiela peropheta 37, 12-14

Teie te parau a te Fatu, te Atua : Inaha, na’u e huai i to outou mau tanuraa, e e aratai mai i to outou mau menema, o outou, e ta’u nunaa e, e e faahoi au ia outou i te fenua o Iseraela. E e ite outou e, o vau te Fatu, ia huai hia e au to outou mau menema ma te aratai mai ia outou no roto mai i to outou mau apoo ra, e ta’u nunaa e ! E ia tuu hia e au ta’u varua i roto ia outou na, e ia ora outou ; e haaparahi ihora vau ia outou i to outou fenua, e e ite outou e, na’u, na te Fatu i parau, e na’u i rave, te na reira maira te Fatu.

- O te Parau ïa a te Atua.

SALAMO 129, 1-2, 3-4, 5-6, 7bc-8

R/ No te mea te i te Fatu te aroha,
e te iana hoi te hoonaraa rahi hau è.

Mai roto i te vahi hohonu to’u tiaororaa ia oe, e te Fatu e.
A faaroo mai i ta’u reo, e te Fatu e !
A fariu mai i to taria
i te reo o ta’u mau pure.

Ahiri oe, e te Fatu, e tamau i te mau hara,
o vai, e te Fatu e, te taata e mau mai ?
Te ia oe te faaore raa i te hara ;
i reira oe e mata’u hia’i.

Te tiaturi nei au, e te Fatu e, ta’u varua teie e tiaturi nei.
Te tiaturi nei au i ta oe na parau ;
Hau ae ta’u tiaturi raa i te Fatu
i to te ara-po tei tiai i te tataiao.

No te mea te i te Fatu te aroha,
e te iana hoi te hoonaraa rahi hau è ;
Nana iho e faaora ia Iseraela,
i tana’toa ra mau hapa.

TAIORAA PITI

« Te parahi na i roto ia outou te Varua o te Atua o tei faatiafaahou mai roto mai i tei pohe ra »

A taio tatou i te epitore a Paulo peata i to Roma 8, 8-11

E au mau taeae e, e e ore te Atua e mauruuru i te feia e pee i ta te tino. Area outou, aita outou i raro a’e i te mana o te tino, tei raro rā i te mana o te Varua, te parahi nei hoi te Varua o te Atua i roto ia outou. Te taata rā aore iana ra te Varua o te Kirito, e ere oia i te taata no te Kirito. Tei roto te Kirito ia outou ra, ua pohe iho ā ïa to outou tino no te hara, area to outou varua te ora nei ïa. ’E, te parahi na i roto ia outou te Varua o te Atua, o tei faatiafaahou ia Iesu mai roto mai i tei pohe ra, nana ïa, na tei faatiafaahou ia Iesu, mai roto mai i tei pohe ra, e faaora mai i to outou mau tino pohe noa, na roto i tōna Varua, o tei parahi i roto ia outou na.

- O te Parau ïa a te Atua.

IRAVA I MUA I TE EVANELIA                                                                

Ei hanahana ia oe, e te Fatu e,
ei hanahana ia oe.
Ua parau atura te Fatu iana :                
cf. Ioa 11, 25a-26
O vau te tiafaahouraa ’e te ora.
O tei faaroo ia oe na, e ore roa oia e pohe.
Ei hanahana ia oe, e te Fatu e.
ei hanahana ia oe.

EVANELIA

« O vau te tiafaahouraa ’e te ora »

Evanelia o Iesu-Kirito a Ioane peata 11, 1-45

Taioraa taatoa

I taua anotau ra, te pohe ra te hoe taata i te ma’i, o Lazaro ïa no Betania, no te oire o Maria raua o tōna taeae ra o Mareta. O Maria tei faatāvai i te Fatu i te monoi noanoa ’e tei tamarō i tana avae i tona rouru. O tōna ïa tuane, o Lazaro, tei pohe i te ma’i. Ua totono atura na tuahine i te ve’a e faaite ia Iesu : « E te Fatu, inaha te taata here na oe ra, ua pohe ïa i te ma’i. » ’E faaroo a’era Iesu i taua parau ra, ua na ō a’era oia : « E ere teie i te mai’ pohe, e riro rā eifaahanahanaraa i te Atua, ia faahanahanahia te Tamaiti a te Atua na roto i taua ma’i ra. » Te here ra Iesu ia Mareta ’e i tōna taeae ’e ia Lazaro atoa hoi. I muri a’e i tōna faarooraa e, ua pohe Lazaro i te ma’i, ua parahi ihora Iesu e piti ā mahana i te vahi tei reira oia. ’E, muri a’era, ua parau atura oia i te mau pipi : « Mai haere tatou i Iudea. » Ua parau maira te mau pipi iana : « e te Fatu, no titau noa mai nei te Ati-Iuda ia oe e pēhi i te ofai, ’e te hoi faahou na ā oe i reira ? » Ua parau atura Iesu ia ratou : « E ere anei, ahuru ma piti hora to te ao hoe ? Ia haere te taata i te ao ra, e ore oia e tutori, no te mea te ite nei oia i te maramarama o teie nei ao. Ia haere rā te taata i te ru’i ra, e tutori ïa oia, aita hoi te maramarama i roto iana. » ’E, oti a’era taua mau parau ra, ua na ō atura opia ia ratou : « Ua taoto to tatou hoa o Lazaro, te haere nei rā vau e faaara iana. » Ua parau maira te mau pipi : « E te Fatu, te taoto ra oia, e ora ïa oia. » No te pohe te parau ta Iesu i parau atura, aera outou, ua manao ihora ïa e, o te moe tei parauhia e ana. I reira to Iesu faaite-hua-raa ia ratou : « Ua pohe roa o Lazaro. ’E te oaoa nai au no outou, i te mea aita vau i reira a pohe ai o Lazaro, ia faaroo outou. Mai haere rā tatou iana ra ! » Toma, o tei parauhia e, Maehaa, ua na o a’era ïa i te mau pipi : « Mai haere atoa tatou, ia pohe tatou ’e oia atoa ra ! » I to Iesu taeraa atu, e maha ïa to Lazaro mahana i roto i te menema. E mea fatata Betania i Ierusalema, e riro hoe maile ’e te afa. No reira, e rave rahi te Ati-Iuda i haere mai i pihai iho ia Mareta raua o Maria, e tamahanahana ia raua i te poheraa o to taua tuane. I te faarooraa Mareta e, te haere mai ra Iesu, haere atura oia e farerei iana ; area Maria, ua parahi ihora ïa i te fare. Ua parau maira Mareta ia Iesu : « E te Fatu, ahiri oe i ō nei, e ore ïa ta’u tuane e pohe. Ua ite rā vau e, te mau mea atoa ta oe e ani i te Atua, na te Atua ïa e horoa mai ia oe i teienei ā. » Ua parau atura Iesu iana : « E tiafaahou mai tō tuane. » Ua parau maira Mareta iana : « Ua ite au e, e tiafaahou oia, ia tae i te tiafaahouraa, i te mahana hopea ra. » Ua parau atura Iesu iana : « O vau te tiafaahouraa ’e te ora, o te faaroo mai ia’u, pohe noa ā oia, e ora a ïa ; ’E o te ora i roto ia’u ’e e faaroo mai ia’u, e ore roa oia e pohe e a muri noa atu. Te faaroo na anei oe i te reira ? » Ua parau maira Mareta iana : « E te Fatu e, ē, te faaroo nei au e, o oe te Kirito,  te Tamaiti a te Atua, o te haere mai i te ao nei. » ’E, oti a’era taua parau ra, haere atura Mareta,’e ua tii atura i tōna taeae ia Maria, ’e omuomu atura iana : « Ua tae mai nei te orometua, te titau mai nei oia ia oe. » I te faarooraa Maria i taua parau ra, ti’a oioi a’era oia i nia, ’e ua haere atura e farerei ia Iesu. Aita ā Iesu i tae roa maira i roto i te oire, tei te vahi ā oia i farerei atu ai Mareta iana ra. ’E te mau Ati-Iuda i parahi i roto i te fare ’e o Maria atoa ra no te tamahanahana mai iana, i to ratou iteraa iana i te ti’a-oioi-raa ’e i te haereraa i rapae, manao ihora ratou e, te haere ra oia i te menema oto ai, ’e ua pee maira ratou iana. ’E, tae atura Maria i te vahi tei reira Iesu, ite atura oia ia Iesu, ’e ua tahopu ihora i tōna pae avae, na ō atura : « E te Fatu, ahiri oe i ō nei, e ore ïa ta’u tuane e pohe. » ’E, ite a’era Iesu iana i te otoraa, ’e te mau Ati-Iuda i pee mai iana i te oto-atoa-raa, ua uuru ihora oia i roto iana iho ra,’e ua horuhoru atura. ’E ua na ō atura : « Tei hea oia i te vaiiho-raa-hia e outou ? » Ua parau maira ratou iana : « E te Fatu, a haere mai a hoi. » Oto ihora Iesu. Ua na ō a’era te Ati-Iuda : « A hio na i tōna here iana ! » Ua na ō a’era  rā te tahi pae : « Ua faaora oia i te mata o te matapō, e aha oia i ore ai i paruru i teie nei taata, eiaha oia ia pohe ? » Uuru faahou ihora Iesu i roto iana iho, ’e ua haere atura i te menema. O te hoe ïa ana, o tei opanihia te uputa i te hoe ofai. Ua parau atura Iesu : « A huri ’ē atu na i te ofai. » Ua parau maira Mareta, te tuahine o taua taata pohe ra : « E te Fatu, o te maha teie o te mahana, ua hau’a oia i teienei. » Ua parau atura Iesu iana : « Aita anei au i parau atu ia oe e : ia faaroo oe ra, e ite oe i te hanahana o te Atua ? » Ua huri atura ratou i te ofai. Ua nānā a’era to Iesu mata i nia, ’e ua na ō atura oia : « E te Fatu e, te haamaitai atu nei au ia oe, o oe i faaroo mai i tā’u parau. Ia’u nei, ua ite au e, e faaroo noa mai oa ia’u ; no teie rā tiaa rahi taata e haaati mai nei ia’u i parau atu ai au, ia faaroo ratou e, na oe au i tono mai. » ’E, oti a’era taua parau ra, ua pii atura Iesu ma te reo rahi : « E Lazaro, a haere mai i rapae ! » Ua haere maira taua taata pohe ra i rapae, ua taamuhia na rima ’e na avae ’e ua pouhuhia tōna mata i te hoe ahu. Ua parau atura Iesu ia ratou : « A tatara iana’e a tuu iana ia haere noa ana. » I roto i te mau Ati-Iuda i haere mai ia Maria ra, e rave rahi tei faaroo ia Iesu, i to ratou iteraa i te ohipa tāna i rave.

- Haapopou tatou i te Parau a te Atua.

E aore râ, taioraa haapotohia :

Evanelia o Iesu-Kirito a Ioane peata 11, 3-7.17.20-27.34-45

I taua anotau ra, ua totono atura o mareta e o Maria, na tuahine o Lazaro i te ve’a e faaite ia Iesu : « E te Fatu, inaha te taata here na oe ra, ua pohe ïa i te ma’i. » ’E faaroo a’era Iesu i taua parau ra, ua na ō a’era oia : « E ere teie i te mai’ pohe, e riro rā eifaahanahanaraa i te Atua, ia faahanahanahia te Tamaiti a te Atua na roto i taua ma’i ra. » Te here ra Iesu ia Mareta ’e i tōna taeae ’e ia Lazaro atoa hoi. I muri a’e i tōna faarooraa e, ua pohe Lazaro i te ma’i, ua parahi ihora Iesu e piti ā mahana i te vahi tei reira oia. ’E, muri a’era, ua parau atura oia i te mau pipi : « Mai haere tatou i Iudea. » I to Iesu taeraa atu, e maha ïa to Lazaro mahana i roto i te menema. I te faarooraa Mareta e, te haere mai ra Iesu, haere atura oia e farerei iana ; area Maria, ua parahi ihora ïa i te fare. Ua parau maira Mareta ia Iesu : « E te Fatu, ahiri oe i ō nei, e ore ïa ta’u tuane e pohe. Ua ite rā vau e, te mau mea atoa ta oe e ani i te Atua, na te Atua ïa e horoa mai ia oe i teienei ā. » Ua parau atura Iesu iana : « E tiafaahou mai tō tuane. » Ua parau maira Mareta iana : « Ua ite au e, e tiafaahou oia, ia tae i te tiafaahouraa, i te mahana hopea ra. » Ua parau atura Iesu iana : « O vau te tiafaahouraa ’e te ora, o te faaroo mai ia’u, pohe noa ā oia, e ora a ïa ; ’E o te ora i roto ia’u ’e e faaroo mai ia’u, e ore roa oia e pohe e a muri noa atu. Te faaroo na anei oe i te reira ? » Ua parau maira Mareta iana : « E te Fatu e, ē, te faaroo nei au e, o oe te Kirito, te Tamaiti a te Atua, o te haere mai i te ao nei. » Ua uuru ihora oia i roto iana iho ra,’e ua horuhoru atura. ’E ua na ō atura : « Tei hea oia i te vaiiho-raa-hia e outou ? » Ua parau maira ratou iana : « E te Fatu, a haere mai a hoi. » Oto ihora Iesu. Ua na ō a’era te Ati-Iuda : « A hio na i tōna here iana ! » Ua na ō a’era  rā te tahi pae : « Ua faaora oia i te mata o te matapō, e aha oia i ore ai i paruru i teie nei taata, eiaha oia ia pohe ? » Uuru faahou ihora Iesu i roto iana iho, ’e ua haere atura i te menema. O te hoe ïa ana, o tei opanihia te uputa i te hoe ofai. Ua parau atura Iesu : « A huri ’ē atu na i te ofai. » Ua parau maira Mareta, te tuahine o taua taata pohe ra : « E te Fatu, o te maha teie o te mahana, ua hau’a oia i teienei. » Ua parau atura Iesu iana : « Aita anei au i parau atu ia oe e : ia faaroo oe ra, e ite oe i te hanahana o te Atua ? » Ua huri atura ratou i te ofai. Ua nānā a’era to Iesu mata i nia, ’e ua na ō atura oia : « E te Fatu e, te haamaitai atu nei au ia oe, o oe i faaroo mai i tā’u parau. Ia’u nei, ua ite au e, e faaroo noa mai oa ia’u ; no teie rā tiaa rahi taata e haaati mai nei ia’u i parau atu ai au, ia faaroo ratou e, na oe au i tono mai. » ’E, oti a’era taua parau ra, ua pii atura Iesu ma te reo rahi : « E Lazaro, a haere mai i rapae ! » Ua haere maira taua taata pohe ra i rapae, ua taamuhia na rima ’e na avae ’e ua pouhuhia tōna mata i te hoe ahu. Ua parau atura Iesu ia ratou : « A tatara iana’e a tuu iana ia haere noa ana. » I roto i te mau Ati-Iuda i haere mai ia Maria ra, e rave rahi tei faaroo ia Iesu, i to ratou iteraa i te ohipa tāna i rave.

- Haapopou tatou i te Parau a te Atua.