Dom 2 i te tau 40raa - A

DOMINIKA 2 i te tau MAHA AHURURAA

TAIORAA MATAMUA

Te nominoraahia o Aberahama, te metua o te nunaa o te Atua

A taio tatou i te puta Genese 12, 1-4a

I te mau mahana ra, ua parau maira te Fatu ia Aberama : « A faarue oe i to fenua, e to fetii, e te utuafare o to metua ra, e a haere mai i te fenua ta’u e faaite atu ia oe na. E faariro hoi au ia oe ei nunaa rahi, e haamaitai au ia oe, e faarahi atu au i to oe ra ioa, e e haamaitai hia oe. E haamaitai atu au i te feia e haamaitai ia oe na, e e katara’tu au i te feia e katara ia oe na ; e i to roto mai ia oe na e haamaitai hia te mau ui atoa o te fenua nei. » Haere atura Aberama mai ta te Fatu i faaue mai iana ra, oia e o Lota atoa atoa i te haereraa.

- O te Parau ïa a te Atua.

SALAMO 32, 4-5, 18-19, 20.22

R/ Ei i nia ia matou to oe here, e te Fatu e,
mai ia matou i tiaturi ia oe na !

Ua tia hoi te parau a te Fatu,
e e parau mau anae ta’na mau ohipa atoa ra.
Te here nei oia i te parau-tia e te parau-au,
ua î hoi te ao atoa nei i te here a te Fatu.

Inaha, tei nia te mata o te Fatu i te feia e mataû iana ra,
e i nia i te feia e tiaturi i tona ra aroha.
Ei faaora i to ratou varua i te pohe,
e ei faaamu ia ratou i te tau oê ra.

Te tiaturi mai ra to matou varua i te Fatu,
o oia hoi to matou turu e to matou paruru.
Ei i nia ia matou to oe here, e te Fatu e,
mai ia matou i tiaturi ia oe na.

TAIORAA PITI

E nomino mai te Atua ia tatou e e haamaramarama mai

A taio tatou i te epitore piti a Paulo peata ia Timoteo 1, 8b-10

E ta’u tamaiti here ra, e faarii rā oe i te mauiui no te Evanelia, mai ia’u atoa nei, ma te tiaturi i te mana o te Atua. O tei faaora mai ia tatou, ’e o tei nomino mai ia tatou i te nominoraa mo’a, eiaha no te mau ohipa i ravehia e tatou, no tāna rā opuaraa ’e no tāna karatia. E taua karatia nei, o tei faataahia na tatou na roto i te Kirito rā ia Iesu, hou te haamataraa mai o te tau, ua faaite-hua-hia ïa i teienei, na roto i te fāraa mai o to tatou Faaora, o te Kirito ra, o Iesu. Nana i faaore i te pohe ’e i faaanaana i te ora ’e te pohe ore, na roto i te Evanelia.

- O te Parau ïa a te Atua.

IRAVA I MUA I TE EVANELIA                                                                

Ei hanahana i te Kirito,
te parau Etereno o te Atua ora.
Ei hanahana ia oe, e te Fatu e.
Mai roto mai i te ata anaana ra,                          
cf. Mat 17, 5
faaroohia ihora te reo o te Metua i te na’oraa e :
« O ta’u Tamaiti here teie, a faaroo iana ! »
Ei hanahana i te Kirito,
te parau Etereno o te Atua ora.
Ei hanahana ia oe, e te Fatu e.

EVANELIA

« Anaana a’era töna mata, mai te mahana ra »

Evanelia o Iesu-Kirito a Mataio peata 17, 1-9

I taua anotau ra, ua rave atura Iesu ia Petero, ia Iakobo ’e ia Ioane, ’e ua aratai atura ia ratou i nia i te hoe mou’a teitei. ’E ua faahurue ’ē-hia ihora oia i mua ia ratou. Anaana a’era tōna mata, mai te mahana ra, Teatea a’era tōna ahu mai te maramarama ra. ’E inaha, fā maira Elia raua o Mose ’e ua paraparau a’era raua ’e o Iesu atoa hoi. Ua parau atura Petero ia Iesu, na ō atura : « e te Fatu, e mea maitai ia parahi tatou i ō nei ; ia ti’a ia oe ra, e faatia vau i na fare autaa e toru a’e : no oe te tahi, no Mose te tahi, ’e no Elia te tahi. » Te parau noa ra ā oia, inaha tamaruhia maira ratou e te hoe ata maramarama, ’e e reo maira, no roto mai i taua ata ra, na ō maira : « O ta’u Tamaiti here teie, ua mauruuru roa vau iana, a faaroo iana ! » ’E, faaroo a’era ratou, ua tipapa ihora na pipi ra i raro, mata’u roa a’era. Ua faafatata maira Iesu, ’e ua fa’ati’a’ia maira ia ratou, na ō maira : « A ti’a i nia, eiaha outou e mata’u ! » ’E, nānā a’era to ratou mata i nia, aore noa e taata i itea e ratou, maori ra o Iesu anae ra. Tei te pouraa ratou i raro, mai nia mai i taua mou’a ra, ua faaue maira Iesu ia ratou, na ō maira : « Eiaha outou e faaite noa atu i teie orama e ti’a noa mai te Tamaiti a te taata mai roto mai i tei pohe. »

- Haapopou tatou i te Parau a te Atua.