Dom 25 i te tau noa - A

DOMINIKA 25 i te tau noa

TAIORAA MATAMUA

« E ere to’u mau manao i to outou mau manao »

A taio tatou i te puta a Isaia peropheta 55, 6-9

A imi outou i te Fatu, oi tia te itearaa hia ; a tiaoro outou iana, oi fatata mai. Ia faarue te paieti ore i tona haerea e te taata parautia ore i tana mau opuaraa, e ia hoi oia i te Fatu, e nana oia e aroha mai, e ia hoi i to tatou Atua, no te mea te hinaaro rahi nei oia e faaore i te hara. E ere to’u mau manao i to outou mau manao, e ere hoi to outou mau haerea i to’u mau haerea ; te na reira maira te Fatu. Mai te rai nei hoi, e teitei rahi tona i nia i te fenua, oia’toa to’u mau haerea, e teitei ïa i to outou ra mau haerea, e to’u ra mau manao i to outou mau manao.

- O te Parau ïa a te Atua.

SALAMO 144, 2-3, 8-9, 17-18

R/ Te fatata nei te Fatu
i tei tiaoro atu iana.

E hinaaro vau i te haamaitai ia oe i te mau mahana’toa,
e arue au i to io’a e a muri noa’tu, e a tau a hiti noa’tu.
Te rahi nei te Fatu, e au hoi ia rahi roa nona haamaitairaa hia,
aore hoi e otia i tona rahiraa.

E maru e te aroha te Fatu,
taere i te riri,î roa i te here.
E maitai te Fatu i te taatoà raa :
e taea roa hia tona aroha faaherehere i nia i tana’toa ra mau ohipa.

E parautia re Fatu i tona’toa ra mau haerea,
e te aroha i tana’toa ra mau ohipa ;
te fatata nei te Fatu i tei tiaoro atu iana,
i te feia’toa i tei tiaoro atu iana ma te parau mau.

TAIORAA PITI

« Ia’u nei, te ora, o te Kirito ïa »

A taio tatou i te epitore a Paulo peata i to Philipi 1, 20c-24.27a

E au mau taeae e, mai te Kirito i faateitei-noa-hia i roto i tö’u nei tino i mutaa iho ra, oia atoa i teienei, na roto i tö’u ora, ’e aore rä, na roto i tö’u pohe. Ia’u nei, te ora, o te Kirito ïa ; ’e ia pohe noa atu vau, e api ïa vau. Teienei rä, ia ora vau i roto i te tino nei, ’e ia hotu tä’u ohipa i te hotu rahi, aita atura ïa vau i ite i tei au ia maitai. Te feaapiti nei tö’u manao : i te hoe pae, te hinaaro nei au i te reva, ia parahi au i pihai iho i te Kirito, o te mea hau roa atu ïa i te maitai. I te tahi pae rä, no to outou maitai, e mea au a’e ia parahi au i roto i te tino nei. Ia au rä to outou, oraraa i te Evanelia a te Kirito.

- O te Parau ïa a te Atua.

ALLELUIA

Alleluia. Alleluia.
E maitai te Fatu i te taatoà raa :                                                 
  cf. Sal 144, 9.7b
e taea roa hia tona aroha faaherehere i nia i tana’toa ra mau ohipa.
E haapopou hia ta oe ra parautia.
Alleluia.

EVANELIA

« Ua ino to oe mata i tö’u nei maitai ? »

Evanelia o Iesu-Kirito a Mataio peata 20, 1-16

I taua anotau ra, ua parau atura Iesu i teie parabole i tāna mau pipi : « E au hoi te Basileia o te ra’i ra i te hoe taata utuafare, o tei haere i rapae i te poipoi roa ra e tarahu i te rave ohipa no täna ra ’ö vine. ’E, au a’era täna parau ’e te rave ohipa e, e taihoe denari i te mahana hoe ta ratou moni, tono atura oia ia ratou i täna ’ö vine. ’E, tae a’era i te toru o te hora, haere atura oia i rapae, ’e ite atura i te tahi atu mau taata i te faaea-noa-raa i te mähora makete. Ua parau atura oia ia ratou : “E haere atoa outou i te ’ö vine, ’e na’u e horoa ia outou i te moni e au.” Haere atura ratou. Haere faahou atura taua taata ra i rapae i te ono o te hora ’e i te iva hoi, ’e ua na reira faahou atura oia. ’E fatata a’era te ahuru ma hoe o te hora, haere atura oia i rapae, ite atura i te tahi atu ä mau rave ohipa i te ti’a-noa-raa. Ua na ö atura oia ia ratou : “E aha outou e faaea noa ai o ö nei, e mairi noa atu te mahana ?” Ua parau maira ratou : “Aita e taata i tarahu mai ia matou.” Ua na ö atura oia ia ratou : “Haere atoa outou i tä’u ’ö vine.” ’E, ahiahi ihora, ua parau atura taua fatu ’ö vine ra i töna ti’a’au : “A parau atu na i te rave ohipa e haere mai, a aufau atu ai i to ratou taime. E haamata oe na te hopea na e haere noa atu i te matamehai.” Tae maira to te ahuru ma hoe o te hora, horoahia atura ia ratou taihoe denari i te taata hoe. ’E, tae atoa maira to te matamehai, manao ihora ratou e, e hau ta ratou moni e horoahia i ta te hopea. Hoe noa iho rä denari i horoahia atu i te taata tataitahi. A rave ai ratou i ta ratou denari, te amuamu ra ratou i te na öraa e : “Hoe anae hora i ravehia e teie mau taata hopea nei, ’e ua faafaito oe ia ratou ia matou nei i tei faaoroma’i i te rohirohi ’e te veavea o te mahana.” Ua pahono atura te fatu ’ö vine i te hoe o ratou, na o atura : “E hoa, aita vau i hamani ino a’e ia oe, e ere anei ua faaau taua i te hoe denari ? A rave i ta oe moni, a haere. I ti’a ai’u ia horoa na te faahopea, mai ta oe atoa na, eiaha ïa ? Eiaha vau ia rave i tä’u taoa, mai tä’u e hinaaro ra ? E aore rä, ua ino to oe mata i tö’u nei maitai ? ” Oia ïa, e rave rahi te hopea e riro ei matamehai, ’e e rave rahi atoa te matamehai e riro ei hopea. »

- Haapopou tatou i te Parau a te Atua.