Dom 3 no Pakate - A

DOMINIKA 3 i te tau PAKATE

TAIORAA MATAMUA

E ore hoi e ti’a i te pohe ia tapea iana

A taio tatou i te Ohipa a te mau Apotoro 2, 14.22b-33

I te mahana Penetekote, ua ti’a a’era Petero i nia ’e te tino ahuru ma hoe atoa ra, ’e ua faateitei atura oia i tana reo, na ö atura : «E te mau taata Iudea nei, ’e outou atoa hoi e parahi i Ierusalema nei, ia ite papu outou i teie ohipa e tupu nei, ’e ia faaroo outou i tä’u nei parau. O Iesu o Nazareta, te taata ta te Atua i haamana ei ti’a nona i rotopu ia outou na roto i te semeio, te ohipa maere ’e te tapao täna i rave na roto iana i mua ia outou, mai ta outou i ite ra. Oia te i tuuhia mai ia outou, mai te au i te opuaraa papu a te Atua, ’e mai te au hoi i täna haapao-atea-raa, ua haru outou iana, ’e ua haapohe outou iana, ma te patiti iana i nia i te tatauro, na roto i te rima o te taata iino ra. Ua faaora rä te Atua iana i te mau mamae o te pohe, ’e ua faatiafaahou iana. E ore hoi e ti’a i te pohe ia tapea iana. Ua parau mai hoi Davida nona : Te ite tuutuu ore ra vau i te Fatu i mua ia’u, te ti’a nei hoi oia i tö’u pae atau, eiaha vau ia aueue. I oaoa ai ta’u mafatu, ’e i umere ai ta’u arero. E taoto ta’u tino ma te tiaturi. E ore roa hoi oe e faarue mai i ta’u ora i roto i te pö, ’e e ore oe e faatia ia ite ta oe mo’a i te tahutiraa. Ua faaite mai oe ia’u i te ea e tae atu ai i te ora, ’e e faaï mai oe ia’u i te oaoa i mua i to oe aro. E te mau taeae e, e ti’a ia’u ia parau ia outou ma te mata’u ore : ua mate roa te patereareha ra o Davida, ’e ua hunahia oia, ’e te vai noa neiä töna menema io tatou i teie nei a mahana. E peropheta rä oia, ’e ua ite oia i te parau ta te Atua i tapu iana, oia hoi e haaparahi i te hoe taata no roto mai i töna huaai i nia i töna ra terono. No reira oia i ite atea ai i te tiafaahouraa o te Kirito, ’e i parau ai no taua tiafaahouraa ra, a na ö ai e : Aita oia i faaruehia i roto i te pö ’e aita töna tino i ite i te tahuti. Ua faatiafaahou a’enei te Atua i taua Iesu ra, ’e e ite anae matou no taua tiafaahouraa ra. I teienei, ua faateiteihia oia i te rima atau o te Atua, ’e ua horoa mai te Metua iana i te Varua-Maitai i paraufafauhia mai ra, ’e ua ninii mai nei oia i taua Varua ra. O te reira ïa ta outou e ite nei ’e e faaroo nei.

- O te Parau ïa a te Atua.

SALAMO 16, 1.2a.5, 7-8, 9-10, 11

R/ Ē te Fatu ē, a haapii mai oe
i te èà o te ora.

e aore râ : Alleluia !

A paruru mai oe ia’u, e te Fatu e, tei roto ia oe to’u haapuraa.
A parau outou i te Fatu : e to’u Fatu e !
E te Fatu e, o oe ta’u nei tufaa e ta’u nei auâ,
na oe e paruru papu i ta’u tuhaa.

Te haamaitai nei au i te Fatu o tei aô mai ia’u nei,
e ua haapii maite mai ta’u manao-aau ia’u i te rui ;
Ua tuu â vau i te Fatu i mua i to’u nei aro ma te tuutuu ore ;
o oia hoi to’u rima-atau e eita roa vau e aueue.

No reira ua oâoâ to’u mafatu, e ua popou to’u varua,
e ua vai maite noa to’u nei tino ma te peapea ore.
No te mea e ore hoi oe e faarue atu i to’u varua i Hade;
e e ore roa hoi oe e tuu atu i to tauâ ia ite i te tahuti no ta apoo.

A haapii mai oe i te èà o te ora ;
i mua i to aro te îraa i te oâoâ ;
i to rima-atau hoi te mau oâoâraa etereno ra.

TAIORAA PITI

« Ua hoohia mai outou i te hoe toto taoa rahi, mai te toto o te hoe arenio ino ore e te hapa ore, oia hoi te toto o te Kirito »

A taio tatou i te epitore matamua a Petero peata 1, 17-21

E au mau taeae e, ’e te haametua na outou iana i tei haava i te ohipa a te taata atoa ma te haapao ore i te huru o te taata, e parahi ïa outou ma te mata’u iana, i te tau o to outou purutiaraa i te fenua nei. Ua ite hoi outou e, ua hoohia outou i te oraraa faufaa ore noa i tuuhia mai e to outou hui metua ; aita tä outou i hoohia i te taoa e ino noa ra, mai te auro ’e te ario, ua hoo hia rä outou i te hoe toto taoa rahi, mai te toto o te hoe arenio ino ore ’e te hapa ore, oia hoi te toto o te Kirito. Oia i haapao-atea-hia, hou te faatumuraahia o teie nei ao, ’e tei faaitehia mai, i te tau hopea nei, no outou. Na roto iana, te faaroo nei outou i te Atua o tei faatiafaahou iana mai roto mai i tei pohe ra, ’e o tei püpü i te hanahana nona ; ’e no reira, ua faatinanahia to outou faaroo ’e to outou tiaturiraa i nia i te Atua.

- O te Parau ïa a te Atua.

ALLELUIA

Alleluia. Alleluia.
E te Fatu, e Ietu e, a tauturu mai oe ia haroaroa ia matou te Papairaa moa !
cf. Lc 24, 32
Ia anaanatae to matou aau
ia paraparau mai oe ia matou.
Alléluia.

EVANELIA

« To raua iteraa ia Iesu i te vavahiraa pâne ra »

Evanelia o Iesu-Kirito a Luka peata 24, 13-35

I te toru o te mahana i muri a’e i to Iesu poheraa, rereva atura e toopiti o ratou i te hoe oire iti, o Emausa te i’oa ; e piti hora haereraa, mai Ierusalema atu, e tae ai i reira. Paraparau noa ihora raua i taua mau mea ra. ’E, tei te paraparau-noa-ra raua, ’e tei te tâu’aparau-noa-raa, faafatata maira Iesu ia raua, ’e ua haere ’e o raua atoa. Aita râ i taa ia raua e, o Iesu ïa, ua faaorehia hoi to raua ite iana. Ua parau maira oia ia raua : «E aha tena mau parau ta orua e paraparau ra, a haere noa ai orua ?» Ti’a ihora raua ma te mata oto. ’E ua pahono atura te hoe o raua, o Keleopha te i’oa : «O oe anae paha te taata Ierusalema tei ore i ite i te mau mea i tupu i teie nei mau mahana. » Ua parau maira Iesu ai raua : «E aha ïa mau mea ?» Ua pahono atura raua : «O te mau parau ïa no Iesu i Nazareta, e peropheta mana oia, i te ohipa ’e i te parau, i mua i te aro o te Atua ’e i te nunaa atoa ra. ’E te huru hoi o ta to tatou mau tahu’a rarahi ’e ta to tatou hui mana tuuraa atu iana, ia faautuahia i te pohe ’e ta ratou hoi faatatauroraa iana. Area matou nei, ua tiaturi ïa e, nana e faaora ia Iseraela. E ere râ te reira anae ra, o te toru teie mahana mai te tupuraa mai â taua mau mea ra ; teie râ i maheaitu na matou i e i e toofanu pu’e vahine no roto ia matou ; ua haere ratou i te menema i te poipoi roa ra. ’E, aore a’era i itea ia ratou te tino, ua haere maira ratou e parau e, e melahi tei fâ mai ia ratou, o tei parau mai e : te ora nei oia haere atura te tahi mau taata o matou nei i te menema, ’e roohia atura e, oia mau â ta taua mau vahine i parau ra ; aera oia ra, aore ratou i ite iana. » Ua parau atura oia ia raua : «‘Auê ïa mafatu manao ore ’e te faaroo ’atâ i te mau parau atoa i faaitehia mai e te mau peropheta. E ere anei e, ia mauiui te Kirito i taua mau mea ra e ti’a ai, ia tomo oia i roto i tôna hanahana ? » ’E ua tatara maira oia ia raua i te mau parau atoa i papaihia nona, mai ia Mose e tae roa mai i te mau peropheta atoa. ’E, fatata maira te oire iti e haerehia e raua, ua faahua haere roa â oia. Ua parau onoono atura raua iana, na ô atura : «A faaea mai ia maua nei, ua fatata roa hoi te ahiahi ra ’e ua tahataha te mahana.» Tomo atura oia ’e faaea ihora ia raua. ’E, iana i amui atoa atu ia raua i te amuraa mâa ra, ua rave ihora oia i te faraoa, ’e, oti a’era te Atua i te haamaitaihia e ana, ua vavahi ihora oia i taua faraoa ra, ’e ua horoa atura ia raua. ’Ara’ara a’era to raua mata, taa atura ia raua o vai oia, ’e, i reira ra, mo’e roa atura oia i to raua mata. Ua na ô ihora raua raua iho : «E ere anei e, te mahanahana ra to taua mafatu i roto ia taua, a paraparau noa ai oia i te aratia ra ’e a tatara ai oia i te mau papai raa ia taua ? » I reira ihora, titi’a a’era raua i nia, ’e hohoi maira i Ierusalema ; roohoa maira, ua putuputu te tino ahuru ma hoe ra ’e te tahi atu mau pipi, o tei parau mai ia raua e : «Ua tiafaahou mau â te Fatu, ’e ua fâ mai ia Simona ra. » Ua faaite maira raua i te ohipa i tupu i te aratia, ’e to raua iteraa ia Iesu i te vavahiraa pâne ra.

- Haapopou tatou i te Parau a te Atua.