Dom 33 i te tau noa - A

DOMINIKA 33 i te tau noa

TAIORAA MATAMUA

« Ua rave tana rima i te ohipa ma te feruri maite ra »

A taio tatou i te puta a te mau Maseli 31, 10-13.19-20.30-31

O vai ïa taata i noaa mai iana te vahine puai ra ? Ua hau roa oia i te maitai i te mau taoa e hopoi hia mai no te hopea mai o te fenua nei. Te tiaturi ra te mafatu o tona ra tane iana, e ore roa hoi oia e ere i te taoa pau. E horoa’tu iana i te maitai, eiaha i te ino, i te mau mahana’toa o tona ra oraraa. Ua imi oia i te huruhuru mamoe e te lino, e ua rave tana rima i te ohipa ma te feruri maite ra. Te rave nei tana rima i te mau ohipa rarahi e tana rimarima i te mauhaa ninoraa taura. Ua hohora oia i tana ra pue rima i te taata, aore a’na e faufaa, e ua faatoro oia i tona ra apu rima i te taata veve ra. E mea haavare â ïa te au maitai, e te purotu ra e mea faufaa ore ïa ; te vahine ra te mataû i te Fatu ra e arue hia ïa. E horoa’tu iana i te hotu a tana ra rima, e na tana ra ohipa e arue iana i te uputa o te oire ra.

- O te Parau ïa a te Atua.

SALAMO 127, 1b-2, 3, 4-5

R/ E ao to te feia e mataû i te Fatu ra !

E ao to te feia e mataû i te Fatu ra,
e tei haere na nia i tona mau èà.
E amu hoi oe i ta to rima i ohipa ra ;
e ao to oe e te oâoâ atoa hoi !

E riro to vahine
mai te ô vine hotu i to fare na,
to mau tamarii mai te ohi olive ïa
i te atiraa i ta oe na iri amuraa maa ra.

Inaha, e na reira te haamaitairaa hia
o te taata tei matau i te Fatu ra.
Ia haamaitai mai te Fatu ia oe mai ô mai i Siona ra,
ia ite ae oe ia Ierusalema i roto i te oâoâ ra.

TAIORAA PITI

« Ia te mahana o te Fatu a roohia mai ai outou mai te eia ra »

A taio tatou i te epitore matamua a Paulo peata i to Tesalonia 5, 1-6

Area, i te taime ’e te tau, e au mau taeae e, aita e faufaa e papai atu ia outou i te reira. Ua ite hua hoi outou e : e haere mai te mahana o te Fatu mai te eia i te pö ra. Ia parau te taata e : « Auë te hau ’e te ati ore », ei reira ïa ratou e roohia ai e te pau, mai te vahine hapu e roohia e te mauiui fanau ; e ore ïa e ti’a ia ratou ia ora. Outou rä, e te mau taeae e, aita ïa outou i roto i te pouri a roohia mai ai outou e taua mahana ra, mai te eia ra. E tamarii anae hoi outou no te maramarama, e tamarii no te ao, e ere tatou i to te pö, e ere atoa hoi i to te pouri. Eiaha maoti tatou e taoto, mai ia vera ra, ia vai ara noa rä tatou ma te haapae i te taero.

- O te Parau ïa a te Atua.

ALLELUIA

Alleluia. Alleluia.
A parahi mai i roto ia’u, mai ia’u e parahi nei i roto ia outou,         
Ioa 15, 4a.5b
- te na ô maira te Fatu -,
o te parahi mai i roto ia’u, ’e o vau hoi i roto iana, o oia te hotu rahi.
Alleluia.

EVANELIA

« O oe i haapao maitai i tenä na taoa iti haihai, e fa’ati’a’au atu vau ia oe i nia i te mea rahi »

Evanelia o Iesu-Kirito a Mataio peata 25, 14-30 [T. haapotohia : 14-15.19-21]

I taua anotau ra, ua parau atura Iesu i teie parabole i tāna mau pipi : « E au ïa i te hoe taata o tei tere i te fenua ’ë. Hou a reva ai, ua titau atura oia i töna mau tavini, ’e ua tuu atura oia i täna faufaa atoa ra na ratou e haapao. Ua opere atura oia, ta te tahi e pae taleni, ta te rahi e piti, ta te tahi hoe noa iho, mai te au i to ratou itoito ’e i to ratou aravihi. ’E ua reva atura oia i töna tere. Faaearaa o te taioraa haapotohia.

I reira ihora, haere atura tei rave i na taleni e pae ra, ’e ua hoohoo haere atura oia i taua na taleni e pae ra, ’e ua api maira oia, e pae ä taleni. Oia atoa tei rave i na taleni e piti, api-atoa-hia maira oia, e piti ä taleni. Area oia o tei rave i te hoe noa iho taleni, haere atura ïa, heru ihora i te repo, ’e huna ihora i te moni a töna fatu. Tuatiraa o te taioraa haapotohia :

’E, maoro roa a’era, hoi maira te fatu o taua mau tavini ra, ’e ua faaafaro ihora i te faufaa nana ra ’e o ratou atoa. Haere maira tei rave i na taleni e pae, ’e ua afai atoa maira i na taleni api e pae, na ö maira : “E te fatu, e pae a oe taleni i horoa mai ia’u, teie ä na taleni api e pae i noaa mai ia’u.” Ua parau atura töna fatu iana : “Ua ti’a roa, e teie nei tavini maitai ’e te haapao, o oe i haapao maitai i tenä na taoa iti haihai, e fa’ati’a’au atu vau ia oe i nia i te mea rahi. A tomo i roto i te oaoaraa o tö fatu.” E faaea te taioraa haapotohia i onei.

Haere atoa maira tei rave i na taleni e piti, na ö maira : “E te fatu, e piti a oe taleni i horoa mai ia’u, teie ä na taleni api e piti i noaa mai ia’u.” Ua parau atura töna fatu iana : “Ua ti’a roa, e teie nei tavini maitai ’e te haapao, o oe i haapao maitai i tenä na taoa iti haihai, e fa’ati’a’au atu vau ia oe i nia i te mea rahi. A tomo i roto i te oaoaraa o tö fatu.” Haere maira hoi tei rave i te hoe noa iho taleni, na ö maira : “E te fatu, ua ite au e, e taata etaeta oe : ta oe i ore i ueue ra, e ooti ä oe, ’e ta oe i ore i opera ra, e titau ä oe. Mata’u ihora vau, haere atura, ’e ua huna ihora vau i ta oe taleni i raro i te repo. Tera mai ta oe taleni.” Ua pahono atura rä te fatu, na ö atura : “E teie ei tavini ino ’e te faatau e, ua ite oe e, e ooti i tä’u i ore i ueue, ’e e tiatu i tä’u i ore i opere, ia hopoi maoti ia oe i tä’u moni i te fare moni e ti’a ai. ’E, i tö’u hoiraa mai, ua noaa faahou mai ïa ia’u tä’u moni ’e te api atoa hoi. Teienei, a rave mai i täna taleni, a horoa atu ai na te taata auahuru äna taleni. No te mea, e taoa täna ra, e horoahia mai ä täna e ia rahi ; aita äna ra, e rave-’ë-hia täna. Area te tavini faufaa ore nei, a huri atu ïa i te pouri i vaho ra ; ei reira te oto ’e te ’au’auraa niho”

- Haapopou tatou i te Parau a te Atua.