Dom 5 no Pakate - A

DOMINIKA 5 i te tau PAKATE

TAIORAA MATAMUA

E ua maihiti atura e toohitu tau taata roo maitai ’e te ï i te Varua-Maitai

A taio tatou i te Ohipa a te mau Apotoro 6, 1-7

I taua mau mahana ra, haere atura te mau pipi i te rahiraa, ’e ua haamata ihora te mau Heleni i te amuamu i te mau Hebrea i te mea e, aita to ratou mau ’ivi vahine ehaapao-maitai-hia i te mau opereraa mäa e tupu i te mau mahana atoa. Ua haaputuputu maira te tino ahuru ma piti i te taatoaraa o te mau pipi, ’e ua parau atura «E ere i te mea ti’a ia haapae matou i te parau a te Atua, a raverave ai i te mau amuraa mäa. No reira, e te mau taeae, a imi na outou i roto ia outou iho i e toohitu tau taata roo maitai ’e te ï i te Varua-Maitai ’e te paari, ’e na matou e faatoroa ia ratou, ia haapao ratou i taua ohipa nei. Area matou nei, e tamau ä matou i te haapao i te pure ’e te taviniraa hoi i te parau. » Mauruuru atura te taata atoa i roto i te apooraa i taua parau ra, ’e ua maihiti atura o Setephano, e taata ï i te Varua-Maitai ’e i te faaroo, o Philipa, o Porohoro, o Nikanora, o Timona, o Paremona ’e o Nikola, e peroseluto ïa na Anetiohia. Ua arataihia maira ratou i mua i te aro o te mau apotoro, ’e, a pure noa ai te mau apotoro, ua tuu ihora ratou i to ratou rima i nia iho ia ratou. Parare atura te parau a te Atua, ’e rahi roa atura te mau pipi i Ierusalema. ’E e rave rahi te mau tahu’a i auraro i te faaroo.

- O te Parau ïa a te Atua.

SALAMO 32, 1-2, 4-5, 18-19

R/ Ei i nia ia matou to oe here, e te Fatu e,
mai ia matou i tiaturi ia oe na.

e aore râ : Alleluia !

A umere i te oaoa i te Fatu, outou e te feia parautia e ;
e au hoi te arueraa na te feia mafatu parautia ;
e haamaitai outou i te Fatu i te kitara,
a faatai atu i te haamaitairaa iana i te nabala aho ahuru ra.

Ua tia hoi te parau a te Fatu,
e e parau mau anae ta’na mau ohipa atoa ra.
Te here nei oia i te parau-tia e te parau-au,
ua i hoi te ao atoa nei i te here a te Fatu.

Inaha, tei nia te mata o te Atua i te feia e mataû iana ra,
e i nia i te feia e tiaturi i tona ra aroha,
ei faaora i to ratou varua i te pohe,
e ei faaamu ia ratou i te tau oê ra.

TAIORAA PITI

« O outou, e u’i maitihïa ïa, e autahu’a arii »

A taio tatou i te epitore matamua a Petero peata 2, 4-9

E au mau here e, a haere outou iana ra, i te ofai ora i haapaehia e te taata, i maitihia rä e te Atua, mai te ofai faufaa rahi. E riro atoa ïa outou ei ofai ora, ’e e patuhia outou ei fare varua, e faatiahia ei autahu’a mo’a, no te püpü atu, na roto ia Iesu-Kirito, i te tutia varua auhia e te Atua ra. Tei roto hoi i te parau i papaihia ra teie ma’a parau rii : Inaha te haamau nei au i Siona i te hoe ofai tihi, e ofai maitihia ’e te faufaa rahi ; o te tiaturi i taua ofai ra, e ore ïa e haama i täna tiaturiraa. No reira, ei ia outou na te tura, e te feia faaroo e ; area no te feia faaroo ore ra, te ofai i haapaehia e te feia patu, ua riro ïa ei ofai tiavä, ’e ua riro atoa ei ofai turoriraa, ei papa e hi’a ai ratou. E turori ratou i taua ofai ra i te mea e, aita ratou e faaroo ra i te parau ; ua haapaohia ratou no taua hopea ra. Area outou, e u’i maitihïa ïa, e autahu’a arii, e nunaa mo’a, e feia i hoohia e te Atua ’e i faataahia no te faaite hua i te mau ohipa faahiahia nana ra, na tei nomino mai ia outou i roto i te pouri ra, ia haere outou i töna maramarama umerehia.

- O te Parau ïa a te Atua.

ALLELUIA

Alleluia. Alleluia.
O vau te ea, te parau mau ’e te ora,    
Ioa 14, 6
te na ô maira te Fatu.
Aore e taata e tae i te Matua, maori ra na roto ia’u.
Alleluia.

EVANELIA

« O vau te ea, te parau mau ’e te ora »

Evanelia o Iesu-Kirito a Ioane peata 14, 1-12

I taua anotau ra, ua parau atura Iesu i tāna mau pipi : « Eiaha to outou mafatu ia horuhoru. A faaroo i te Atua, a faaroo atoa ùai ia’u. E rave rahi te parahiraa i roto i te fare o te Metua ; ahiri aita ra, ua parau atu ïa vau ia outou. Te haere nei au e faanehenehe i te hoe vahi no outou. Ua reva anae vau, ’e ua oti anae taua vahi ra i te faanehenehehia no outou e hoi faahou mai au, rave au ia outou i pihai iaho ia’u, ia parahi atoa outou i te vahi tei reira vau. Ua ite outou i te vahi e haerehia nei e au, ’e ua ite atoa outou i te ea.» Ua parau mira Toma iana : «E te Fatu, aita matou i ite i tena vahi ta oe e haere na, e aha hoi matou e ite ai i te ea ? » Ua parau atura Iesu iana : «O vau te ea, te parau mau ’e te ora. Aore e taata e tae i te Metua, maori ra na roto ia’u. Ahiri outou i ite mai ia’u, ua ite atoa ïa outou i ta’u Metua, ’e i teienei, ua ite outou iana ’e ua hio outou iana. » Ua parau maira Philipa : «E te Fatu, a faaite mai na i te Metua, atira atu ai. » Ua parau atura Iesu iana : «E tau maoro tö’u parahiraa ’e outou na, ’e aita ä oe i ite mai ia’u, e Philipa e ? O tei hio mai ia’u, ua hio ïa i te Metua. Aita anei oe e faaroo na e : tei roto vau i te Metua ’e tei roto hoi te Metua ia’u ? Te mau parau tä’u e parau ati ia outou, e ere ïa i tä’u iho, na te Metua rä, o tei parahi i roto ia’u, nana e rave i täna iho mau ohipa. A faaroo mai na : tei roto vau i te Metua ’e tei roto hoi te Metua ia’u. ’E, ia ore outou e faaroo noa i te reira, a faaroo ïa no te mau ohipa. Amene, amene, te parau atu nei au ia outou : o te faaroo mai ia’u, e rave atoa oia i te mau ohipa tä’u e rave nei, ’e e ohipa rahi a’e i teie täna e rave, no te mea te haere nei au i te Metua ra.»

- Haapopou tatou i te Parau a te Atua.