Dom 7 no Pakate - A

DOMINIKA 7 i te tau PAKATE

TAIORAA MATAMUA

« Tamau maite atura ratou atoa i te pure »

A taio tatou i te Ohipa a te mau Apotoro 1, 12-14

Ua hoi maira ratou i Jérusalema mai te mou’a i parauhia ra e ,o Oliveta, a au te atea o taua vahi ra i te haerea e faatiahia i te sabati. ’E, i to ratou tomoraa i roto i te oire, ua haere atura ratou i te piha i te tahua i nia, ta ratou i mätau i te putuputu i reira. O petero ia ’e o Ioane, o Iakobo ’e o Anederea o Philipa ’e o Toma, o Baretolomeo ’e o Mataio, o Iakobo a Alephaio ’e o Simona Zelota ’e o Iuda a Iakobo. Tamau maite atura ratou atoa i te pure ma te aau hoe ’e te tahi mau vahine ’e o Maria te metua vahine o Iesu ’e töna atoa ra mau taeae.

- O te Parau ïa a te Atua.

SALAMO 26, 1, 4, 7-8

R/ Oia mau te faaroo nei au e, e ite â vau i te mau hamani-maitai
e te Fatu i nia i te fenua o te feia ora.

e aore râ : Alleluia !

O te Fatu to’u maramarama e to’u ora
o vai atura ta’u e matau ?
O te Fatu te tiai o to’u nei oraraa,
e matau atu hoi au ia vai ra ?

Hoe mea ta’u i ani i te Fatu,
e o ta’u ia e titau onoono noa nei,
maori ra ia parahi â vau i roto i te fare o te Fatu
e hope roa’e to’u nei pue mahana,
ia ite noa â vau i te maru a te Fatu,
e ia paimi â vau i tona aorai.

A faaroo mai, e te Fatu e, i ta’u reo ia tiaoro atu vau,
a aroha mai,e a pahono mai ia’u ;
No oe hoi i parau ai to’u mafatu e :
« A imi ïa i tona mata. »

TAIORAA PITI

« Ia faainohia outou no te i’oa o Iesu, e ao ïa to outou »

A taio tatou i te epitore matamua a Petero peata 4, 13-16

E au mau here e, e oaoa rä, i te mea e, te apiti na outou i te mau pohe o te Kirito, ia hiamateoa ’e ia popou outou i te mahana e faaitehia ai töna hanahana. Ia faainohia outou no te i’oa o Iesu, e ao ïa to outou, no te mea tei nia ïa ia outou te Varua hanahana, te Varua o te Atua. Eiaha roa ei taata, i roto ia outou, ia pohe i te mea e, ua taparahi oia i te taata,ua eia, ua rave i te ohipa ino, ’e aore rä uahaapao oia i ta vetahi ’e ra ohipa. Ia pohe rä te tahi i te mea e, e kiritiano oia, Eiaha oia ia haama noa a’e, ia faahanahana rä oia i te Atua no taua i’oa kiritiano ra.

- O te Parau ïa a te Atua.

ALLELUIA

Alleluia. Alleluia.
E ore au e vaiiho otare noa ia outou,  
cf. Ioa 14, 18 ; 16, 22
te na ô maira te Fatu,
e ite faahou rā vai ia outou, ’e e oaoa to outou mafatu.
Alleluia.

EVANELIA

« E te Metua, a faahanahana mai i tö Tamaiti »

Evanelia o Iesu-Kirito a Ioane peata 17, 1b-11a

I taua anotau ra, ua nänä tana mata Iesu i te ra’i, ’e ua na ö atura oia : « E te Metua,ua tae i te hora, a faahanahana mai i tö Tamaiti, ia faahanahana atoa atu te Tamaiti ia oe na, ’e ia horoa oia i te ora mure ore i te taata atoa ta oe i horoa mai tona, mai te au i te mana i nia i te mau tino atoa, ta oe i püpü mai iana ra. ’E teie hoi te ora mure ore : ia ite ratou ia oe, i te Atua mau hoe roa ra, ’e iana hoi ta oe i tono mai ra, o Iesu-Kirito. Ua faahanahana vau ia oe i te fenua nei, o vau i rave faahope roa i te ohipa ta oe i tuu mai na’u e rave. ’E, i teienei, a faahanahana mai oe ia’u, e te Metua e, i pihai iho ia oe na. Hö mai i te hanahana i hanahana ai au i pihai iho ia oe hou teie nei ao a haamata ai. Ua faaite au i to oe i’oa i te mau taata ta oe i horoa mai no’u. No oe ratou, ’e ua horoa mai oe ia ratou no’u, ’e ua tapea ratou i ta oe parau. ’E te mau mea atoa ta oe i horoa mai ra, ua ite ratou i teienei e, no ö mai ïa ia oe na. No te mea, te mau parau ta oe i horoa mai ra, ua horoa ïa vau ia ratou, ’e ua faarii mai ratou, ’e ua ite papu ratou e, no ö mai au ia oe, ’e na oe au i tono mai. Te pure nei au no ratou, aita vau e pure nei no te ao nei, no ratou rä ta oe i horoa mai no’u, no oe hoi ratou. ’E tä’u atoa ra, na oe ïa ; ’e ta oe atoa ra na’u ïa. ’E ua faahanahanahia vau i roto ia ratou. Aita nei au i teie nei ao, tei te ao nei rä ratou, ’e te haere atu nei au ia oe. » 

- Haapopou tatou i te Parau a te Atua.