Dom 2 Avenete - A

DOMINIKA 2 i te tau AVENETE

TAIORAA MATAMUA

« E haava oia mai tei au i te feia veve ma te parautia »

A taio tatou i te puta a Isaia peropheta 11, 1-10

I taua mahana ra, e tupu te hoe ohi no roto i te tumu o Iese, e e uaa te hoe tiare no roto mai i tona tumu. E faaea te varua o te Fatu i nia iana, te varua o te paari e no te apoo, te varua faaaô e no te puai, te varua no te ite e no te paieti. E e faaî iana te varua o te mataû i te Fatu. Eita oia e haava mai tei au i te hio o te mata, eita’toa e faahapa mai tei au i te faaroo taria : Area e haava oia i te feia veve ma te parautia, e tuu hoi oia i tana parau au i te feia mamahu i te fenua nei, e e tairi oia i te fenua i te tairi o tona vaha, e e taparahi oia i te paieti ore i te aho o tona ra pue utu. E o te parautia, o te tatua ïa o tona tauupu, e o te faaroo ra o te ruuruu ïa no tona opu. E parahi apipiti te luko e te arenio, e e taoto apipiti te nemera e te pinia puaaniho ; e te fanaua puaatoro, e te liona, e te mamoe e faaea ïa i te vahi hoe, e na te tamarii nainai e aratai i te reira. Te puaatoro api e te daba hoe â ïa amuraa, e hoe â faaearaa ta to raua mau fanaua ; e te liona e amu ïa i te aihere mai te puaatoro. E hauti te tamarii aruaru i te apoo o te asepi, e te tamarii no mairi te û, e tuu ïa i tana rima i te ana o te regulo ra. E ore roa e rave ino ratou, e e ore e taparahi i to’u atoa nei moua moâ ; ua î hoi te fenua i te ite i te Fatu, mai te moana ra i î i te mau pape. I te reira mahana, e itea mai ai te ohi no Iese i te tiaraa i nia, ei reva no te mau nunaa, e taû atu te mau nunaa iana ra, e e hanahana tona menema.

- O te Parau ïa a te Atua.

SALAMO 71, 1-2, 7-8, 12-13, 17

R/ I tona anotau e tupu te parautia,
e rahi te hau e tae noa’tu i te hopea o te mau avae.

E te Atua e, a horoa i ta oe parau au na te arii,
e na te tamaiti a te arii i ta oe parautia.
Ia haava oia i to nunaa na roto i te parautia,
ia au tona haavaraa i to mau taata rii.

I tona anotau e tupu te parautia,
e rahi te hau e tae noa’tu i te hopea o te mau avae.
E arii oia mai tera miti e tae roa’tu i te tahi,
mai te anavai rahi e tae roa’tu i te hopea o te fenua nei.

E faaora oia i te taata o tei tiaoro mai
e te taata rii o tei faaea tauturu ore noa.
E aroha oia i te taata paruparu e te taata veve,
e faaora oia i to te taata veve varua.

Ia haamaitai hia tona i’oa e a muri noa’tu,
ia vai â i raro ae i te mahana.
E haamaitai hia i roto ia’na iho te mau nunaa’toa no te fenua nei,
ia haamaitai te mau etene ia’na.

TAIORAA PITI

E faaora te Kirito i te mau taata atoa

A taio tatou i te epitore a Paulo peata i to Roma 15, 4-9

E au mau taeae e, te mau parau atoa i papaihia i mutaa iho ra, ua papaihia ïa ei haapiiraa na tatou, ia noaa ia tatou te tiaturiraa na roto i te aho nui ’e te tamahanahanaraa ta te papairaa mo’a e faatupu i roto ia tatou. ’E te Atua no ō mai iana ra te faaoroma’i ’e te tamahanahanaraa, ia horoa mai ïa ia outou i te auhoeraa o te manao, o te hinaaro hoi ïa o te Kirito, ia haamaitai outou i te Atua, te Metua o to tatou Fatu o Iesu-Kirito ma te mafatu hoe ’e te reo hoe. ’E teienei, a faarii outou ia outou iho, mai te Kirito i faarii ia outou no te hanahana o te Atua. Teie hoi tā’u parau : ua riro Iesu ei tavini no te feia peritomehia, no te mea e parau mau ta te Atua, ’e ua faatupu oia i te mau parau i fafauhia i te feia metua ra. Area te mau etene ra, e haamaitai ïa ratou i te Atua no tōna aroha, mai tei papaihia ra : No reira vau e haamaitai ai ia oe i roto i te mau nunaa etene ’e e himene ai i to oe ra i’oa.

- O te Parau ïa a te Atua.

ALLELUIA

Alleluia. Alleluia.
A faaineine i te ea no te Fatu,  
cf. Luk 3, 4.6
afaaafaro i tona ra mau haerea :
e ite te mau tino atoa i te ora a te Atua.
Alleluia.

EVANELIA

« A tatarahapa, ua fatata mai nei hoi te Basileia o te ra’i »

Evanelia o Iesu-Kirito a Mataio peata 3, 1-12

I te mau mahana ra, ti’a maira Ioane-Papetito i te medebara i Iudea ra, i te poro haereraa : « A tatarahapa, ua fatata mai nei hoi te Basileia o te ra’i. » O Ioane tei parauhia e te peropheta ra e Isaia, iana i parau e : « E reo no te hoe i te tiaororaa i te medebara ra : a haamaitai i te ea o te Fatu,    a faatitiaifaro i tōna mau ara ». E ahu huruhuru kamela to Ioane ’e e tatuahia tōna tau’upu i te tatua iri puaa. E akaride tāna māa ’e te meli no te fenua aihere. Haere paatoa maira iana ra to Ierusalema ’e to Iudea taatoa ’e to te fenua i te pae Ioridana ra. ’E ua papetitohia ihora e ana i roto i te anavai ra o Ioridana ma te fā’i i ta ratou hara. ’E, ite a’era oia e, e rave rahi te pharisea ’e te sadukea e haere mai ra ia papetitohia, ua parau atura oia ia ratou : « E teie nei mau fanaua ehidena e ! Na vai outou i haapii mai i te ravea e ora ai outou i te riri e fatata mai nei ? A faahotu na i te māa e itehia ai to outou tatarahapa. Eiaha rā outou e parau i roto ia outou iho : “O Aberahama to outou metua !”. Te parau atu nei hoi au ia outou e : e ti’a i te Atua ia faatupu i te tamarii na Aberahama no roto mai i teie nei mau ofai. Ua ineine ’ē na te opahi no te tāpū i te tumu raau i nia rii noa a’e i te a’a. O te mau tumu raau atoa aore i hotu mai i te māa maitai, e tāpūhia ïa ’e e hurihia i roto i te auahi. Te papetito nei au ia outou i te pape, no te tatarahapa. Area oia o te haere mai i muri mai ia’u, e mana rahi tōna i tō’u ; eita vau e au i te iriti i tōna tāma’a ; e papetito oia ia outou i te Varua-Maitai ’e te auahi. Tei tōna rima tāna petou, e tamā oia i tāna papa’ira’a sitona, ’e e haaputu oia i tāna sitona i roto i te vairaa sitona ; area te ota ra, e tutu’i ïa oia i roto i te auahi pohe ore. »

- Haapopou tatou i te Parau a te Atua.