Dom 1 i te tau 40raa - A

DOMINIKA 1 i te tau MAHA AHURURAA

TAIORAA MATAMUA

Te faatumuraahia o te ao nei e te hara a na metua matamua no tatou

A taio tatou i te puta Genese 2, 7-9 ; 3, 1-7a

I to te Fatu Atua faatumuraa i te ra’i e te fenua nei, ua hamani ihora te Fatu ra te Atua i te taata i te repo fenua, haapuai atura i te aho ora i nia i tona ra mata, riro aera te taata ei taata ora. Oa ô ihora te Fatu ra te Atua i te hoe ô i Edene i te matamua ra, tuu hia’tura te taata tana i hamani i reira ra. Ua faatupu te Fatu ra te Atua no roto i te repo i te mau raau atoa e au maitai ia hio e te au roa hoi ia amu ; e te raau hoi o te ora i ropu i taua ô ra, e te raau e itea hia’i te maitai e te ino. E paari rahi ae to te ophi i to te mau puaa’toa o te fenua nei ta te Fatu ra ta te Atua i hamani, e ua parau maira oia i te vahine : « E aha ïa te Atua i faaue atu ai ia orua e : "Eiaha a amu i to te raau atoa o te ô nei ?" » Pahono maira te vahine iana e : « Te amu nei maua i to te mau raau o te ô nei : Area rà to te raau i ropu i te ô nei,      na te Atua i faaue mai ia maua nei e, eiaha hoi e rave noa’e i te reira, peneiae o te pohe roa maua. Ua naô aera te ophi i te vahine : « E ore roa orua e pohe. Ua ite hoi te Atua e, i te mahana iho e amu ai orua i to reira, e araara ïa to orua mata, e e riro orua mai te Atua te huru, te ite i te maitai e te ino. » Ite area te vahine e e mea maitai to taua raau ra ia amu hia, e te nehenehe i te mata, e te au maitai ia hio atu, rave ihora oia i te maa no nia iho i te reira, a amu aera, e horoa’tura i tana ra tane, amu ihora oia. Araara aera to raua ra mata : e ite aera raua e, te vai tahaa noa ra raua.

- O te Parau ïa a te Atua.

SALAMO 50, 3-4, 5-6ab, 12-13, 14.17

R/ Aroha mai ia matou, e te Fatu e, ua hara ho’i matou !

Aroha mai oe ia’u, e te Atua e, mai te au i te rahi o to oe na hamanimaitai,
e mai te au i te rahi o to oe na here, a parai atu i to’u nei hara,
e horoi hua mai â oe ia’u i te mau ino atoa ra,
e tamâ hua mai ia’u ta’u nei hara.

Te ite nei hoi au i ta’u nei hara,
te vai noa nei hoi ta’u nei hara i mua ia’u ma te tuutuu-ore ;
ua hara vau ia oe, e ia oe anae ra,
e te mau ohipa ino i to oe na mata, ua rave ïa vau !

E te Atua e, a poiete na oe i te mafatu mâ i roto ia’u nei,
e e faaapi mai i te manao paari i roto i to’u nei ouma ;
Eiaha e faarue atu ia’u nei mai mua mai i to aro ra ;
e eiaha e rave è atu i to varua maitai ia’u nei.

E faahoi mai oe i te oâoâ o te ora na oe ra.
E e haamau i roto ia’u nei i te varua haapuai ;
E te Fatu e, e vevete oe i to’u pue utu,
e na to’u vaha e poro haere atu i te arueraa na oe ra.

TAIORAA PITI

« I te vahi i rahi ai te hara, ua rahi roa atura te karatia »

A taio tatou i te epitore piti a Paulo peata i to Roma 5, 12-19

Taioraa taatoa

E au mau taeae e, no te taata hoe roa i tomo mai ai te hara i te ao nei, ’e na te hara i faatomo mai i te pohe, ’e ua taea-atoa-hia te taata atoa i te pohe, no te mea ua hara paatoa ratou. I vai na te hara  i te ao nei hou te ture a horohia mai ai, aita rā te Atua i haapao i te reira ei hara, no te mea aita te ture e vai ra. Ia mana noa rā te pohe mai ia Adamu mai ā e tae roa a’era ia Mose, i nia atoa ia ratou i tei ore i rave i te hara, mai te hara a Adamu ra. E taipe Adamu nona, no te tae mai ra. E mea ’ē rā te huru o te hara’e e mea ’ē te huru o te ō : e rave rahi te taata i pohe no te hara a te taata hoe ra, e rahi roa atu rā te aroha o te Atua’e te ō hoi e horohia i te taata e rave rahi, no te karatia i roaa mai i te taata hoe ra, ia Iesu-Kirito. E mea ’ē atoa te hopea o te hara ’e e mea ’ē te hopea o te ō : i muri a’e i te hara hoe ra, ua tupu te haavaraa ’e te faahaparaa, te hopea rā o te karatia o te faariroraa ïa i na taata e rave rahi i faahapahia ra ei taata parautia. No te hara a te taata hoe ra, no taua taata hoe roa ra i mana ai te pohe, e rahi roa atu rā te mana o te feia e faataoahia nei i te karatia ’e te ō’e te parautia, ia hau ratou i roto i te ora i roaa mai no te taata hoe ra, no Iesu-Kirito. No reira, mai te hara a te taata hoe roa ra i riro ei faahaparaa i te taata atoa, oia atoa te parautia a te taata hoe roa ra, ua faatupu ïa i te faatiaraahia o te taata atoa, ia roaa ia tatou te ora. Mai te auraro ore o te taata hoe ra i faariro i te taata e rave rahi ei feia hara, oia atoa te auraro o te taata hoe ra, ua faariro i te taata e rave rahi ei feia parautia.

- O te Parau ïa a te Atua.

E aore râ, taioraa haapotohia :

« I te vahi i rahi ai te hara, ua rahi roa atura te karatia »

A taio tatou i te epitore a Paulo peata i to Roma 5, 12.17-19

E au mau taeae e, no te taata hoe roa i tomo mai ai te hara i te ao nei, ’e na te hara i faatomo mai i te pohe, ’e ua taea-atoa-hia te taata atoa i te pohe, no te mea ua hara paatoa ratou. No te hara a te taata hoe ra, no taua taata hoe roa ra      i mana ai te pohe, e rahi roa atu rā te mana o te feia e faataoahia nei i te karatia ’e te ō’e te parautia, ia hau ratou i roto i te ora i roaa mai no te taata hoe ra, no Iesu-Kirito. No reira, mai te hara a te taata hoe roa ra i riro ei faahaparaa i te taata atoa, oia atoa te parautia a te taata hoe roa ra, ua faatupu ïa i te faatiaraahia o te taata atoa, ia roaa ia tatou te ora. Mai te auraro ore o te taata hoe ra i faariro i te taata e rave rahi ei feia hara, oia atoa te auraro o te taata hoe ra, ua faariro i te taata e rave rahi ei feia parautia.

- O te Parau ïa a te Atua.

IRAVA I MUA I TE EVANELIA                                                                

Ta oe Parau, e te Fatu e, e Parau mau ia,
e ta oe na ture e faaoraraa ia.
E ore te taata e ora i te faraoa anae ra,              
Mat 4, 4b
te mau parau atoa râ no ò mai i te vaha o te Atua.
Ta oe Parau, e te Fatu e, e Parau mau ia,
e ta oe na ture e faaoraraa ia.

EVANELIA

Neseteia ihora Iesu e maha ahuru mahana, e muri roa a’era ua faahemahia oia

Evanelia o Iesu-Kirito a Mataio peata 4, 1-11

I taua anotau ra, ’e ua arataihia atura Iesu e te Varua-Maitai i te medebara, ia faahemahia oia e te diabolo. Ua neseteia ihora oia e maha ahuru ao ’e e maha ahuru ru’i, e muri roa a’era, poia ihora oia. Ua haere maira te faahema, na ō maira iana : « E tamaiti oe na te Atua ra, a faaue atu i teie nei mau ofai ia riro ei faraoa. » Ua pahono maira Iesu iana : « Ua papaihia : E ore te taata e ora i te faraoa anae ra, i te mau parau atoa rā no ō mai i te vaha o te Atua. » Afai atura te diabolo iana i roto i te oire mo’a ra, ’e tuu atura iana i te vahi teitei roa a’e o te hiero. ’E ua na ō maira iana : « E tamaiti oe na te Atua ra, a haamairi ia oe iho i raro ;  ua papaihia hoi : ‘E faaue oia i tāna mau melahi, ’e na to ratou rima e mau ia oe, ’o te ti’a’ia noa atu tō avae i te ofai. » Ua parau atura Iesu iana : « Ua papai-atoa-hia : Eiaha oe ’e ’a’a atu i te Fatu ra tō Atua. » Rave faahou atura te diabolo iana’e afai atura i nia i te hoe mou’a teitei roa, ’e ua faaite maira iana i te mau basileia atoa o te fenua nei ’e to ratou ra hinuhinu. ’E ua parau maira : « E horoa vau no oe i teie atoa mau mea, ia tahopu oe i raro i tō’u pae avae, a haamori mai ai ia’u. » Ua parau atura Iesu iana : « A haere ’ē atu oe, e Satane ! Ua papaihia hoi : E haamori oe i te Fatu ra i tō Atua, ’e o oia anae ta oe e tavini. » Faarue maira te diabolo iana, ’e inaha, e melahi tei haere mai, ’e ua aupuru maira iana.

- Haapopou tatou i te Parau a te Atua.