29 no Setepa - Mihaela, Raphaela e Gaberiela Peata

29 no SETEPA

MIHAELA PEATA, RAPHAELA PEATA, GABERIELA PEATA,
e arii-melahi

Oro’a

TAIORAA MATAMUA

E tia ia maite hoe taioraa i roto i na taioraa e piti i raro nei :

1. « Te tauatiniraa taata tei tavini iana »

A taio tatou i te puta a Daniela peropheta 7, 9-10.13-14

Ua ite au i ta’u orama i te ru’i, o vau nei, o Daniela, te hio noa ra vau, a tuu hia’i te mau terono, e ua parahi tei Tahito te mau mahana ; ua teatea tona ahu mai te hiona, e te rouru o tana upoo mai te huruhuru mamoe ra i te uouo ; e auahi ura tona terono, e tona mau huira e auahi ama ïa. Mai mua mai i tona aro te tahe puai maira te hoe anavai auahi ; tauatini i te tauatiniraa merahi tei tavini iana, e ahuru tauatini i te hanere tauatiniraa tei tia i mua i tona ra aro ; ua rave hia te haavaraa, e ua iriti hia te mau puka. Te hio noa ra vau i te orama o te po, e inaha, te hoe mai te tamaiti a te taata i te haereraa mai na nia i te mau ata o te rai E ua horoa oia iana e tae roa’tu iô tei Tahito te mau mahana, e ua tuu ratou iana i mua i tona raro. i te mana, e te tura, e te hau, e e tavini iana te mau nunaa’toa, te mau opu, e te mau reo ; tona mana, e mana mure ore ïa te ore e afai è hia, e tona basileia e ore ïa e mou.

- O te Parau ïa a te Atua.

E aore râ :

2. « ua ’aro atura Mihaera ’e tāna ra mau melahi i te teni »

A taio tatou i te Apokalupo a Ioane peata 12, 7-12a

Tupu a’era te tama’i i nia i te ra’i : ua ’aro atura Mihaera ’e tāna ra mau melahi i te teni, ’e ua ’aro maira te teni ’e tāna mau melahi. Aita rā te rē i riro iana, ’e aita ratou i faatiahia e parahi faahou i nia i te ra’i. ’E ua tīria maira i raro te teni rahi ra, te ophi tahito, o tei parauhia e, o te diabolo ’e o Satane hoi, te faahema i to te ao atoa nei. Ua tīria maira oia i nia i te fenua nei ’e tāna mau melahi atoa ra. ’E ua faaroo atura vau i te reo rahi i nia i te ra’i, i te na ōraa e : « Teie mai nei te ora a to tatou Atua ’e tōna mana ’e tōna ra hau ’e te mana hoi o tāna Kirito. Ua oti hoi Satane, oia te faahapa i to tatou mau taeae, i te tīria i raro, oia i pari haere noa ia ratou i te pō ’e te ao, Area ratou, ua upootia ïa iana i te toto o te Arenio ’e i te mana hoi o te parau nona ratou te mau ite. Aita hoi ratou i nounou i to ratou iho ora, ’e aita ratou i mata’u i te pohe. No reira, a oaoa, e te mau ra’i e, ’e outou atoa hoi o tei parahi i reira.

- O te Parau ïa a te Atua.

SALAMO 137, 1-2a, 2bc-3, 4-5

R/ Te himene nei au ia oe, e te Fatu e,
i mua i te aro o te mau merahi ra.

Te haamaitai atu nei au ia oe, e te Fatu e, ma to’u mafatu atoa nei ;
ua faaroo oe i te mau parau a to’u nei vaha.
Te himene nei au ia oe ; i mua i te aro o te mau merahi ra,
te tipapa nei aü ma te hio i to oe nao mo’â ra.

Te haamaitai atu nei au i to oe na io’a, no to oe na aroha e ta oe na parau mau ;
ua hau atu â ta oe parau fafau i to oe iho na roo maitai ;
i te mahana i tiaoro atu ai au ia oe ra, ua faaroo mai oe ia’u ;
ua faarahi mai oe i te itoito i roto i to’u nei varua.

Te haamaitai nei ratou ia oe, e te Fatu e, o ratou te mau arii atoa no te fenua nei,
ua ite hoi ratou i te mau parau fafau no roto mai i to oe vaha ;
te faateitei nei ratou i te mau haerea o te Fatu ;
e hanahana rahi hoi to te Fatu.

ALLELUIA

Alleluia. Alleluia.
Outou, e te mau merahi a te Fatu e, a haamaitai i te Fatu :
a arue e a faateitei roa iana e a muri noa'tu !
Alleluia.

EVANELIA

« Teie outou a ite i te mau melahi a te Atua i te ’a’eraa i nia ’e i te pouraa mai i raro i nia a’e i te Tamaiti a te taata nei »

Evanelia o Iesu-Kirito a Ioane peata 1, 47-51

I taua anotau ra, hio atura Iesu ia Natanaela i te haereraa mai iana ra, ’e ua parau a’era nona : « Teie te hoe Ati-Iseraela mau, e taata haavare ore. » Ua parau maira Natanaela : « I hea oe i ite mai ai ia’u ? » Ua parau atura Iesu : « Hou Philipa a parau atu ai ia oe, a parahi noa ai oe i raro a’e i te tumu suke, ua ite au ia oe. » Ua pahono maira Natanaela : « E Rabi, o te Tamaiti oe a te Atua, o te arii oe o Iseraela. » Ua parau atura Iesu : « I te mea e, ua parau atu vau ia oe : ua ite au ia oe i raro a’e i te tumu suke i faaroo ai oe ! E iti tena i te mau mea ta oe e ite atu ā. » ’E ua parau atura oia iana : « Amene, amene, te parau atu nei au ia oe : teie outou a ite i te ra’i i te vetearaahia ’e te mau melahi a te Atua i te ’a’eraa i nia ’e i te pouraa mai i raro, i nia a’e i te Tamaiti a te taata nei. »

- Haapopou tatou i te Parau a te Atua.