1 no tenuare - MARIA PEATA, TE METUA VAHINE O TE ATUA

1 no tenuare
I TE 7 O TE MAHANA I MURI IA NOERE

MARIA PEATA, TE METUA VAHINE O TE ATUA

Oro’a hanahana

TAIORAA MATAMUA
                                                            « E tiaoro ratou i to’u ioa i nia i te mau tamarii a Iseraela, e na’u e haamaitai atu ia ratou ra »
A taio tatou i te puta Numera        6, 22-27
Ua parau maira te Fatu ia Mose, i te naôraa e : E parau atu oe ia AArona e i tana mau tamarii : naô outou i te haamaitairaa i te mau tamarii a Iseraela, e parau atu ia ratou : Ia haamaitai te Fatu ia oe e ia tiai ia oe. Ia faaite mai te Atua ia oe i tana mata, ia aroha mai ia oe. Ia fariu mai te Fatu i tana mata i nia ia oe, e ia horoa mai i te hau ia oe. E tiaoro ratou i to’u ioa i nia i te mau tamarii a Iseraela, e na’u e haamaitai atu ia ratou ra.

     - O te Parau ïa a te Atua.

SALAMO                                            66, 2-3, 5, 6.8
R/ Ia aroha mai te Atua ia matou
e ia haamaitai oia ia matou.

Ia aroha mai te atua ia matou e ia haamaitai oia ia matou,
ma tefaaanaana i tona mata i nia ia matou.
E itea ta oe mau éà e ati noa ae teie nei ao,
e te ora na oe na roto i te mau nunaa etene.

E haava hoi oe i te ao ma te parautia,
e haava oe i te etene ma te au maitai.
Na oe e haava i te mau nunaa i te ao nei.

Ia haamaitai te mau nunaa ia oe, e te atua e,
ia haamaitai ratou paatoa ia oe.
Ia haamaitai ia tatou e te Atua,
e ia matau te taata ia’na e tae noa’tu i te mau hopea atoa o te fenua nei.

TAIORAA PITI
                                                               « Ua tono maira te Atua i täna Tamaiti, o tei fanauhia e te hoe vahine »
A taio tatou i te epitore a Paulo peata i to Galatia     4, 4-7
E au mau taeae e, ’e tae roa a’enei rā i te tau mau ra, ua tono maira te Atua i tāna Tamaiti, o tei fanauhia e te hoe vahine, ’e o tei fanauhia i raro a’e i te mana o te ture, ia faaora oia i te feia i raro a’e i te mana o te ture, ’e ia riro tatou ei tamarii tavai. Ua riro mau ā outou ei tamarii : ua tono mai hoi te Atua i te Varua o tāna Tamaiti i roto i to tatou mau mafatu, ’e te tiaoro nei oia e : “Aba, e ta’u Metua” E ere atura ïa oe i te tavini, e tamaiti rā oe, ’e no te mea e tamaiti oe, e faariro atoa te Atua ia oe ei taata ’āi’a.

     - O te Parau ïa a te Atua.

ALLELUIA
Alleluia. Alleluia.
I mutaa iho ra, ua parau mai te Atua                        
cf. He 1, 1-2
i to tatou hui metua na roto i te mau peropheta ;
i teie rā mau mahana hopea nei,
ua parau mai oia ia tatou na roto i tana iho Tamaiti.

Alleluia.

EVANELIA
                                          « Ua ite ratou ia Maria ’e ia Iosepha, ’e i te aiu iti ’aru’aru. Hope a’era na mahana e va’u, ’e ua mairihia i te i’oa Iesu. »
Evanelia o Iesu-Kirito a Luka peata     2, 16-21
I teie tau ra, peepee atura ratou i te haere, ’e ua ite ratou ia Maria ’e ia Iosepha ’e i te aiu iti ’aru’aru hoi i te taoto-noa-raa i roto i te phatene. I to ratou iteraa iana, ua faatia ratou i te parau i faaitehia mai ia ratou e te melahi no taua tamaiti iti ra. E te feia atoa i faaroo ia ratou, maere anae ihora ïa i tei parauhia mai e te mau tiai mamoe. O Maria rā, tapea maite ihora oia i taua mau parau atoa ra, ma te feruri i roto i tōna mafatu. Hoi atura te mau tiai mamoe ma te faateitei i te Atua ’e te arue iana, no te mau mea ta ratou i faaroo ’e i ite ; ua au mau ā hoi i tei faaitehia mai na ia ratou. Hope a’era na mahana e va’u, ua peritomehia taua tamaiti iti ra, ’e ua mairihia i te i’oa Iesu, te i’oa iho ā ïa i topahia e te melahi hou oia a tōhia ai.

     - Haapopou tatou i te Parau a te Atua.