Dominika 17 - Tau noa B

DOMINIKA 17 - TAU NOA - B

TAIORAA MATAMUA
                                                                                      « E amu ratou, e e toe â »
A taio tatou i te puta maha no te mau Arii      4, 42-44
I taua mau mahana ra, te haere maira te hoe taata no Baala-Salisa ma te afairaa mai i te taata o te Atua i te mau pane oho matamua ; e piti ahuru faraoa kerite e te sitona api i roto i tona pute. Ua parau atura Elisaia : A horoa i te taata ia amu ratou. Pahono maira tona tavini iana : E aha teie ia tuu hia na taata e hoe hanere ? Ua parau faahou oia : A tuu noa i te taata ia amu ratou ; teie hoi ta te Fatu e parau nei : e amu ratou, e e toe â. Ua tuu atura oia i mua ia ratou ; ua amu anae ratou, e ua toe hoi mai te au i te parau a te Fatu ra.

      - O te Parau ïa a te Atua.

SALAMO                                    144, 10-11, 15-16, 17-18
R/ Te heheu nei oe to rima, e te Fatu e :
e te haamâha nei tatou.

Ia arue ta oe mau ohipa’toa ia oe, e te Fatu e,
e ia haamaitai to oe mau taua ia oe,
ia parau ratou i te hanahana o to oe ra hau,
e ia faaite ratou i to oe mana.

Te fariu nei ratou paatoa i to ratou mata ia oe, te tiaturi nei ratou ;
te horoa mai nei oe i te maâ ia ratou i te tau mau ra ;
Te heheu nei oe to rima,
e te haamâha nei i te hiaai o te mau ora atoa nei.

E parautia te Fatu i tona’toa ra mau haerea,
e te aroha i tana’toa ra mau ohipa ;
Te fatata nei te Fatu i tei tiaoro atu iana,
i te feia’toa i tei tiaoro atu iana ma te parau mau.

TAIORAA PITI
                                                                « Hoe roa tino, hoe Fatu, hoe faaroo, hoe papetitoraa »
A taio tatou i te epitore a Paulo peata i to Ephesia    4, 1b-6
E au mau taeae e, o vau nei hoi te taata tapeahia o te Fatu, ia au to outou oraraa i te nominoraa i nominohia ai outou. A faaoroma’i outou te tahi i te tahi ma te manao haehaa, ma te marū ’e te ha’amahura’a roa i roto i te here. E ara maite outou ia tapea i te autahoeraa a te Varua ma te taati ia outou i te hau. Hoe roa tino e vai nei ’e hoe hoi Varua, mai ia outou atoa na i nominohia i te tiaturiraa hoe. Hoe Fatu, hoe faaroo, hoe papetitoraa, hoe Atua, te Metua o te mau taata atoa ra, o te ti’a ra i nia i te mau taata atoa ra, o te ohipa na roto i te mau taata atoa, ’e tei roto oia ia tatou atoa nei.

      - O te Parau ïa a te Atua.

ALLELUIA
Alleluia. Alleluia.
E peropheta rahi tei ti’a mai nei i rotopu ia tatou :
’e ua haere mai te Atua i tōna nei nunaa.

Alleluia.

EVANELIA
                                               « Ua opere atura oia te mau faraoa na te feia i parahi i raro, e ravai noa atura ratou »
 A taio tatou i te Evanelia a Ioane peata    6, 1b-15
I taua anotau ra, haere atura Iesu i te tahi pae o te miti i Galilea, o tei parau-atoa-hia i te miti i Tiberia. Ua pee maira iana te hoe tiaa rahi taata, no te mea ua ite ratou i te mau tapao tāna e rave i nia i te feia ma’i. Haere atura Iesu i nia i te mou’a, ’e ua parahi ihora i raro ’e tana mau pipi atoa. Ua fatata te Pasa, te mahana oroa rahi a te Ati-Iuda ra. ’E, nānā a’era tana mata i nia, ite atura Iesu i te hoe tiaa rahi taata i te haereraa mai iana ra. Ua parau atura oia ia Philipa : « Ei hea tatou e hoo mai ai i te faraoa ia amu ratou ? » Ua na reira oia i te parau ei tamataraa ia Philipa, ua ite hoi oia e aha tāna e rave. Ua pahono maira Philipa : « E ore na denari e piti hanere e ravai ia noaa mai te faraoa e ti’a ai ia opere i te hoe ma’a tāpū nainai i te taata tataitahi. » Ua parau maira te hoe pipi nana, o Anederea, te taeae o Petero : « E pae a te hoe tamaiti nei faraoa ’e e piti i’a rii. E aha rā hoi te reira no teie nei feia rahi ! » Ua parau atura Iesu ia ratou : « A haaparahi na ia ratou. » E vahi matie roa taua vahi ra. Parahi ihora ratou. E riro e pae tauatini ratou. Rave ihora Iesu i te mau faraoa ’e, oti a’era te Atua i te haamaitaihia, ua opere atura oia na te feia i parahi i raro, ’e ua opere atoa oia i te i’a e ravai noa atura ratou. ’E, paia a’era ratou, ua parau atura Iesu i te mau pipi : « A haaputu na i te mau toea māa, eiaha te hoe vahi iti ia māu’a. » Haaputu ihora ratou i te mau toea māa e ī roa a’era na ete ahuru ma piti i te mau hu’ahu’a rii o na faraoa kerite i toe i taua mau taata i amu ra. I to ratou iteraa i te tapao i ravehia e Iesu, ua parau a’era te taata : « O oia mau te peropheta e haere mai i te ao nei. » ’E, ite a’era Iesu e, e haere mai ratou e haru iana no te faaarii iana, ua ma’ue faahou atura oia i nia i te mou’a oia anae iho.

- Haapopou tatou i te Parau a te Atua.