Dominika 2 - Tau noa B

DOMINIKA 2 - TAU NOA - B

TAIORAA MATAMUA
                                                 « A parau mai oe, e te Fatu e, te faaroo nei hoi au to tavini nei »
A taio tatou i te puta hoe o te mau Arii        3, 3b-10.19
I taua mahana mau ra, te taoto ra o Samuela i roto i te hiero o te Fatu ra, te i reira te aruna o te Atua. E ua pii maira te Fatu ia Samuela, o tei pahono mai i te naôraa e : « Teie au. » Horo ihora oia ia Heli, e ua parau atura : Inaha, teie au, ua pii hoi oe ia’u. Naô maira o Heli : Aita vau i pii, a hoi e a taoto. Haere atura oia, e ua taoto aera. E ua pii faahou te Fatu ia Samuela. Ua tia aera Samuela i nia, haere atura ia Heli ra, e ua parau atura : « Teie au, ua pii hoi oe ia’u. » Pahono maira oia : « aita hoi au i pii ia oe, e ta’u tamaiti e, a haere, e a taoto.» Aita hoi o Samuela i ite i te Fatu, aita â hoi te parau a te Fatu i faaite hia mai iana ra. Ua pii faahou maira te Fatu ia Samuela, o te toru ïa o te piiraa, tia aera oia i nia, e ua haere ia Heli ra, e ua parau atura : Teie au, ua pii hoi oe ia’u. Ite aera o Heli e, na te Fatu i pii maira i te tamaiti, e ua parau atura ia Samuela : A haere oe, e a taoto ; e ia pii faahou mai oia ia oe, e parau atu oe : A parau mai oe, e te Fatu e, te faaroo nei hoi au to tavini nei. Ua haere atura o Samuela, e ua taoto i tona ra vahi. Ua haere maira te Fatu, e ua tia noa maira, e ua pii mai tana i pii i mutaaihora : E Samuela e, e Samuela e. Ua naô atura o Samuela : A parau mai, e te Fatu e, te faaroo nei hoi to tavini nei.
Tupu aera Samuela i te rahi, e te iana te Fatu, e aore roa te hoe o tana ra mau parau i mairi noa i raro i te repo.

     - O te Parau ïa a te Atua.

SALAMO 39, 2abc.4ab, 7-8a, 8b-9,10cd.11cd
R/
Inaha, te haere mai nei au,
ia haapao a vau i ta oe mau hinaaro ra.

I tiaturi na vau i te Fatu .i te hoe tiaturiraa rahi,
e ua fariu maira ia’u.
E ua tuu mai oia i te himene api i roto i to’u vaha,
e arueraa i to tatou Atua.

Aore oe i hinaaro i te tutia ta-auahi e te pupuraa,
ua amaha mai râ to’u nei taria ia oe na ;
aore oe i titau mai i te tutia-ta-auahi, e ore atoa hoi te pupuraa,
ua parau atura vau : inaha, te haere mai nei au.

I roto i te otaro no te puta, ua faaue hia mai au e
ia haapao a vau i ta oe mau hinaaro ra.
E ta’u Atua e, ua popou roa to’u mafatu
i to oe na Ture.

Inaha, e ore roa to’u nei pue utu i mamu,
ua ite ïa oe i te reira.
Aore au i huna i ta oe here-maitai e ta oe parau-mau
i te amuiraa rahi.

TAIORAA PITI
                                                                  « E mero to outou tino no te Kirito »
A taio tatou i te epitore matamua a Paulo peata i to Korinetia    6, 13b-15a.17-20
E au mau taeae e, e ere rā te tino no te taiata, no te Fatu rā, ’e no te tino hoi te Fatu. Ua faatiafaahou te Atua i te Fatu, ’e e faatia atoa mai ia tatou i tōna iho mana. Aore anei outou i ite e, e mero to outou tino no te Kirito ? E rave anei ïa vau i te mero o te Kirito. Te taata ra e ati i te Fatu rā, hoe ā ïa varua oia ’e te Fatu atoa ra. A ma’ue ’ē atu i te taiata. Te mau hara ’e’ē atu e ravehia e te taata nei, e vai noa ïa i rapae i tōna tino. Area, te taata taiata ra, e hara ïa i tōna iho ra tino.
’E aita anei outou i ite e, o to outou tino te nao o te Varua-Maitai, o te parahi na i roto ia outou, ’e o tei horoahia mai ia outou e te Atua ra ; ’e e ere outou i to outou iho ? Ua hoohia hoi outou i te hoo. No reira, a faahanahana i te Atua i to outou na tino.

      - O te Parau ïa a te Atua.

ALLELUIA

Alleluia. Alleluia.
I roto ia Iesu Kirito, o te Metia ta tatou e fa’îhua nei :       cf. Ioa 1, 41.17
tei roto iana te karatia e te paraumau.
Alleluia.

EVANELIA
                                            « ’E iite atura i tōna nohoraa, ’e ua parahi maira raua iana ra »
 A taio tatou i te Evanelia a Ioane peata     1, 35b-42
I taua anotau ra, te ti’a noa ra Ioane i taua vahi ra ’e na pipi toopiti nana ra. ’E, te haere ra Iesu na reira iho, ua tiatonu atura Ioane iana, ’e ua parau a’era : "Inaha te Arenio a te Atua." I to raua faarooraa i taua parau ra, ua pee atura taua na pipi ra ia Iesu. Ua fariu maira Iesu i muri, ’e ua ite maira ia raua i te peeraa atu iana. Ua parau maira oia ia raua : 'E aha ta orua e hinaaro na ?" Ua pahono atura raua iana ra : "E Rabi, e ti’a oe i hea ?" Ua parau maira oia : "A haere mai, a hio." Hahaere atura raua, ’e iite atura i tōna nohoraa, ’e ua parahi maira raua iana ra i taua mahana ra. Ua huru taea hoi te ahuru o te hora. O Anederea, te taeae o Simona-Petero, te hoe o na pipi i faaroo i te parau a Ioane ’e tei pee atu ia Iesu. O tōna taeae ra o Simona te taata matamua tāna i farerei. Ua parau atura oia iana : "Ua itea ia maua te Mesia" (oia hoi te Kirito, ia iritihia). Aratai maira oia ia Iesu ra. Ua tutonu atura Iesu iana, ’e ua parau atura iana : "O Simona oe, te tamaiti a Iona, e mairihia oe ia Kepha" (oia hoi Petero).

     - Haapopou tatou i te Parau a te Atua.