Dominika 21 - Tau noa B

DOMINIKA 21 - TAU NOA - B

TAIORAA MATAMUA
                                                   « E tavini maoti tatou i te Fatu, oia iho ïa to tatou Atua »
A taio tatou i te puta no Iosua   24, 1-2a.15-17.18b
I taua mau mahana ra, haaputuputu ihora o Iosua i te mau opu atoa o Iseraela i Sikema, pii atura i te mau taata paari, te mau tavana, te mau haava e te feia toroa, e ua tia maira ratou i mua i te aro o te Fatu. Naô atura oia i te taata’toa : Mai te mea ra e te manao ra outou e, e mea ino te taviniraa i te Fatu, te ia outou te maiti : a faataa outou i teienei mahana i te i au ia outou, e ta outou e tavini atu : te mau atua anei i tavini hia e to outou ui metua i Mesopotamia, e aore ra te mau atua o te Ati-Amori, no ratou te fenua ta outou e parahi nei. O vau nei râ e to’u utuafare atoa e tavini matou i te Fatu. Ua pahono te taata’toa, naô atura : Eiaha roa matou e faarue i te Fatu, a tavini atu ai i te mau atua èè ra. O te Fatu iho, to tatou Atua, tei aratai mai ia tatou e i to tatou mau metua, mai te fenua Aiphiti mai, mai te utuafare i tîtî ai tatou ; ua rave oia i te mau tapao mana i mua i to tatou mata, ua tiai oia ia tatou i te mau êâ i haere hia e tatou nei e i te mau fenua ta tatou i haere ra. E tavini maoti tatou i te Fatu, oia iho ïa to tatou Atua.

       - O te Parau ïa a te Atua.

SALAMO                                  33, 2-3, 16-17, 20-21, 22-23
R/ A tamata na, e ia ite i te outou
mai te aha te maitai o te Fatu !

E haamaitai â vau i te Fatu i te mau tau atoa,
e vai tuutuu-ore â te arueraa iana i roto i to’u nei vaha ;
e arue atu to’u varua iana iho i roto i te Fatu,
ia faaroo mai te feia haehaa, e ia oâoâ !

Te fariu e nei te mata o te Fatu i te feia hamani-ino ra,
ei faaore roa i to ratou roo i nia i te fenua nei ;
i nia ra i te feia parautia te pue mata a te Fatu,
e e faaroo hoi tona pue taria i to ratou aueraa.

E ati huru ati to te mau taata parautia,
e faaora hia râ oia i taua mau ati atoa ra ;
na te Fatu e tiai i to ratou atoa ra mau ivi ;
e ore te hoe ae e ofati hia.

Na te ino te paieti-ore e taparahi,
e o tei riri roa mai i te feia parautia e faautua hia ïa.
E faaora te Fatu i te varua o tona mau tavini,
e e ore atoa hoi tei tiaturi iana ra e faautua hia ïa.

TAIORAA PITI
                                                                « E parau ’aro rahi teie tā’u e parau nei ia faaauhia i te Kirito ’e i te Etaretia »
A taio tatou i te epitore a Paulo peata i to Ephesia      5, 21-32
E au mau taeae e, ia auraro outou te tahi i te tahi no te mata’u i te Kirito. Ia auraro te mau vahine i ta ratou tane, mai ta ratou e auraro i te Fatu ra. O te tane hoi te upoo o te vahine, mai te Kirito atoa ra, o te upoo ïa o te Etaretia, ’e o oia te faaora i te tino. ’E, mai te Etaretia e auraro i te Kirito ra, oia atoa te mau vahine, ia auraro atoa ratou i ta ratou tane i te mau mea atoa ra. E te mau tane, a here atu i ta outou mau vahine, mai te Kirito atoa i here i te Etaretia, ’e ua pūpū iana iho nona, ia haamo’a oia iana, ’e ia tamā oia iana i te hopuraa pape ’e te parau. Ua hinaaro hoi te Kirito e tuu i te Etaretia i mua i tōna aro ei Etaretia hinuhinu ma te porao ore ’e te mi’omi’o ore ’e te mau mea atoa mai te reira te huru, ei Etaretia mo’a ’e te viivii ore. Oia toa te mau tane, ia here ratou i ta ratou vahine mai to ratou iho tino. O te here i tāna vahine, e here ïa iana iho. Aore roa hoi e taata i riri i tōna iho ra tino ; e faaamu rā tatou i to tatou tino ’e e faaherehere, mai te reira atoa te Kirito i te Etaretia nei. E ere anei tatou i te mero o tōna tino ? No reira, e faarue te taata i tana metua tane ’e i tana metua vahine, a ati atu ai i tāna ra vahine, ’e e riro raua ei tino hoe. E parau ’aro rahi teie tā’u e parau nei, ia faaauhia i te Kirito ’e i te Etaretia.

       - O te Parau ïa a te Atua.

ALLELUIA
Alleluia. Alleluia.
Te mau parau tā’u i parau atu ia outou, e te Fatu e,    cf. Ioa 6, 63c.68c
e varuïa ’e te ora.
Tei ia oe na hoi te mau parau o te ora mure ore.

Alleluia.

EVANELIA
                                            « E te Fatu, e haere ïa matou ia vai ra ? Tei ia oe na hoi te mau parau o te ora mure ore »
† A taio tatou i te Evanelia a Ioane peata       6, 60-69
I taua anotau ra, i parau na hoi Iesu i roto i te Sunato i Kaperena. I muri a’e i to ratou faarooraa i taua haapiiraa a Iesu ra, e rave rahi tana mau pipi i haamata i te parau e : « E parau riaria teie, o vai te ti’a ia faaroo atu ? » ’E ite a’era Iesu i roto iana iho e, te ohumu ra tana mau pipi i taua parau ra, ua parau atura oia ia ratou : « Ua maheaitu outou i teie nei haapiiraa ? ’E ia ite outou i te Tamaiti a te taata i te ’a’eraa i te vahi i reira oia i mutaa iho ra… ? Na te Varua te ora e horoa mai, aita o te tino nei e faufaa a’e. Te mau parau tā’u i parau ia outou, e varua ïa ’e te ora. I roto rā ia outou, te vai nei te taata e ore e faaroo nei. Ua ite hoi Iesu, mai te matamua mai ā, i te feia aore i faaroo ’e i te taata hoi e haavare iana. Ua parau atura oia : « No reira vau i parau atu ai ia outou : aore taata e ti’a i te haereraa mai ia’u nei, maori rā ia horoa mai te Metua iana i taua mana ra. Mai reira mai ā, e rave rahi te pipi nana i hoi i to ratou mau fare, ’e aita maira i pee faahou iana. Ua parau atura Iesu i te tino ahuru ma piti : « E hinaaro atoa anei outou i te haere ? » Ua pahono maira Petero : « E te Fatu, e haere ïa matou ia vai ra ? Tei ia oe na hoi te mau parau o te ora mure ore. ’E, ia matou, te faaroo nei matou ’e te ite nei matou e, o oe te mo’a a te Atua. »

- Haapopou tatou i te Parau a te Atua.