Dominika 22 - Tau noa B

DOMINIKA 22 - TAU NOA - B

TAIORAA MATAMUA
                                                                 « Eiaha outou e taati noa mai i te tahi vahi i te parau ta’u e parau atu nei ia outou … e haapao râ outou i te mau faaueraa a te Fatu ra »
A taio tatou i te puta Deuteronomi    4, 1-2.6-8
Ua parau Mose i te nunaa : E teienei, e Iseraela e, e faaroo mai i te mau ture e te mau faaueraa ta’u e haapii atu nei ia oe ; e e rave oe, ia ora oe, ia noaa te fenua ta oe e haere nei, ta te Fatu ra, te Atua o to outou mau metua, e horoa mai no outou. Eiaha outou e taati noa mai i te tahi vahi i te parau ta’u e parau atu nei ia outou, eiaha hoi e faarue i te tahi o te reira, e haapao râ outou i te mau faaueraa a te Fatu ra, a to outou Atua, ta’u e poroi atu nei ia outou na. E haapao outou e e rave mau. Teie te mea e itea hia to outou paari e to outou maramarama i mua i te aro o te mau nunaa, ia faaroo ratou i teienei mau parau atoa e ia parau e : Tirara nunaa paari e te maramarama, tirara nunaa rahi. Aore hoi e nunaa rahi i teie, aita e fatata mai to ratou mau atua ia ratou, mai to tatou Atua i fatata mai i to tatou mau tiaororaa ra. Te i hea hoi nunaa paroo i tia tona ra mau haapaoraa, i tia hoi tona mau faaueraa e tona ture taatoa, mai ta’u i tuu atu i mua i to outou mata i teienei mahana ?

      - O te Parau ïa a te Atua.

SALAMO                                       15, 2-3a, 3bc-4ab, 4d-5
R/ E te Fatu e, o vai te tomo atu i to oe ra puhapa ?

O te taata haerea mâ ïa
e tei haapao i te parautia,
o tei parau i te parau mau no roto i tona ra mafatu.
E aore e haavare i tona erero.

E aore i hamani ino i tona ra mau taeae,
aore hoi i faatupu i te haama no tona taata tupu,
o tei hio haavahavaha i tei faahapa hia ra,
e faatura râ oia i te feia i mataû i te Fatu ra.

O tei tapu atu, ino noa’i oia ihora, e aore e faahapa i tana parau,
o tei ore i tuu tarahu i tana moni ma te taime i nia ihora,
e tei ore e farii i te mau ô ei faahapa i te taata hapa-ore ra ;
o tei na reira i te rave, e aore roa ïa oia e aueue.

TAIORAA PITI
                                                       « Ei feia outou e rave mau i te parau »
A taio tatou i te epitore a Iakobo peata        1, 17-18.21b.22.27
E au mau taeae here e, te mau ō maitatai atoa, te mau taoa e hau roa atu i te maitai, e pou mai ïa no nia mai, no ō mai i te Metua o te mau tiarama o te ra’i, aore e hirohirouri, aore e ohuraa, aore e haapouriraa i roto iana ra. No tōna iho hinaaro i fanau ai oia ia tatou na roto i te parau mau, ia riro tatou mai te oho matamua o te mau mea i poietehia e ana ra. ’E e faarii ma te marū i te parau i tanuhia i roto ia outou, o te ti’a ia faaora. Ei feia outou e rave mau i te parau. Eiaha ei feia e faaroo noa i te parau ma te haavare noa ia ratou iho. Teie te paieti mā ’e te viivii ore i mua i te aro o te Atua, to tatou Metua : o te haere ïa e hio i te mau otare ’e te mau vahine ’ivi i to ratou ra ati, ’e o te paruru iana iho i te mau mea viivii o teie nei ao.

      - O te Parau ïa a te Atua.

ALLELUIA
Alleluia. Alleluia.
No tōna iho hinaaro i fanau ai oia ia tatou te Metua                    Iak 1, 18
na roto i te parau mau,
ia riro tatou mai te oho matamua o te mau mea i poietehia e ana ra.

Alleluia.

† A taio tatou i te Evanelia a Mareko peata   7, 1-8.14-15.21-23
I taua anotau ra, putuputu maira te mau pharisea ’e te tahi mau papai parau no Ierusalema mai i pihai iho ia Iesu. Ua ite a’era ratou i te tahi pae pipi nana ra i te amuraa i ta ratou faraoa ma te rima viivii, oia hoi ma te rima horoi-ore-hia. E ore hoi te mau pharisea ’e te mau Ati-Iuda e tamāa, maori ra ia oti to ratou rima i te horoi-maite-hia. No te mea, te tapea nei ratou i te mau parau i tuuhia e to tahito ra. ’E, ia hoi mai ratou mai te makete mai, e ore ratou e tamāa noa ; e na mua rā ratou i te horoi ia ratou iho. ’E e rave rahi atu ā ta ratou mau peu tuuhia mai, mai te horoiraa i te mau au’a, i te mau pita ’e te mau pani veo ra. Ua ui maira te mau pharisea ’e te mau papai parau ia Iesu : « E aha ta oe mau pipi e ore e haapao ai i te parau i tuuhia mai e to tahito ra, a rave ai i ta ratou faraoa ma te rima viivii ? » Ua pahono atura oia : « E tenā na feia faahua paieti e, ua tano roa te parau i tohuhia e Isaia no outou. Ua papaihia hoi e : te faatura nei te vaha o teie nei nunaa ia’u, area tōna mafatu, tei te atea ’ē roa ïa ia’u. E haamoriraa faufaa ore ta ratou ia’u ; te mau ture hoi ta ratou e haapii ra, na te taata anae ïa. Ua haapae outou i te ture a te Atua, ’e te haapao nei outou i tei tuuhia mai e te taata. » Ua parau faahou atura oia i te tiaa rahi taata, ia tapiri mai iana ra, ’e ua na ō atura : « A faaroo mai na, ia taa ia outou : e ore te taata e viivii i te mau mea o rapae e ō i roto iana ; o te mau mea rā no roto mai iana, o te reira ïa te haaviivii i te taata. » Inaha hoi, no roto mai i te taata, no roto mai i tōna mafatu, te manao ino, te taiata, te eia, te taparahi taata, te faaturi, te nounou taoa, te hamani ino, te haavare, te ti’a’ā, te feii, te faaino, te teoteo, te aoaoa. No roto anae mai i te taata, taua mau ohipa ra, ’e e viivii te taata i te reira. »

- Haapopou tatou i te Parau a te Atua.