Dominika 23 - Tau noa B

DOMINIKA 23 - TAU NOA - B

TAIORAA MATAMUA
                                        « I reira e amaha te taria o te feia turi e e matara te arero o te vava ra »
A taio tatou i te puta a Isaia peropheta    35, 4-7a
E parau outou i tei taia e : Ia itoito outou, eiaha e mataû ; inaha hoi to outou Atua, te tahoo maira ïa, ma te faahoiraa i te ino ; te Atua iho te haere hua mai e faaora ia outou. I reira e faaaraara hia’i te mata o te matapo, e amaha te taria o te feia turi. I reira e oua noa’i te pirioi mai te aili, e e matara te arero o te vava ra, no te mea i pihaa mai te pape na te medebara, e te pape tahe i te fenua marô. E riro te fenua papamarô ei pape hopuna, e te repo marô ra ei pape pihaa.

      - O te Parau ïa a te Atua.

SALAMO                              145, 6c-7, 8-9a, 9bc-10
R/ E hinaaro vau e haamaitai i te Fatu
e hope roa ae to’u oraraa.

E aore râ : Alleluia !

Na’na te parau tia e a muri noa’tu,
na’na e faatiama mai i tei hamani ino hia,
nana e horoa i te pane na tei poia,
e tatara te Fatu i tei taamu hia i te fifi.

E faaaraara te Fatu i te mata o tei matapo hia,
e faatia te Fatu i tei haapio hia i raro.
E au te Fatu i te taata parau tia.
E paruru te Fatu i te taata ee,

E tauturu oia i te otare e i te vahine ivi,
e taoi ra oia i te haerea a te feia paieti ore.
E vai Arii ā te fatu i te mau anotau atoa
To Atua, e Siona e, e mai tera ui e tera ui !

TAIORAA PITI
                                                   « E ere anei o te feia veve ta te Atua i maiti no te faariro ia ratou ei feia ’āi’a i te Basileia ? »
A taio tatou i te epitore a Iakobo peata       2, 1-5
E au mau taeae e, eiaha outou e amui i te haapaoraa i te huru o te taata ’e to outou faaroo i to tatou Fatu o Iesu-Kirito, o tei faahanahanahia ra. Ia haere noa mai te hoe taata i ta outou apooraa, ma te tapea auro i te rima ’e te ahu unauna ra, ’e ia tomo atoa mai te tahi taata, ma te ahu reporepo ra, ’e ua hio atura outou i te taata ahu unauna ra ma te parau iana e : « E parahi mai oe i teie nei vahi tura » ’e ua parau atura outou i tei veve ra e : « E ti’a noa oe i ō atu », ’a aore rā : « E parahi mai oe i raro iho i tō’u parahiraa », aita anei ïa outou i haapao i te huru o te taata i roto i to outou aau ? Aita anei ïa outou i riro ei haava manao iino ? A faaroo mai na, e au mau taeae here e, e ere anei o te feia veve, i te hioraa a to te ao nei, ta te Atua i maiti, no te faariro ia ratou ei feia taoa i te faaroo ra ’e ei feia ’āi’a i te Basileia tāna i parau fafau mai i te feia e here iana ra ?

      - O te Parau ïa a te Atua.

ALLELUIA
Alleluia. Alleluia.
Ua porohua Iesu i te Parau Api no te Batileia             cf. Mat 4, 23
e ua faa’ora oia i te mau ma’i o tona nunaa.
Alleluia.

EVANELIA
                                           « E faaroo hoi te taria turi iana, ’e e paraparau te vava »
 A taio tatou i te Evanelia a Mareko peata     7, 31-37
I taua anotau ra, faarue atura Iesu i te fenua o Turia, ’e, na Sidonia, ua hoi maira i te miti Galilea, na roto i te fenua Dekapoli. Ua arataihia maira iana ra te hoe taria turi e maumau atoa tāna parau, ’e ua parau maitai te taata iana ra, ia tuu oia i tana rima i nia iho i taua taata ra. Aratai atura Iesu iana i te hiti ; ’e, atea a’era te tiaa rahi taata, ua tuu ihora oia i tana rima i roto i te taria o taua taata ra, ua tutuha i te huare, fa’ati’a’ia atura i tōna arero. Nānā a’era tana mata i nia i te ra’i, ’e autā ihora oia. Ua na ō atura oia i taua taata ra : « Epheta », oia hoi : « Ia amaha oe. » Amaha ihora tana taria i reira ra, ’e matara a’era te nati o tana arero, ’e ua afaro maira tāna parau. Ua a’o atura Iesu ia ratou : eiaha e faaite noa atu i te taata. Ia rahi rā tāna opaniraa atu ia ratou, ua rahi roa atu ïa ta ratou faaiteraa. Ua rahi roa atura to ratou maere, ’e te na ō ra ta ratou parau : « E ohipa faahiahia anae tana i rave, e faaroo hoi te taria turi iana, ’e e paraparau te vava. »

- Haapopou tatou i te Parau a te Atua.