Dominika 26 - Tau noa B

DOMINIKA 26 - TAU NOA - B

TAIORAA MATAMUA
                                                  « E aha oe i peapea’i ia raua no’u nei ? Tei hau i te maitai ei feia tohu anae te mau taata’toa nei ! »
A taio tatou i te puta Numera      11, 25-29
I te mau mahana ra, ua pou mai te Fatu i raro i roto i te ata, e ua parau maira ia Mose, e ua rave i ta te varua i nia ia Mose, e tuu atu i nia iho i taua na taata ra e hitu ahuru. Faaea ihora te varua i nia ia ratou, tohu maira ratou, e ua tamau atura ratou i te na reiraraa. Ua toe râ i roto i te puhapa too piti taata, o Eledada to te tahi ioa, e o Medada to te tahi ; ua iri atoa hoi te varua i nia ia raua, no te mea ua papai atoa hia raua, aita râ raua i tae i te sekene ra. Te tohu noa maira râ raua i roto i te puhapa, ua horo maira te hoe tamaiti e faaite mai ia Mose i te naôraa e : Te tohu mai nei o Eledada raua o Medada i roto i te puhapa. I reira ihora, ua parau maira o Iosua, te tamaiti a Nuna, te tavini no Mose, tei maiti hia i rotopu ia ratou e raverahi : E ta’u fatu, e Mose e, a opani atu oe ia raua. Ua parau atura Mose iana : E aha oe i peapea’i ia raua no’u nei ? Tei hau i te maitai, ei feia tohu anae te mau taata’toa nei, e ia horoa mai te Fatu i tona varua ia ratou.

     - O te Parau ïa a te Atua.

SALAMO                                    19, 8, 10, 12-13, 14
R/ E mea tia anae ïa te mau faaueraa a te Fatu,
e oâoâ ïa no te mafatu.

E hapa ore roa te ture a te Fatu,
e tamahanahanaraa na te mau varua ;
te parau-faaiteraa a te Fatu, e parau mau ïa,
o te paari ïa a te feira riirii.

Te mataû i te Fatu, e mea mo’a ïa,
e tia i te vai maiteraa i tera tau e i tera tau ;
te faataaraa a te Fatu e parau mau ïa,
e te tia anae ïa.

Te haapao nei hoi to tavini i te reira,
tei te haapaoraa i te reira te faufaa rahi roa ra.
O vai hoi te taa iana te mau hapa ?
A tamâ mai oe i ta’u nei mau hara itea-ore hia.

A paruru mai oe i to tavini nei i te hara teoteo,
ia ore te reira ia faahepo mai ia’u ;
i reira vau e hapa-ore ai e
e mâ ai au i te hara rahi
.

TAIORAA PITI
                                                « Ua tahuti ta outou taoa rahi »
A taio tatou i te epitore a Iakobo peata    5, 1-6
’E tenā na, outou na, e te feia taoa rahi e, a oto, a auē i to outou mau pohe rarahi e fatata mai nei. Ua tahuti ta outou taoa rahi, ’e ua pau to outou ahu i te manumanu. Ua tutae-auri-hia ta outou auro ’e ta outou ario, ’e e riro taua tutae auri ra ei ite e faahapa ia outou, ’e e pau to outou tino i te ’a’āihia e taua tutae auri ra, mai te pau auahi ra. Ua haaputu outou i te taoa rahi i te mau mahana hopea nei. Inaha hoi te moni a te feia rave ohipa i ooti i ta outou mau aua, o tei tapeahia e outou na, te tiaoro ra ïa i te Atua ; ’e te faateni a te feia ooti ra, ua puta roa ïa i roto i te taria o te Fatu Sabaota. E oraraa fanao to outou i te fenua nei, e oraraa navenave, ua haaporia outou ia outou iho no te mahana o taparahiraa. Ua faahapa outou i te taata parautia, ’e ua taparahi pohe roa outou iana ra, ’e aita oia e patoi nei ia outou.

     - O te Parau ïa a te Atua.

ALLELUIA
Alleluia. Alleluia.
E parau mau hoi ta oe na parau, e te Fatu e :           cf. Ioa 17, 17ba
a haamo’a oe ia ratou i te parau mau.
Alleluia.

EVANELIA
                                              « O te ore e patoi ia tatou no tatou ïa. ’E, te turori ra oe i tō rima a tāpū ’ē atu ïa »
 A taio tatou i te Evanelia a Mareko peata      9, 38-43.45.47-48
I taua anotau ra, ua parau maira Ioane iana : « E te Orometua e, ua ite a’enei matou i te hoe taata i te tiavaruraa i te demoni ma te mana o to oe na i’oa, ’e ua tamata matou i te opani iana, no te mea aita oia i amui mai ia tatou nei. » Ua parau atura Iesu : « Eiaha outou e opani iana ; aore roa hoi e taata e ti’a ia rave i te hoe semeio ma tō’u nei i’oa, a faaino mai ai ia’u i reira ra. O te ore e patoi ia tatou, no tatou ïa. O te horoa noa mai i te hoe au’a iti pape na outou i te mea e, no te Kirito outou, oia mau tā’u e parau atu nei ia outou, e ore oia e ere i tāna utua. O te faaturori i te hoe o teie nei mau taata rii e faaroo mai ia’u, e huru maitai a’e oia ahiri te hoe ofai oro rahi roa i taamuhia i tōna ’a’ī, ’e ua taorahia oia i raro i te miti. ’E, te turori ra oe i tō rima, a tāpū ’ē atu ïa : e maitai a’e hoi oe, ia tae rima hoe noa i te ora ra, i te tae rima piti i te pō, i te auahi pohe ore ra. ’E, te turori ra oe i tō avae, a tāpū ’ē atu ïa : e maitai a’e hoi oe, ia tae pirioi i te ora ra, i te hurihia i te pō ’e na avae no oe atoa ra. ’E, te turori ra oe i tō mata, a ohiti ’ē atu ïa : e maitai a’e hoi oe, ia tae mata hoe noa i te Basileia o te Atua ra, i te hurihia i roto i te pō auahi ’e na mata no oe atoa ra, i te vahi e ore ai te tu’a e pohe, ’e e ore hoi te auahi e tinaihia. »

     - Haapopou tatou i te Parau a te Atua.