Dominika 29 - Tau noa B

DOMINIKA 29 - TAU NOA - B

TAIORAA MATAMUA
                                                 « No te mea ua tuu oia i tona iho oraraa no te hara, e ite oia i tona huaai i te vai maororaa »
A taio tatou i te puta a Isaia peropheta     53, 10-11
Na te Fatu i hinaaro e faahuahua ianai te paruparu, no te mea ua tuu oia i tona iho oraraa no te hara, e ite oia i tona huaai i te vai maororaa, e te hinaaro o te Fatu e tupu ïa i tona rima. No te mea ua mauiui tona varua, e ite oia i te hotu, e e mauruuru roa oia ; na roto i tona ite, e raverahi te taata ta ta’u tavini e faariro ei feia parautia, e nana e rave i to tatou mau ino.

      - O te Parau ïa a te Atua.

SALAMO                                  32, 4-5, 18-19, 20.22
R/ Ei i nia ia matou to oe here, e te Fatu e,
mai ia matou i tiaturi ia oe na !

Ua tia hoi te parau a te Fatu,
e e parau mau anae ta’na mau ohipa atoa ra.
Te here nei oia i te parau-tia e te parau-au,
ua î hoi te ao atoa nei i te here a te Fatu.

Inaha, tei nia te mata o te Fatu i te feia e mataû iana ra,
e i nia i te feia e tiaturi i tona ra aroha.
ei faaroa i to ratou varua i te pohe,
e ei faaamu ia ratou i te tau oê ra.

Te tiaturi mai ra to matou varua i te Fatu,
o oia hoi to matou turu e to matou paruru.
Ei i nia ia matou to oe here, e te Fatu e,
mai ia matou i tiaturi ia oe na.

TAIORAA PITI
                                                   « A haere tatou i te terono o te karatia ma te mata’u ore »
A taio tatou i te epitore i te mau Hebera    4, 14-16
E au mau taeae e, e tahu’a rahi hau ’ē maoti to tatou, o tei tomo i roto i te ra’i, o Iesu ïa, te Tamaiti a te Atua ; no reira, a tapea maite ā tatou i ta tatou fā’ira’a faaroo. E ere hoi to tatou i te tahu’a rahi e ore e ti’a i te aroha i to tatou paruparu : ua tamatahia hoi oia i te mau mea atoa, e au hoi tōna huru i to tatou ; aita rā oia i harahia. No reira, a haere tatou i te terono o te karatia ma te mata’u ore, ia arohahia mai tatou ’e ia noaa mai te karatia ei tautururaa ia tatou i te tau au ra.

      - O te Parau ïa a te Atua.

ALLELUIA
Alleluia. Alleluia.
Te Tamaiti a te taata nei i haere mai ia tavini atu rā,           cf. Mar 10, 45
’e ia horoa i tōna ora ei utua no na taata e rave rahi.
Alleluia.

EVANELIA
                                                    « Te Tamaiti a te taata nei i haere mai ia ’e ia horoa i tōna ora ei utua no na taata e rave rahi »
 A taio tatou i te Evanelia a Mareko peata     10, 35-45 (Taioraa haapotohia : 10, 42-45)
I taua anotau ra, haere maira iana ra na tamarii a Zebedaio ra, o Iakobo raua o Ioane, na ō maira : « E te orometua e, te hinaaro nei maua ia faatia mai oe i ta maua aniraa. » Ua na ō atura oia : « E aha ta orua e hinaaro ia rave atu vau ? » Ua parau maira raua : « A faatia mai, ia parahi maua, te hoe i tō rima atau ’e te tahi i tō rima aui, i roto i te hanahana e pūpūhia mai no oe. » Ua parau atura Iesu ia raua : « Aita orua i ite i ta orua i ani mai nei. E ti’a anei ia orua ia inu i te au’a e inuhia e au, ’e ia papetitohia i te papetitoraa e papetitohia ai au ? » Ua parau maira raua : « E ti’a ia maua. » Ua parau atura Iesu ia raua : « E inu mau ā orua i te au’a e inuhia e au, ’e e papetitohia orua i te papetitoraa e papetitohia ai au. Area te parahi i ta’u rima atau ’e i ta’u rima aui, eita e ti’a ia’u ia horoa. E horoahia hoi i te feia no ratou te reira i faaineinehia ai. » ’E, faaroo a’era te tino ahuru ra, inoino roa a’era ratou ia Iakobo raua o Ioane. Ua pii atura Iesu ia ratou, ’e ua parau atura :
[E haamata te taioraa haapotohia i onei :   Ua parau atura oia Iesu i tana mau pipi :
« Ua ite outou e, te feia i parauhia e, e huimana io te etene ra, e faahepo ïa ia ratou, ’e te faatere etaeta nei te feia rarahi ia ratou. Eita rā e ti’a ia na reira io outou na ; o tei hinaaro rā ia rahi oia i rotopu ia outou na, ia riro ïa oia ei tavini no outou. ’E o tei hinaaro e, ei mua oia i rotopu ia outou na, ia riro ïa oia ei tītī no outou atoa. Aita hoi te Tamaiti a te taata nei i haere mai ia tavinihia mai oia, ia tavini atu rā, ’e ia horoa i tōna ora ei utua no na taata e rave rahi ».

- Haapopou tatou i te Parau a te Atua.