Dominika 3 - Pakate B

DOMINIKA 3 no PAKATE - B

TAIORAA MATAMUA
                                                      « Ua taparahi outou i te tumu o te ora ; ua faatiafaahou rā te Atua iana, mai roto mai i tei pohe ra »
A taio tatou i te Ohipa a te mau Apotoro     3, 13-15.17-19
I te mau mahana ra, i mua i te nunaa paato’a, ua parau atura Petero  : « E te mau taata no Iseraela e, ua faahanahana te Atua o Aberahama ’e o Isaaka ’e o Iakoba, te Atua o to tatou hui tupuna i tōna tavini ia Iesu, ta outou i faahapa ’e ta outou hoi i haapae i mua i te aro o Pilato, o tei faaoti i tōna manao e tuu iana, ia haere noa ana. Ua haapae outou i te taata mo’a ’e te parautia ra, ’e ua ani outou ia tuuhia ma te utua ore te hoe taparahi taata. Ua taparahi outou i te tumu o te ora ; ua faatiafaahou rā te Atua iana, mai roto mai i tei pohe ra. O matou nei hoi te mau ite o tōna tiafaahouraa. E au mau taeae, ua ite au e, no te taa ore outou i na reira ai, ’e oia atoa hoi to outou hui faatere. ’E ua na reira atoa to te Atua faatupuraa i te parau tāna i faaite atea mai na roto i te vaha o te mau peropheta atoa, maori rā : e mauiui te Mesia. A tatarahapa maoti outou ’e a fariu mai, ia tumāhia ta outou mau hara.

     - O te Parau ïa a te Atua.

SALAMO                                 4, 2, 4.7, 9
R/
A faahiti mai i te maramarama
a to mata i nia ia matou nei.

E aore râ : Alleluia !

A tiaoro ai au ia oe na, ua faaroo mai oe ia’u,
e te Atua, ta’u haava parautia ra !
A roohia noa hia’i au i te ahoaho ra, na oe i tuu ia’u i te vahi atea.
A aroha mai ia’u, e a faaroo mai i ta’u nei pure.

Ia ite  atoa mai ra outou e, e haapaoraa faahiahia ta te Fatu i tona ra hoa ;
e faaroo mai  te Fatu ia tiaoro atu vau iana ra.
E raverahi te parau e : na vai e faaite mai i te oâoâ ?
A faahiti mai i te maramarama a to mata i nia ia matou nei.

E tiraha vau i raro ma te hau,
varea’tura i te taoto i reira ihora ;
na oe anae, e te Fatu e,
e faatia ia’u ma te hau.

TAIORAA PITI
                                                          « O oia te tapena i pūpūhia ei taraehara i ta tatou nei mau hara i ta to te ao atoa nei rā »
A taio tatou i te epitore matamua a Ioane    2, 1-5a
E au mau tamarii rii e, te papai atu nei au i taua parau nei ia outou, ia ore outou ia rave i te hara. Ia rave noa atu rā te tahi taata i te hara, e paruru to tatou io te Metua ra, o te taata parautia ra, o Iesu-Kirito. O oia te tapena i pūpūhia ei taraehara i ta tatou nei mau hara, eiaha rā i ta tatou anae ra, i ta to te ao atoa nei rā. Teie te mea e ite ai tatou e, ua ite tatou iana ra : ia haapao tatou i tana mau faaueraa. O tei parau e : « Ua ite au iana », ’e aore oia i haapao i tāna mau faaueraa, e taata haavare ïa, ’e aita te parau mau i roto iana ra. O tei tapea rā i tāna parau, tei roto ïa iana te here mau i te Atua.

     - O te Parau ïa a te Atua.

ALLELUIA
Alleluia. Alleluia.
E te Fatu, e Iesu e, a heheu mai i te Papairaa mo'a !   cf. Luk 24, 32
Ia mahanahana to matou mafatu
a parau noa mai ai oe ia matou.
Alleluia.

EVANELIA
                                                        « Teie tei papaihia ia mauiui te Kirito ’e ia tiafaahou oia, mai roto mai i tei pohe ra, i te toru o te mahana»
 A taio tatou i te Evanelia a Luka peata   24, 35-48
I teie tau ra, ua faatia na pipi e hoi maira mai Emauta mai i te reira i na Apotoro ho’e ahuru ma ho’e e, i to ratou mau hoa, ua faaite maira raua i te ohipa i tupu i te aratia ’e to raua iteraa ia Iesu i te vavahiraa pāne ra. Te paraparau noa ra ratou, ti’a maira Iesu i roto ia ratou, ’e ua na ō maira : « Ei ia outou na te hau. » Roohia ihora ratou e te mehameha ’e te riaria, ua manao hoi ratou e, e varua ta ratou e hio ra. Ua parau maira oia ia ratou : « E aha outou e maheaitu ai, ’e e aha to outou manao e feaa ai ? A hio mai i ta’u pu’e rima ’e ta’u pu’e avae : o vau mau ā. A fāfā mai na, ’e a hio mai na ; aita to te varua e ’i’o ’e te ivi mai tō’u nei. » ’E, tei te parauraa mai oia i taua parau ra, ua faaite maira oia ia ratou i tōna pu’e rima ’e tōna pu’e avae. ’E, no te mea, no te rahi o te oaoa, te feaa noa ra ā ratou ’e te maere noa ra ā, ua parau maira oia : « E māa anei ta outou i ō nei ? » Ua pūpū atura ratou iana i te hoe ma’ai’a tunu paa. Rave ihora oia, ’e amu ihora i mua i to ratou mata. ’E ua parau maira oia ia ratou : « Teie te parau ta’u i parau atu ia outou, a parahi noa ai au i roto ia outou : ia tupu te mau parau atoa i papaihia no’u i roto i te Ture a Mose ’e i roto hoi i te mau Peropheta ’e i roto i te mau Salamo e ti’a ai e ia hope roa. » Haamaramarama maira oia ia ratou, ia taa ia ratou te auraa o te mau papairaa. ’E ua na ō maira : « Teie tei papaihia : ia mauiui te Kirito ’e ia tiafaahou oia, mai roto mai i tei pohe ra, i te toru o te mahana. ’E e poro-haere-hia te tatarahapa ’e te faaoreraa hara i tōna ra i’oa, mai Ierusalema atu nei e tae noa atu i te mau nunaa atoa. Ei ite outou no taua mau parau ra. »

- Haapopou tatou i te Parau a te Atua.