Dominika 3 - Tau noa B

DOMINIKA 3 - TAU NOA - B

TAIORAA MATAMUA
                                                                 « Te mau taata o Ninive i faarue i to ratou èâ ino »
A taio tatou i te puta a Iona peropheta      3, 1-5.10
E papiti maira te parau a te Fatu ia Iona ra, i te naôraa e : A tia, e a haere i Ninive, te oire rahi ; e a aô atu oe i reira i te aôraa ta’u i parau atu ia oe ra. Ua tia aera o Iona i nia, haere atura i Ninive mai te au i te parau a te Fatu : e oire rahi o Ninive, e toru mahana e ati ai. Ua haamata’tura o Iona i te haere na roto i taua oire ra, hoe aera mahana i te haereraa, e ua tiaoro oia, naô atura : E maha ahuru mahana toe, e taihitumu hia’i o Ninive. Ua faaroo atura te taata o Ninive i te Atua, e ua poro i te haapaeraa maâ, e ua ahu ratou i te ahu pute mai te taata mana e tae noa’tu i te taata rii. Ua hio atura te Atua i ta ratou mau ohipa, o ratou i faarue i to ratou èâ ino, tupu atura to te Atua aroha no te ino tana i parau e faatupu i nia ia ratou, e aore atura oia i faatupu.

      - O te Parau ïa a te Atua.

SALAMO                                                   24, 4bc-5ab, 6-7, 8-9
R/ A faaite mai oe ia’u i to oe mau éâ, e te Fatu e.

A faaite mai oe ia’u i to oe mau éâ, e te Fatu e,
e a haapii mai ia’u i to oe na mau haerea.
A aratai oe ia’u i roto i te parau mau a oe ra, e a haapii mai ia’u ;
o oe hoi te Atua no to’u ora.

A haamanao i to oe na aroha faaherehere, e te Fatu e,
e to oe na here, o tei vai noa hoi, mai te matamua mai â.
Eiaha oe e manaonao i te mau hapehape o to’u ra apiraa.
E haamana’o mai râ oe ia’u mai te au i to aroha ra.

E parautia te Fatu e e maru hoi,
e faatitiaifaro i te haerea a te feia hara ;
e aratai oia i te feia rii haehaa na te êâ o te parautia,
e e haapii oia i tona êâ i te feia ati ra.

TAIORAA PITI
                                                                              « Te mou nei hoi te hīro’a o teie nei ao »
A taio tatou i te epitore matamua a Paulo peata i to Korinetia    7, 29-31
E au mau taeae e, teie tā’u parau ia outou, e au mau taeae e, te poto nei te tau : mai teie atu nei, ia riro te mau taravahine mai te mea aita a ratou vahine ; ’e te feia e oto ra, mai te mea aita ratou e oto ra ; ’e te feia e oaoa ra, mai te mea aita ratou e oaoa ra ; ’e te feia te hoo mai ra, mai te mea aita a ratou ; ’e te feia e rave ra i te mau mea o teie nei ao, mai te mea aita ratou e rave ra. Te mou nei hoi te hīro’a o teie nei ao.

     - O te Parau ïa a te Atua.

ALLELUIA
Alleluia. Alleluia.
Ua fatata mai nei te Basileia o te Atua.  
     Mar 1, 15
A tatarahapa ’e a faaroo i te Evanelia.
Alleluia.

EVANELIA
                                                                           « A tatarahapa ’e a faaroo i te Evanelia »
 A taio tatou i te Evanelia a Mareko peata       1, 14-20
I muri a’e i to Ioane tapearaahia, haere atura Iesu i Galilea, ’e ua poro haere atura i te Evanelia o te Atua i te na ōraa e : « Ua hope te tau, ua fatata mai nei te Basileia o te Atua : a tatarahapa ’e a faaroo i te Evanelia. » ’E, te haere ra Iesu na te hiti i te miti i Galilea ra, ite atura oia ia Simona ’e i tōna taeae ra, ia Anederea, i te tiriraa i te ’upe’a i raro i te miti ; e ravaai hoi raua. Ua parau atura Iesu ia raua : « A pee mai ia’u, e faariro vau ia orua ei ravaai taata. » Faarue ihora raua i ta raua tau ’upe’a ra, ’e ua pee atura iana. Haere atura Iesu, ’e pihai rii atu, ite atura oia ia Iakobo a Zebedaio ra ’e i tōna taeae ia Ioane. Tei nia raua i te poti, te ene ra i ta raua ’upe’a. I reira ihora, ua nomino atura Iesu ia raua. Vaiiho ihora raua i to raua metua tane ia Zebedaio ’e na rave ohipa i roto i te poti, ’e ua pee atura iana.

     - Haapopou tatou i te Parau a te Atua.