Dominika 30 - Tau noa B

DOMINIKA 30 - TAU NOA - B

TAIORAA MATAMUA
                            « Te matapo, e te pirioi atoa ra, e faahoi mai au ia ratou »
A taio tatou i te puta a Ieremia peropheta    31, 7-9
No te mea teie ta te Fatu e parau nei : A oua i nia ma te oâoâ, e Iakoba e, e a pii hua i mua i te mata o te mau etene ; a faaharuru, e a himene, i te naôraa e : A faaora, e te Fatu e, i to nunaa, i te toea no Iseraela. Inaha, e faahoi mai au ia ratou no te fenua no Apatoerau mai, e e haaputuputu au ia ratou mai te hopea mai o te fenua ra : o ratou, e te matapo, e te pirioi atoa ra, e te vahine hapu, e tei faatitohi atoa ra ; e tiria rahi to ratou i te hoiraa mai iônei. E haere ratou ma te oto, e na’u e faahoi mai ia ratou ma te aroha ; e e aratai mai au ia ratou na roto i te mau pape tahe, na nia i te èâ afaro, e ore ratou e turorirori i reira, no te mea ua riro au ei metua no Iseraela, e o Epheraima o ta’u ïa matahiapo.

     - O te Parau ïa a te Atua.

SALAMO 125, 1-2ab, 2cd-3, 4-5, 6-7
R/ E ohipa faahiahia ta te Fatu i rave no tatou nei :
i oâoâ’i tatou !

I te faahoiraa te Fatu i te mau titi o Siona
ua au ïa tatou i te feia i moemoea hia ;
i aera to tatou vaha i te ata i reira,
e to tatou utu i te himene oâoâ.

E i reira to te etene parau raa e :
« E ohipa faahiahia ta te Fatu i rave no ratou ! »
E ohipa faahiahia ta te Fatu i rave no tatou nei ;
i oâoâ’i tatou.

A faahoi mai, e te Fatu, i to matou mau titi
mai ta oe i faahoi i te vai pue i Negeba ra !
O tei ueue ma te roimata ra,
e ooti ïa ma te himene oâoâ.

Ua haere ratou, ua haere oia ma te oto,
ua ueue i te huero,
ua hoi mai ratou, e ua hoi mai ma te himene
e ua hopoi mai i te mau ruru sitona.

TAIORAA PITI
                                                    « E tahu’a rahi oe e a muri noa atu, mai te au i te autahu’araa o Melehizedeka ra »
A taio tatou i te epitore i te mau Hebera     5, 1-6
E maitihia te mau tahu’a rarahi atoa i roto i te taata, ’e e faatoroahia ratou no te taata, ia pūpū i te ō ’e te tutia i te Atua, ei taraehara. E ti’a i te tahu’a rahi ia aumihi i te feia ite ore ’e te feia i hahi ’ē ra, no te mea oia iho, ua ati roa ïa i te paruparu. ’E, no taua paruparu ra, ia pūpū oia i te tutia taraehara e ti’a ai, no tāna iho mau hara ’e no te hara hoi a te nunaa. Teienei rā, e ore e ti’a i te taata ia rave noa i teie nei toroa tura roa nona iho ; e mea horoahia mai rā e te Atua i te taata tāna i nomino, mai ia Aarona ra. Mai te reira atoa te Kirito, e ere na te Kirito i horoa iana iho i teie hanahana rahi, oia hoi e riro ei tahu’a rahi, nana rā na tei parau iana e : « O ta’u Tamaiti oe, ina’uanei oe i faafanauhia ai e au ; » Mai tāna i parau atoa i te tahi atu vahi : « E tahu’a rahi oe e a muri noa atu, mai te au i te autahu’araa o Melehizedeka ra. »

     - O te Parau ïa a te Atua.

ALLELUIA
Alleluia. Alleluia.
To tatou Faaora, o te Kirito ra, o Iesu. Nana i faaore i te pohe,          2 Tim 1, 10
’e i faaanaana i te ora ’e te pohe ore na roto i te Evanelia.
Alleluia.

EVANELIA
                                                                               « E Raboni, ia ite ta’u mata ! »
 A taio tatou i te Evanelia a Mareko peata      10, 46b-52
I taua anotau ra, te haere ra Iesu i rapaeau i Ieriho, oia ’e tana mau pipi ’e te hoe pupu huru rahi, inaha, te parahi ra te hoe matapō i te pae aratia, o Baratimaio ïa, te tamaiti a Timaio. Te taparu ra oia i te moni i te taata. Faaroo a’era e, o Iesu no Nazareta tera e haere mai ra, haamata ihora oia i te pii mai e : « E te Tamaiti a Davida, e Iesu e, aroha mai ia’u ! » E rave rahi tei ’avau mai iana, ia mamu oia ; rahi roa maira tōna pii i te na ōraa e : « E te Tamaiti a Davida, aroha mai ia’u ! » Ti’a ihora Iesu, parau atura : « A pii atu iana. » Ua pii atura te taata i taua matapō ra : « A faaitoito, a ti’a i nia, te pii mai ra oia ia oe. » Faarue atura oia i tana ahu pū, ti’a a’era i nia, ’e ua haere maira ia Iesu. Ua parau atura Iesu iana : « E aha ta oe e hinaaro ia rave atu vau no oe ? » Ua parau maira oia : « E Raboni, ia ite ta’u mata ». Ua parau atura Iesu iana : « A haere, ua ora oe i to oe na faaroo. » Ora ihora tana mata i reira ra, ’e ua pee maira oia ia Iesu na nia i te eatia.

- Haapopou tatou i te Parau a te Atua.