Dominika 31 - Tau noa - B

DOMINIKA 31 - TAU NOA - B

TAIORAA MATAMUA
                                                         « E faaroo mai na, e Iseraela e : E here atu oe i te Fatu ra i to Atua ma to mafatu atoa »
A taio tatou i te puta Deuteronomi  6, 2-6
Ua parau atura Mose i te nunaa : Ia mataû hoi oe i te Fatu ra i to Atua, e ia haapao i tanara mau ture e tana ra mau faaueraa, ta’u e poroi atu nei ia oe, e to mau tamarii, e to mau mootua, i te mau mahana’toa o to oe oraraa nei, ia maoro to oe pue mahana..E faaroo mai na, e Iseraela ra, e e ara, ia rave oe i ta te Fatu iu faaue mai ia oe, e ia maitai oe, e ia rahi atu â oe, mai ta te Fatu ra te Atua no to mau metua i parau fafau mai ia oe i te fenua tahe pape noa te û e te meri. E faaroo mai na, e Iseraela e, o te Fatu ra, to tatou Atua, hoe roa ïa Fatu. E here atu oe i te Fatu ra i to Atua ma to mafatu atoa, e ma to varua’toa, e ma to puai atoa..E teienei mau parau ta’u e poroi atu nei ia oe i teienei mahana, e i roto i to mafatu e vai ai..

      - O te Parau ïa a te Atua.

SALAMO                                              18, 2b-3, 4, 47.51ab
R/ Ua here au ia oe, e te Fatu e, e to’u puai e.

Ua here au ia oe, e te Fatu e, e to’u puai e ;
O te Fatu to’u pâpâ e to’u haapuraa, e to’u faaora o to’u ïa Atua ;
E horo atu vau i raro ae i tona paruru, o Oia hoi to’u mato ;
To’u paruru, to’u tara faaora e to’u haapuraa maitai roa ra.

E tiaoro atu vau i te Fatu ra e
e ora ia vau i to’u mau enemi.

Ia ora te Fatu, e ia haamaitai hia to’u mato !
E ia faateitei hia te Atua o ora’i au nei.
E faarahi noa oia i te mau faatiamaraa hia no tona iho arii,
E te faaite mai nei oia i tona here ia Davida i tei faatahinu hia e ana.

TAIORAA PITI
                                                 « Iesu, i te mea hoi e, e vai noa oia e a muri noa atu, e ore ïa töna toroa e riro ia vetahi ’ë »
A taio tatou i te epitore i te mau Hebera      7, 23-28
E au mau taeae e, teie te tahi : e rave rahi te tahu’a i te Faufaa tahito ra, e ore hoi e ti’a i te pohe ia vai maoro mai ratou. Area oia, i te mea hoi e, e vai noa oia e a muri noa atu,  e ore ïa töna toroa e riro ia vetahi ’ë. No reira, e ti’a iana ia faaora i te feia e faafatata i te Atua na roto iana e a muri noa atu, e vai ora noa oia ei ti’a e pure no ratou. O te reira iho ä ïa te tahu’a rahi e au ia tatou nei, e tahu’a moa, ’e te hapa ore, ’e te taa ’ë hoi i te feia rave hara, ’e tei faateiteihia i nia a’e i te mau ra’i. E ere hoi i te mea titauhia, ia püpü oia i te tutia taraehara i te mau mahana atoa, no täna iho mau hara na mua, ’e i muri mai, no te hara a te nunaa, mai tei ravehia e te mau tahu’a rarahi atoa ra. Hoe roa hoi äna püpüraa, iana i püpü iana iho ra.. O te taata paruparu nei hoi ta te ture e faariro ei tahu’a rarahi, area te parau tapu (o tei parauhia i muri a’e i te ture) ua faatoroa ïa i te Tamaiti o tei hope roa i te maitai ei tahu’a rahi e a muri noa atu.

         - O te Parau ïa a te Atua.

ALLELUIA
Alleluia. Alleluia.
Ia here mai te hoe taata ia’u, e hapao oia i tā’u parau,               Ioa 14, 23
te na ô maira te Fatu ;
eherehia oia e ta’u Metua, ’e e haere atu maua iana ra.
Alleluia.

EVANELIA
                                               « E here oe i te Fatu ra. E here atu oe i tö taata tupu »
† A taio tatou i te Evanelia a Mareko peata        12, 28-34
I taua anotau ra, ua faafatata maira ia Iesu te hoe papai parau. Ua ui maira oia iana : « Tei hea te faaueraa matamua i te mau faaueraa atoa ? » Ua pahono atura Iesu : « Teie te faaueraa matamua : E faaroo mai, e Iseraela e, te Fatu ra, to tatou Atua, o te Fatu hoe roa ïa. E here oe i te Fatu ra, ma tö varua atoa ’e ma tö manao atoa ’e ma tö puai atoa. ’E teie hoi te piti : E here atu oe i tö taata tupu, mai ia oe iho na. Aita atu ä faaueraa i hau i taua tau faaueraa nei. » Ua parau maira taua papai parau ra : « Oia mau, e te orometua e, e parau ti’a ta oe i parau mai nei : hoe roa ra Atua, ’e aita atu, o Oia anae ra. ’E ia here te taata i te Atua ma töna mafatu atoa ’e ma töna manao atoa ’e ma töna varua atoa ’e ma töna puai atoa, ’e ia here hoi i te taata tupu mai iana iho ra, E hau ïa te reira i te mau tutia taauahi ’e te mau tutia atoa ra. » ’E ite a’era Iesu i te paari o täna pahonoraa, ua na ö atura oia iana : « Aore oe i atea roa i te Basileia o te Atua » ’E aita roa atu te taata i ui faahou mai iana, no te mata’u.

- Haapopou tatou i te Parau a te Atua.