Dominika 4 - Avenete B

DOMINIKA 4 - AVENETE - B

TAIORAA MATAMUA
                                                               E to Davida ra basileia, e mau ïa e a muri noa’tu i mua i te Fatu
A taio tatou i te puta piti o te mau Arii        7, 1-5.8b-12.14a.16
A parahi ai te arii i roto i tona ra fare, e a horoa mai ai te Fatu iana i te hau i mua i tona ra mau enemi e ati noa’e, tupu atura e. Ua parau o Davida i te peropheta ra o Natana : Ua hio anei oe e, te parahi nei au i roto i te fare arezi ; area te aruna o te Atua te vai ra ïa i roto i te paruru iri puaâ. Ua naô maira Natana i te arii : A haere, e a rave i te mea’toa i tupu i roto i to mafatu, te ia oe hoi te Fatu. Riro atura e, ua tae te parau a te Fatu, i taua rui ra, ia Natana, i te naôraa e : A haere, a parau i ta’u tavini ra ia Davida : teie ta te Fatu e parau nei : e faatia mai anei oe i te tahi fare no’u ei parahiraa ?
Teie te parau a te Fatu o te mau nuu : ua rave au ia oe mai te vahi faaamuraa i te nana e te peeraa’tu, ia riro oe ei aratai i nia i to’u nunaa ra ia Iseraela. E te i pihaiiho vau ia oe i te mau vahi atoa ta oe i haere ra, e ua taparahi au i to mau enemi i mua i to aro ; e ua faarahi au i to ioa, mai te ioa o te feia rarahi o te ao nei. Na’u hoi e faataa i te tahi vahi no to’u ra nunaa o Iseraela, na’u e haamau iana, e parahi oia i reira ma te hauti ore hia ; e ore te mau tamarii o te ino e haapeapea faahou iana mai te i mutaaihora. Mai te mahana mai â, a faatoroa mai ai au i te haava i nia i to’u nunaa ra ia Iseraela : e horoa atoa vau i te hau ia oe i mua i to mau enemi ; te faaite maira hoi te Fatu ia oe e, nana e haamau i to fare ra. E ia hope roa to oe ra pue mahana, e ia taoto oe i pihaiiho i to oe ra mau metua, e faatupu au i to oe ra huaai i muri ia oe no roto mai i to opu, e e haamau roa vau i tona ra basileia.
Ei metua vau nona e ei tamaiti oia na’u ra.
E to oe na fare e to oe ra basileia, e mau ïa e a muri noa’tu i mua i to aro, e to terono ra e mau ïa e a tau a hiti noa’tu. »

      - O te Parau ïa a te Atua.

SALAMO                                                                     88 (89.), 2-3, 4-5, 27.29
R/
E himene a vau i to oe na here,
e a muri noa’tu.

E himene a vau i to oe na here, e te Fatu e, e a muri noa’tu,
e na ta’u vaha e faaite i te parau mau na oe i tera ui, i tera ui.
Ua parau hoi au e : E tia to aroha i te vai mure ore raa,
tei te mau rai ra to parau mau i te haamau raa hia.

« Ua fafau hia e au te faufaa i tei maiti hia e au ra,
ua tapu vau i ta’u tavini ra ia Davida :
e haamau tamau maite au i to oe ra huaai,
e e patu vau i to oe ra terono e tae noa’tu i te mau ui atoa ra. »

E pii mai oia ia’u : "O oe ta’u metua,
ta’u Atua, e te pare e ora’i au nei !" 
E vai â ta’u aroha iana e a muri noa’tu,
e ta’u faufaa iana ra e tamau maite hia ïa. »

TAIORAA PITI
                                                                  Te parau ‘aro i vai huna mai te afera mai â, uaheheuhia mai ïa i teienei
A taio tatou i te epitore a Paulo peata i to Roma        16, 25-27
Ei hanahana i te Atua. E ti’a iana ia faaitoito mai i to outou faaroo, mai te au i te evanelia tā’u e faaite nei, a poro haere noa ai au i te i’oa o Iesu-Kirito, ’e mai te au hoi i te parau ’aro i vai huna noa ana mai te afera mai ā. I teienei rā, ua heheuhia mai taua parau ’aro ra na roto i te mau parau i papaihia e te mau peropheta. ’E, no te faaueraa a te Atua etereno ra, ua faaitehia i te mau atoa, ia arataihia ratou i te auraro o te faaroo. Ei hanahana i te Atua, nona anae te paari, na roto ia Iesu-Kirito. Amene.

     - O te Parau ïa a te Atua.

ALLELUIA

Alleluia. Alleluia.
Inaha ei tavini au no te Fatu :
ia na reira hia mai au mai ta oe i parau mai na.

Alleluia
.

EVANELIA
                                                                 « Inaha, e tō oe, ’e e fanau mai i te hoe tamaiti »
 A taio tatou i te Evanelia a Luka peata        1, 26b-38
I taua anotau ra, ua tono maira te Atua i te melahi ra, ia Gaberiela, i te hoe oire i Galilea, o Nazareta te i’oa. I te hoe paretenia i mōmo’ahia i te hoe taata no te utuafare o Davida ra, o Iosepha tōna i’oa ; o Maria te i’oa o taua paretenia ra. I tōna tomoraa mai, ua parau maira te melahi iana : « Ia ora na, e tei faaīhia e te Atua i te karatia, tei ia oe na te Fatu. » I te faarooraa oia i taua parau ra, horiri roa atura Maria ; te feruri noa ra oia i te auraa o taua aroharaa ra. Ua parau maira te melahi iana : « Eiaha oe e mata’u, e Maria e, ua ti’ahia mai hoi oe e te Atua. Inaha, e tō oe, ’e e fanau mai i te hoe tamaiti, ’e e mairi oe iana i te i’oa Iesu. E rahi oia, ’e e parauhia oia i te Tamaiti a te Atua teitei rahi. ’E na te Fatu ra, na te Atua, e horoa mai nona i te terono o tōna metua o Davida ra. E hau oia i nia i te utuafare o Iakoba e a muri noa atu, ’e e ore tōna basileia e mure. » Ua parau atura Maria i te melahi : « E nafea e tupu ai, aore hoi au e ite i te taata. » Ua pahono maira te melahi iana : « E pou mai te Varua-Maitai i nia ia oe, ’e na te mana o te Atua teitei rahi e tamaru mai ia oe ; ’e no reira te tamaiti e fanauhia mai e oe, e mo’a ïa ’e e parauhia oia e, o te Tamaiti a te Atua. ’E inaha tō taeae, o Elisabeta, ua tō atoa ïa i te hoe tamaiti i tōna nei ruhiruhiaraa, ’e o te ono teie o te marama, o oia hoi i parauhia e, e ū’i. Aore roa hoi e mea e ore e ti’a i te Atua. » Ua parau atura Maria : « Inaha ei tavini au no te Fatu, ia na reirahia mai au mai ta oe i parau mai na. »
Reva ’ē atura taua melahi ra.

     - Haapopou tatou i te Parau a te Atua.