Dominika 4 - Tau noa B

DOMINIKA 4 - TAU NOA - B

TAIORAA MATAMUA
                                                             « E faatupu au i te hoe peropheta : e tuu au i ta’u mau parau i tona ra vaha »
A taio tatou i te puta Deuteronomi      18, 15-20
Ua parau atura Mose i te nunaa : « E faatupu te Fatu ra to Atua i te hoe peropheta i to nunaa i roto i to mau taeae, mai ia’u nei te huru ; e faaroo oe iana, mai ta oe iho i ani mai i te Fatu ra i to Atua i Horeba ra, a putuputu mai ai te amuiraa e a parau mai ai oe : "Eiaha vau ia faaroo faahou i te reo o te Fatu ra o to’u Atua ; eiaha vau ia ite faahou i teienei auahi rahi, ô te pohe au." E ua parau maira te Fatu ia’u : "E parau maitai anae ta ratou. E faatupu au i te hoe peropheta ia ratou ra i roto i to ratou mau taeae, mai ia oe te huru ; e tuu au i ta’u mau parau i tona ra vaha, e parau atu oia ia ratou i te mau parau atoa ta’u e faaue atu iana ra. O te ore e hinaaro e faaroo i tana ra mau parau, tana e parau i to’u nei ioa, te vai nei au ei tahoo atu. O te peropheta râ i taiva è no te teôteô, e tei hinaaro e parau, ma to’u nei ioa, i te mau mea tei ore i faaue hia e au ia parau oia, e aore ra tei parau ma te ioa o te mau atua èè, e taparahi pohe roa hia ïa." »

     - O te Parau ïa a te Atua.

SALAMO                                                         94 (95.), 1-2, 6abcd, 6e-8a.9
R/
I teienei mahana, eiaha e faaetaeta i to outou na mafatu,
ia tia ia outou te reo o te Fatu.

A haere mai outou, a haamaitai tatou i te Fatu ma te oâoâ,
a himene hua tatou i te mato e ora’i tatou nei ;
E haere tatou i mua i tona aro ma te haamaitai,
e ma te salamo e himene hua’tu ai iana.

A haere mai outou, e a haamori tatou, e tahopu ;
e tuu i to tatou turi i mua i te Fatu tei hamani mai ia tatou nei !
O oia hoi to tatou Atua,
o tatou hoi te taata o tana ra aua
       e te mau mamoe a tona ra rima.

I teienei mahana, ia tia ia outou te faaroo i tona ra reo :
 « Eiaha e faaetaeta i to outou na mafatu i te Meriba ra,
e mai te i te mahana i Masa, i te medebara ra,
a faaroo mai ai to outou huimetua ia’u ra, e ua ââ mai ia’u,
       i e noa’tu ratou i ta’u ra mau ohipa ».

TAIORAA PITI
                                                                    « Oia atoa te vahine ’e te potii paretenia te manao nei raua i ta te Fatu , ia mo’a raua »
A taio tatou i te epitore matamua a Paulo peata i to Korinetia      7, 32-35
E au mau taeae e, te hinaaro nei au eiaha to outou ei manaonaoraa. Te taata aore āna e vahine ra, te tapi ra ïa i ta te Fatu, i te mau mea e mauruuru ai te Fatu iana. Te taata rā e faaea i te vahine ra, e tapi ïa i te mau mea o teie nei ao, i te mau mea e mauruuru ai tāna vahine iana. Amaha atura ïa tōna mafatu. Oia atoa te vahine faaipoipo-ore-hia ’e te potii paretenia, te manao nei raua i ta te Fatu, ia mo’a raua i te tino ’e te Varua. Area te tara-tane, e manao ïa i te mau mea o teie nei ao, i te mau mea e mauruuru ai tāna tane iana. Te parau nei au i taua mau parau ra ia maitai outou, eiaha no te ume ia outou i roto i te mārei, ia rave rā outou i te mea e au ra, ’e ia tavini tamau outou i te Fatu ma te fifi ore.

     - O te Parau ïa a te Atua.

ALLELUIA

Alleluia. Alleluia.
Te feia i parahi i roto i te pouri                           Mat 4, 16
ua ite ïa i te maramarama rahi.
E maramarama tei hiti mai no te feia e noho ra i raro
a’e i te maru pohe ra.

Alleluia.

EVANELIA
                                                                   « Ua haapii hoi oia ia ratou mai te hoe e mana tōna »
 A taio tatou i te Evanelia a Mareko peata       1, 21-28
Haere atura Iesu e tāna mau pipi i Kaperena ; ’e tae a’era i te sabati, tomo atura Iesu i roto i te sunago, ’e ua haapii atura i te taata. Maere ihora ratou i tāna haapiiraa, ua haapii hoi oia ia ratou mai te hoe e mana tōna, e ere mai te mau papai parau ra. Tei roto i ta ratou sunago te hoe taata i uruhia e te hoe varua viivii ; ua pii hua maira oia : « E aha ta oe ia matou nei, e Iesu i Nazareta e ? I haere mai oe e haamou ia matou. Ua ite au o vai oe : o te mo’a a te Atua ra. » Ua ’avau atura Iesu iana, i te na ōraa e : « A mamu, ’e a haere i rapae i teie nei taata. » Ua haamairi ihora te varua viivii i taua taata ra i raro, ’e ua iriti ihora taua taata ra ; ua pii hua maira te varua viivii, ’e ua haere maira i rapae i taua taata ra. Roohia-anae-hia ihora ratou i te maere rahi, ’e ua uiui ihora ratou ratou iho : « E aha rā teie ? E haapiiraa api, ma te mana rahi ! E faaue atoa oia i te mau varua viivii, ’e e faaroo ratou iana ! » Tu’i atura tōna roo e ati noa a’era te fenua Galilea.

     - Haapopou tatou i te Parau a te Atua.