Dominika 5 Tau noa B

DOMINIKA 5 - TAU NOA - B

A taio tatou i te puta a Ioba                                                                                                           7, 1-4.6-7
Ua parau atura Ioba i te na’o raa e : 71.Te oraraa o te taata ra i nia i te fenua nei, e tamairaa anae ïa, e tona mau mahana, e au ïa i te mau mahana o te taata tarahu hia ra. 2.Mai te tavini i hinaaro ra i te vahi marumaru, e mai te taata i tarahu hia e tiai ra i te otiraa o tana ohipa ; 3.oia’toa o vau nei, ua riro noa vetahi mau marama ei mea faufaa ore no’u, e e raverahi te rui teiaha ta’u i taio no’u ra. 4.Ia taoto anae au i raro, ua parau au : afea vau e tia’tu ai i nia, ma te tiai raa’tu i te ahiahi ; e ua ati au i te mauiui, e poiri atu ai. 6.E oioi ae to’u nei mau mahana i te mairiraa i te tâpuraa hia te ahu o tei raraa maira : ua mairi hoi ïa ma te tiaturi ore. 7.E haamanao na oe e, e aho to’u nei ora, e eita hoi to’u mata e ite faahou i te maitai.

  (No te faaite e, ua hope te taioraa, e parau te taata taio : O te Parau ïa a te Atua.)

SALAMO                                                                                                                           146-147, 1.3, 4-5, 6-7
1.A haamaitai outou i te Fatu
- mea au te pehe, i to tatou Atua - mea popou te arueraa.
3.Na’na e rapaau i te mau aau oto
e e taamu i to ratou mau paparu.

4.Ua hope te mau fetia i te taio hia e’ana,
e na’na e mairi i to ratou ioa tataitahi ;
5.e rahi to tatou Fatu, e mana-hope
aore e faito tona ite.

6.Te tauturu nei te Fatu i tei haehaa ra
e te huri nei i te taata paieti ore i raro roa i te repo.
7.A faaaraara i te reo himene haamaitairaa i te Fatu,
a faaoto i te kinura rahi i to tatou Atua.

A taio tatou i te epitore matamua a Paulo Peata i to Korinetia                                      9, 16-19.22-23
E au mau taeae e, 916.te poro nei au i te Evanelia, e ere rā ïa i te hanahana no’u, no te mea, e ore e ti’a ia’u ia ore ia poro i te Evanelia ; e ati tō’u ia ore au ia poro i te Evanelia. 17.Ahiri au e poro i te Evanelia na roto i tō’u iho hinaaro, ei utua ïa tā’u e ti’a ai, teie rā ua titauhia mai ia poro vau i te Evanelia ; e hopoia ïa te reira i tuuhia mai i nia iho ia’u. 18.E aha ïa tā’u utua ? Teie : i tō’u pororaa i te Evanelia, te pūpū nei au i te Evanelia ma te titau ore i te hoo, ua faarue hoi au i te mau ti’araa ta te Evanelia i horoa mai no’u. 19.’E, tiama noa ai au i te taata atoa, ua faariro vau ia’u iho ei tītī no te taata atoa, ia rahi mai te taata e noaa ia’u. 22.I roto i te feia paruparu, ua faariro vau ia’u iho ei taata paruparu, ia noaa mai ia’u te feia paruparu. Ua faaau vau ia’u iho i te mau huru atoa, no te mau taata atoa, ia ora te tahi pae ia’u, teimaha noa atu ā te ravea. 23.No te Evanelia vau i na reira ai, ia noaa tā’u tuhaa no te oaoa ta te Evanelia e faaite mai.

  (No te faaite e, ua hope te taioraa, e parau te taata taio : O te Parau ïa a te Atua.)

Alleluia. Alleluia. Ua amo  Iesu i to tatou paruparu, ua rave oia i to tatou mau mauiui. Alleluia.

 A taio tatou i te Evanelia a Mareko Peata                                                                              1, 29-39
129.’E, i te taerea mai Iesu ā i rapae i te sunago no Kaperena, haere atura ratou, ’e o Iakobo raua o Ioane, i roto i te fare o Simona raua o Anederea. 30.Tei nia te metua hoovai vahine o Petero i te ro’i, ua pohe oia i te fiva ; i reira ra, ua faatiatia maira ratou ia Iesu i tōna ma’i. 31.Faafatata atura Iesu iana, rave maira i tana rima ’e faati’a a’era iana i nia ; pee ’ē atura te fiva, ’e ua raverave maira oia i te māa na ratou. 32.’E, ahiahi ihora, ia mairi atura te mahana, ua hopoihia maira iana ra te mau ma’i atoa ’e te mau taata atoa i uruhia e te demoni. 33.Tairuru maira to te oire atoa i te uputa. 34.E rave rahi te mau taata tāna i faaora, ua rau te huru o te ma’i, ’e e mea rahi atoa te mau demoni tāna i tiavaru ; eita rā oia e faati’a i te demoni ia paraparau, no te mea ua ite ratou o vai oia. 35.I te aahiata roa, te poiri noa ra ā, ti’a a’era Iesu i nia, haere atura i rapae i te oire, i te hoe vahi mo’emo’e, pure ai. 36.Paimi atura Simona mā iana ra. 37.’E, ite a’era ratou iana, ua parau maira : « Te imi nei te taata atoa ia oe. » 38.Ua na ō atura oia ia ratou : « Mai haere tatou i te mau oire fatata nei, ia poro haere atoa vau i te Evanelia i reira, o te tumu hoi ïa vau i haere mai ai i rapaeau. » 39.Haere atura oia i te a’o haereraa i roto i te mau sunago ’e i te tiavaruraa i te demoni e ati noa a’era Galilea.