Dominika 6 - Tau noa B

DOMINIKA 6 - TAU NOA - B

TAIORAA MATAMUA
                                                  « I vai noa te maî lepera i nia iho iana, e parahiraa taa è tona i rapaeau mai i te puhapa»
A taio tatou i te puta Levitiko      13, 1-2.45-46
Ua parau maira te Fatu ia Mose raua o Aarona, i te naôraa mai e : E maî uiui to te hoe taata, e te maî paa, e te vahi iti anaana i nia i te iri o tona tino, mai te maî lepera ra te huru, e aratai hia mai oia i te tahua ra ia Aarona, e aore ra i te hoe o tana ra mau tamarii. Ei ahu mahae hia tona, ei taupoo ore to te upoo ma te tapoi hia tona vaha i te ahu, e e pii noa oia e : ua viivii au, ua faufau au. I vai noa te maî lepera i nia iho iana, i vai viivii noa oia, e parahiraa taa è tona i rapaeau mai i te puhapa.

      - O te Parau ïa a te Atua.

SALAMO 31, 1-2, 5ab, 5c.11
R/
O oe hoi to’u nei haapuraa ;
e e haati mai oe ia’u i te mau himene faaora.

E ao tona to tei faaore hia tana hara,
e i haapae roa hia tana hapa!.
E ao to te taata aore i pari hia e te Fatu i te hara.
E aore hoi e haavare i roto i tona varua !

Ua faaite hua vau i ta’u nei hara ia oe na,
aore hoi au I huna I ta’u nei hapa;
ua naô hoi au e: e haere tia’tu vau
i te Fatu e faî I ta’u nei hara.

O oe râ, ua tuu mai i ta’u hapa, e ua faaore oe i ta’u nei hara.
A oâoâ outou i roto i te Fatu,
e a ououa i te oaoa, e te feia parautia e,
a ouaoua i te oâoâ, outou atoa i tia te mafatu ma !

TAIORAA PITI
                                                                                     « Ia pee mai outou ia’u nei, mai ia’u atoa e pee nei i te Kirito »

A taio tatou i te epitore matamua a Paulo peata i to Korinetia   10, 31-11, 1
E au mau taeae e, ia amu outou, ’e ia inu, ’e ia rave i te tahi mea ’ē ra, e rave outou i te mau mea atoa ei faahanahanaraa i te Atua. Eiaha outou ia riro ei turoriraa na te Ati-Iuda ’e na te Heleni ’e na te Etaretia atoa a te Atua. Mai ia’u atoa e haamauruuru i te mau taata atoa i te mau mea atoa ra, ma te ore e imi i tō’u iho maitai, i te maitai rā o te taata e rave rahi, ia ora ratou. Ia pee mai outou ia’u nei, mai ia’u atoa e pee nei i te Kirito.

      - O te Parau ïa a te Atua.

ALLELUIA
Alleluia. Alleluia.
E peropheta rahi tei ti’a mai nei i rotopu ia tatou :     Luk 7, 16
’e ua haere mai te Atua i tōna nei nunaa.
Alleluia.

EVANELIA
                                                    « Pee atura te lepera o taua taata ra ’e mā atura oia »
 A taio tatou i te Evanelia a Mareko peata        1, 40-45
I taua anotau ra, haere maira te hoe lepera iana ra, topa turi ihora i raro, ’e ua parau onoono maira iana, i te na ōraa e : « Ia ti’a ia oe na, e mā vau ia oe. » Aroha a’era Iesu iana, faatoro atura i tana rima, fa’ati’a’ia atura iana, ’e ua na ō atura : « Ua ti’a ai’u, ia mā oe. » I reira ihora, pee atura te lepera o taua taata ra, ’e mā atura oia. Ua riri atura Iesu iana, ’e ua tiahi atura iana i reira ra. Na ō atura : « Eiaha oe e parau noa a’e i te taata, a haere rā a faaite ia oe iho i te tahu’a pure ; ’e no to oe tamāraahia, a pūpū atu i te tutia i faataahia e Mose. E riro te reira ei faaiteraa na ratou. » Area taua taata ra, ia reva atura oia, haamata ihora ïa i te poro hua haere i teie parau api ’e i te haaparare atu. Aita atura i ti’a ia Iesu ia tomo noa atu i roto i te hoe oire ; e faaea rā oia i rapae, i te mau vahi mo’emo’e, ’e e haere mai te taata iana ra, mai te mau vahi atoa mai.

     - Haapopou tatou i te Parau a te Atua.