Dominika Pakate B

DOMINIKA PAKATE - B

I TE TIAFAAHOURAA O TE FATU

Oro’a hanahana

PURE TUTIA I TE AO NO PAKATE

TAIORAA MATAMUA
                                                                  « O tei amu ‘e tei inu ‘e oia atoa i muri a’e i tôna tiafaahouraa mai roto mai i tei pohe ra »
A taio tatou i te Ohipa a te mau Apotoro   1034a.37-43
I taua mau mahana ra, tae atura Petero i Kaisarea tae atura Petero i Kaisarea .’e ua parau atura : « Ua ite outou i taua parau ra, inaha hoi, ua haamata i Galilea i muri a’e i te papetitoraa a Ioane, ’e ua parare atura e ati noa a’e Iudea, ua faatahinu te Atua ia Iesu no Nazareta i te Varua-Maitai ’e i te mana, ’e ua haere oia na rotopu i te taata i te hamani-maitai-raa i te taata ’e i te faaoraraa i te feia atoa i fa’afaohia e te diabolo, tei iana ra hoi te Atua. O matou te mau ite o tāna mau mea atoa i rave i te fenua o te mau Ati-Iuda ’e i Ierusalema. E ua haapohe ratou iana ma te faatautau iana i nia i te raau. Ua faatiafaahou rā te Atua iana i te toru o te mahana ra, ’e ua horoa oia iana i te mana e faaite iana iho, eiaha i te taata atoa, i te mau ite rā i maiti-atea-hia e te Atua. O matou ïa, o tei amu ’e tei inu ’e oia atoa, i muri a’e i tōna tiafaahouraa mai roto mai i tei pohe ra. ’E ua faaue mai oia ia matou, ia poro haere matou i te taata ’e ia haapapu hua atu e, ua faarirohia oia e te Atua ei haava i tei ora ’e tei pohe. Nona i faaite ai te mau peropheta atoa e : e faaorehia i tōna i’oa te hara a te feia atoa e faaroo iana ra. »

  - O te Parau ïa a te Atua.

SALAMO 117, 1-2, 16-17, 22-23

R/ O te mahana teie i haapao hia e te Fatu,
e oâoâ ïa e te poupou no tatou nei !

E haamaitai i te Fatu e maitai hoi oia,
e mea mure ore hoi tona ra aroha.
Ia parau â hoi te feia mataû i te Fatu
e mea mure ore hoi tona ra aroha !

Ua upootia te rima atau o te Fatu,
e ravea puai tei oti i te rima atau o te Fatu !
Eita, e ore vau e pohe, e ora ra vau.
E poro haere vau i te mau ohipa a te Fatu.

Te ofai i faarue hia e te feia patu ra,
o tei riro iho nei ïa ei ofai poro.
O ta te Fatu teie i rave,
e mea maere ïa i to tatou nei pue mata.

TAIORAA PITI
E tia ia maite hoe taioraa i roto i na taioraa e piti i raro nei :
1.                                                         « A titau atu ïa i te mau mea i nia ra, i te vahi e parahihia e te Kirito »
A taio tatou i te epitore a Paulo peata i to Kolosa  3, 1-4
E au mau taeae, ua tiafaahou outou ‘e te Kirito ra, a titau atu ïa i te mau mea i nia ra, i te vahi e parahihia e te Kirito i te rima atau o te Atua. Ia au to outou feruriraa i te mau mea i nia, eiaha i te mau mea i te fenua nei. Ua pohe roa hoi outou, ’e ua hunahia to outou ora i te vahi tei reira te Kirito, i te Atua ra. Ia fā mai te Kirito, oia to outou ora, e fā atoa mai ai outou ma te hanahana.

  - O te Parau ïa a te Atua.

E aore râ :
2.                                                                                                  « E hopue te pu’e’a  faraoa, ia riro outou ei Pâsa api »
A taio tatou i te epitore matamua a Paulo peata i to Korinetia    5, 6b-8
E au mau taeae, aita anei outou i ite e : e hopue te pu’e’a faraoa i te hoe ma’a faahopue iti nainai roa ra ? A tamā na i te faahopue tahito i roto ia outou, ia riro outou ei pu’e’a api, inaha e au outou i te faraoa faahopue-ore-hia. Ua taparahihia hoi te Kirito, ta tatou Pāsa. A haapao maoti tatou i te oroa, eiaha ma te faahopue tahito, eiaha ma te faahopue tāiroiro ’e te ino, ma te faraoa faahopue-ore-hia rā, oia hoi ma te parau mau ’e te haavare ore.

- O te Parau ïa a te Atua.

HIMENE [MHK n° 174]
I te Vitima Pakate
Ia arue te mau kiritiano ra,
alleluia

Ia ora ia era te mafatu no Ietu
Ia ora ia ora ’muri noa’tu

No te Arenio Ietu
I noaaa’i
I te mamoe te ora.
Alleluia.

No Ietu te Araivavao
Pâ mai te hau
I te feia rave hara.
Alleluia.

A maere i te taputo
O te ora
O te ora e te pohe.
Alleluia.

Tiafaahou to te ora
Fatu mana
Tei iana te hau, te ora.
Alleluia
.

ALLELUIA
Alleluia. Alleluia.
Ua taparahihia te Kirito, to tatou Pâsa !        cf. 1 kor 5, 7b-8a
A haapao maoti tatou i te oroa !
Alleluia.

EVANELIA
« E tiafaahou oia mai roto mai i tei pohe ra »
A taio tatou i te Evanelia a Ioana peata    20, 1-9
’E, tae a’era i te mahana matamua o te hebedoma, i te poipoi roa ra, ua haere maira Maria Magadala i te menema, te marehurehu noa ra ā, ’e ua ite atura oia i te ofai, ua huri-’ē-hia i te menema. Horo atura oia, ’e ua haere atura ia Simona Petero ’e te pipi here a Iesu, ’e ua parau atura ia raua : « Ua hopoi ’ē ratou i te Fatu i te menema, ’e aita hoi matou i ite tei hea oia i te vaiihoraahia e ratou. » Haere atura Petero ’e te tahi pipi i te menema ra. Ua hohoro atura raua, ’e hemo ihora Petero i taua pipi ra, o tei tae atu na i te menema. ’E, ia pi’o ihora i raro, ite atura oia i te ahu ua parahurahu, aita rā oia i tomo i roto. Ua haere maira Simona Petero i muri iho iana, ’e ua tomo atura oia i roto i te menema, ’e ua ite atura i te mau ahu ua parahurahu. Area te horoi i vai na i nia i te upoo ra, aita ïa i parahurahu mai te mau ahu, ua vai omenemene rā i te vairaa i mua ra. I reira ra, ua tomo atoa atura te tahi pipi i roto, oia i tae atu na i te menema, ’e ua ite atura oia, ’e ua faaroo atura. Aore ā hoi ratou i haroaroa i te parau i papaihia ra : e tiafaahou oia mai roto mai i tei pohe ra.

- Haapopou tatou i te Parau a te Atua.

E aore râ : te Evanelia no te pô Mo’a :

EVANELIA
                                                                        « Iesu no Nazareta, ua tiafaahou oia »
Evanelia o Iesu-Kirito a Mareko peata              16, 1-7
’E, mairi a’era te sabati, ua hoo maira Maria Magadela ’e Maria, te metua vahine o Iakobo, i te raau noanoa, ia haere ratou e faatavai ia Iesu. I te mahana matamua o te hebedoma, i te poipoi roa ra, haere atura ratou i te menema ; no hiti noa a’era te mahana. Ua parau ihora ratou ratou iho : « Na vai e huri ’e i te ofai i muri i te uputa menema no tatou ? » Nänä a’era to ratou mata i nia, ite atura e, ua huri-’ë-hia taua ofai ra ; e ofai iti rahi hoi. Tomo atura ratou i roto i te menema, ’e ite atura i te hoe taata api i te parahiraa i te pae atau ; ua ahuhia oia i te ahu roa teatea. Horiri atura tatou. Ua parau maira oia ia ratou : « Eiaha e mata’u, te imi na outou ia Iesu no Nazareta ; ua tiafaahou oia, aita oia i ô nei. Teie te vahi i tuuhia ai oia. E haere rä outou e faaite i täna mau pipi l’e ia Petero hoi : "Te na mua ra oia ia outou i te haere i Galilea. Ei reira outou e ite ai iana, mai täna i parau mai ia outou ra" »

- Haapopou tatou i te Parau a te Atua.

E aore râ, no te Pure Tutia i te pô :

EVANELIA
                                              « A faaea mai ia maua nei, ua fatata hoi te ahiahi ra »
†  Evanelia o Iesu-Kirito a Luka peata       24, 13-35
I te toru o te mahana i muri a’e i to Iesu poheraa, rereva atura e toopiti o ratou i te hoe oire iti, o Emausa te i’oa ; e piti hora haereraa, mai Ierusalema atu, e tae ai i reira. Paraparau noa ihora raua i taua mau mea ra.
ʻE, tei te paraparau-noa-ra raua, ’e tei te tâu’aparau-noa-raa, faafatata maira Iesu ia raua, ʻe ua haere ’e o raua atoa. Aita râ i taa ia raua e, o Iesu ïa, ua faaorehia hoi to raua ite iana. Ua parau maira oia ia raua : « E aha tena mau parau ta orua e paraparau ra, a haere noa ai orua ? » Ti’a ihora raua ma te mata oto. ʻE ua pahono atura te hoe o raua, o Keleopha te i’oa : « O oe anae paha te taata i Ierusalema tei ore i ite i te mau mea i tupu i teie nei mau mahana. » Ua parau maira Iesu ai raua : « E aha ïa mau mea ? » Ua pahono atura raua : « O te mau parau ïa no Iesu i Nazareta, e peropheta mana oia, i te ohipa ’e i te parau, i mua i te aro o te Atua ’e i te nunaa atoa ra. ʻE te huru hoi o ta to tatou mau tahu’a rarahi ʻe ta to tatou hui mana tuuraa atu iana, ia faautuahia i te pohe ʻe ta ratou hoi faatatauroraa iana. Area matou nei, ua tiaturi ïa e, nana e faaora ia Iseraela. E ere râ te reira anae ra, o te toru teie mahana mai te tupuraa mai â taua mau mea ra ; teie râ i maheaitu na matou i e toofanu pu’e vahine no roto ia matou ; ua haere ratou i te menema i te poipoi roa ra. ʻE, aore a’era i itea ia ratou te tino, ua haere maira ratou e parau e, e melahi tei fâ mai ia ratou, o tei parau mai e : te ora nei oia. Haere atura te tahi mau taata o matou nei i te menema, ʻe roohia atura e, oia mau â ta taua mau vahine i parau ra ; aera oia ra, aore ratou i ite iana. » Ua parau atura oia ia raua : « ‘Auê ïa mafatu manao ore ʻe te faaroo ʻatâ i te mau parau atoa i faaitehia mai e te mau peropheta. E ere anei e, ia mauiui te Kirito i taua mau mea ra e ti’a ai, ia tomo oia i roto i tôna hanahana ? » ʻE ua tatara maira oia ia raua i te mau parau atoa i papaihia nona, mai ia Mose e tae roa mai i te mau peropheta atoa.
ʻE, fatata maira te oire iti e haerehia e raua, ua faahua haere roa â oia. Ua parau onoono atura raua iana, na ô atura : « A faaea mai ia maua nei, ua fatata roa hoi te ahiahi ra ʻe ua tahataha te mahana. » Tomo atura oia ʻe faaea ihora ia raua.
ʻE, iana i amui atoa atu ia raua i te amuraa mâa ra, ua rave ihora oia i te faraoa, ʻe, oti a’era te Atua i te haamaitaihia e ana, ua vavahi ihora oia i taua faraoa ra, ʻe ua horoa atura ia raua. ʻAra’ara a’era to raua mata, taa atura ia raua o vai oia, ʻe, i reira ra, mo’e roa atura oia i to raua mata. Ua na ô ihora raua raua iho : « E ere anei e, te mahanahana ra to taua mafatu i roto ia taua, a paraparau noa ai oia i te aratia ra ʻe a tatara ai oia i te mau papai raa ia taua ? » I reira ihora, titi’a a’era raua i nia, ʻe hohoi maira i Ierusalema ; roohoa maira, ua putuputu te tino ahuru ma hoe ra ʻe te tahi atu mau pipi, o tei parau mai ia raua e : « Ua tiafaahou mau â te Fatu, ʻe ua fâ mai ia Simona ra. » Ua faaite maira raua i te ohipa i tupu i te aratia ʻe to raua iteraa ia Iesu i te vavahiraa pâne ra.

- Haapopou tatou i te Parau a te Atua.