[25 no mati] TE FAAITERAA I TE FANAURAA O IESU

[25 no MATI]

TE FAAITERAA I TE FANAURAA O IESU

Oro’a hanahana

TAIORAA MATAMUA
                                                                       « Inaha e tô te Paretenia »
A taio tatou i te puta a Isaïa peropheta    7, 10-14 ; 8, 10
I taua anotau ra, ua tamau te Fatu i te parau ia Akaza, i te naôraa e : a ani oe i te tahi tapao i te Fatu to Atua, i raro roa i te po, e aore ra i nia roa i te rai. Ua parau atura Akaza : e ore au e ani, e ore au e ââ i te Fatu. Naô atura Isaia : e faaroo mai, e te utuafare o Davida e, e mea iti anei ia outou ia faahaumani i te taata, e faahaumani atoa mai ai i ta’u Atua ? No reira na te Fatu iho e horoa i te hoe tapao no outou. Inaha e tô te paretenia, e e fanau i te tamaiti, e e mairi hia tona ioa o Emmanuela, oia hoi : te ia matou te Atua.

     - O te Parau ïa a te Atua.

SALAMO                                              39, 7-8a, 8b-9, 10, 11
R/
Inaha, te haere mai nei au, e te Fatu e,
ia haapao a vau i ta oe mau hinaaro ra.

Aore oe i hinaaro i te tutia ta-auahi e te pupuraa,
ua amaha mai râ to’u nei taria ia oe na ;
aore oe i titau mai i te tutia-ta-auahi, e ore atoa hoi te pupuraa,
ua parau atura vau : inaha, te haere mai nei au.

I roto i te otaro no te puta, ua faaue hia mai au e
ia haapao a vau i ta oe mau hinaaro ra.
E ta’u Atua e, ua popou roa to’u mafatu
i to oe na Ture.

Ua faaite hua atu vau i to te Fatu ra parautia
i roto i te amuiraa rahi ; 
Inaha, e ore roa to’u nei pue utu i mamu,
ua ite ïa oe i te reira.

Aore au i huna i to oe na parautia i roto i hohonuraa o to’u mafatu ;
ua faaite râ vau i to oe haapao maitairaa, i to oe faaoraraa,
Aore au i huna i ta oe here-maitai e ta oe parau-mau
i te amuiraa rahi.

TAIORAA PITI
                                              « Teie au, no’u hoi te parau i papaihia i roto i te otaro o te puta ra te haere mai nei au, e te Atua e, e faatia i to oe na hinaaro »
A taio tatou i te epitore i te mau Hebera      10, 4-10
E au mau taeae e, e ore hoi e ti’a i te toto puaatoro ’e i te toto puaaniho ia hopoi ’ē atu i te hara. No reira, i tōna tomoraa mai i te ao nei, ua na ō atura te Kirito : Aita a’enei i ti’a ia oe te tutia’e te pūpūraa, ua faanahonaho mai rā oe i te hoe tino no’u. Aita oe i mauruuru i te tutia taauahi ’e te tutia taraehara. Na ō atura vau : teie au, no’u hoi te parau i papaihia i roto i te otaro o te puta ra, te haere mai nei au, e te Atua e, e faatia i to oe na hinaaro. » Ua parau na oia : Aita a’enei i ti’a ia oe te tutia, te pūpūraa, te tutia taauahi, ’e te tutia taraehara ; aita oe i mauruuru i te reira, pūpū-noa-hia atu ai te reira ia au i te ture ra. ’E, i muri mai, ua na ō atura oia : Inaha, te haere mai nei au e faatia i to oe hinaaro. Te faaore nei ïa oia i tei mutaa iho ra haapaoraa, ’e te faatia nei oia i te piti. No te mana o taua hinaaro ra i haamo’ahia ai tatou nei, na roto i te pūpūraa hoe roa i te tino o Iesu-Kirito.

     - O te Parau ïa a te Atua.

ALLELUIA
Ei hanahana e ia aruehia oe, e te Fatu e Iesu e !
(I te Tau pakate : Alleluia. Alleluia !)
Ua riro te Parau ei taata,                                               Ioa 1, 14ab
’e ua puhapa mai io tatou nei.
’E ua ite tatou i tôna hanahana.

Ei hanahana e ia aruehia oe, e te Fatu e Iesu e !

EVANELIA
                                                        « Inaha, e tō oe, ’e e fanau mai i te hoe tamaiti »
Evanelia o Iesu-Kirito a Luka peata     1, 26b-38
I teie tau ra, ua tono maira te Atua i te melahi ra, ia Gaberiela, i te hoe oire i Galilea, o Nazareta te i’oa. I te hoe paretenia i mōmo’ahia i te hoe taata no te utuafare o Davida ra, o Iosepha tōna i’oa ; o Maria te i’oa o taua paretenia ra. I tōna tomoraa mai, ua parau maira te melahi iana : « Ia ora na, e tei faaīhia e te Atua i te karatia, tei ia oe na te Fatu. » I te faarooraa oia i taua parau ra, horiri roa atura Maria ; te feruri noa ra oia i te auraa o taua aroharaa ra. Ua parau maira te melahi iana : « Eiaha oe e mata’u, e Maria e, ua ti’ahia mai hoi oe e te Atua. Inaha, e tō oe, ’e e fanau mai i te hoe tamaiti, ’e e mairi oe iana i te i’oa Iesu. E rahi oia, ’e e parauhia oia i te Tamaiti a te Atua teitei rahi. ’E na te Fatu ra, na te Atua, e horoa mai nona i te terono o tōna metua o Davida ra. E hau oia i nia i te utuafare o Iakoba e a muri noa atu, ’e e ore tōna basileia e mure. » Ua parau atura Maria i te melahi : « E nafea e tupu ai, aore hoi au e ite i te taata. » Ua pahono maira te melahi iana : « E pou mai te Varua-Maitai i nia ia oe, ’e na te mana o te Atua teitei rahi e tamaru mai ia oe ; ’e no reira te tamaiti e fanauhia mai e oe, e mo’a ïa ’e e parauhia oia e, o te Tamaiti a te Atua. ’E inaha tō taeae, o Elisabeta, ua tō atoa ïa i te hoe tamaiti i tōna nei ruhiruhiaraa, ’e o te ono teie o te marama, o oia hoi i parauhia e, e ū’i. Aore roa hoi e mea e ore e ti’a i te Atua. » Ua parau atura Maria : « Inaha ei tavini au no te Fatu, ia na reirahia mai au mai ta oe i parau mai na. »
Reva ’ē atura taua melahi ra.

     - Haapopou tatou i te Parau a te Atua.