Te Tino Mo'a e te Toto o te Kirito B

TE TINO MO’A E TE TOTO O TE KIRITO - B
Oro’a hanahana

TAIORAA MATAMUA
                                                         « O te toto teie o te faufaa a te Fatu tana iho i faaau ia outou no te mau parau atoa nei »
A taio tatou i te puta Exodo     24, 3-8
I te mau mahana ra, ua haere ra o Mose e faaite atu i te mau parau atoa a te Fatu, e tona mau ture i te mau taata ra ; ua parau tahi noa maira te taata’toa : O te mau parau atoa a te Fatu ra ta oe i parau maira, e rave ïa matou. Ua papai ihora Mose i te mau parau atoa a te Fatu ra, e poipoi aera, tia oia i nia, hamani ihora i te hoe fata i te tumu moua ra i na ofai e hoe ahuru e ma piti no te mau opu atoa o Iseraela tino ahuru e ma piti ra. Ua tono atu oia i te taata api no te mau tamarii a Iseraela ra, e ua hopoi ratou i te tutia taauahi, e ua patia i te tutia faahau i te Fatu ra, oia hoi e fanaua puaatoro ra. Rave aera Mose i te tahi vahi o te toto, tuu ihora i roto i te aua, e ua ninii atura i te tahi vahi i nia i te fata ra. Ua rave aera oia i te puka o te faufaa, taio ihora ia faaroo mai te mau taata ra, ua naô maira ratou : Te mau parau atoa ta te Fatu i parau mai, na matou ïa e rave, e e auraro matou. Ua rave aera oia i te toto i roto i te aua, pipi atura i nia iho i taua mau taata ra, e ua naô atura : O te toto teie o te faufaa a te Fatu tana iho i faaau ia outou no te mau parau atoa nei.

  - O te Parau ïa a te Atua.

SALAMO                       115, 3-4, 6-7ac, 8.10
R/ E faateitei au i te aua o te ora
ma te tiaoro i te ioa o te Fatu.

E aore râ : Alleluia !

Nahea ra vau e faahoona’i i te Fatu
i te maitai atoa tana i tuu mai ia’u nei ?
E faateitei au i te aua o te ora
ma te tiaoro i te ioa o te Fatu.

E mea taoa i te aro o te Fatu,
te poheraa o tona ra feia moâ.
Aue ! e te Fatu e, o vau nei hoi to tavini,
te tatara nei oe i ta’u mau taai.

E pupu atu vau i te tutia haamaitai ia oe,
ma te tiaoro i te ioa o te Fatu ;
E faatupu vau i ta’u mau euhe i te Fatu,
e ia tia mai tona nunaa.

TAIORAA PITI
                                              « E tamâ te toto o te Kirito i to ratou manava »
A taio tatou i te epitore i to Hebera     9, 11-15
E au mau taeae e, ua ti’a maira rā te Kirito, te tahu’a rahi o te mau taoa a muri atu. ’E, na roto i te hoe sekene rahi a’e ’e te maitai roa atu, o tei ore i hamanihia e te rima - no te mea e ere taua sekene ra i to teie nei ao - ’e ma tōna iho toto, eiaha to te puaaniho ’e to te pinia puaatoro ra, ua tomo roa atura oia i roto i te vahi mo’a - hoe anae tomoraa, aita atu - ’e ua noaa iana te taraehara mure ore no tatou. Teienei, ia mo’a te feia viivii i te toto puaaniho ’e te toto puaatoro ’e te rehu puaatoro ufa api e niniihia i nia i to ratou upoo, ’e ia mā ratou i te haapaoraa i te tino nei, a tae hoi i te toto o te Kirito ra, o tei pūpū iana iho i te Atua, na roto i te Varua etereno, ei tutia viivii ora ra. No te mana o taua toto ra, e mā roa to tatou manava i te mau ohipa pohe, ia ti’a ia tatou ia haamori i te Atua ora. No reira te Kirito i riro ai ei araivavao no te hoe faufaa api ; ua pohe oia ei taraehara i te mau hapa i ravehia i te tau o te Faufaa tahito ; i ti’a ai i te feia i nominohia ra ia faataoahia i te ’āi’a mure ore i parau-fafau-hia ra.

  - O te Parau ïa a te Atua.

HIMENE : "Panis angelicus" (Raanuu api 290) (ad libitum)

ALLELUIA
Alleluia. Alleluia.
O vau te päne ora e pou mai mai te ra’i mai,        Ioa 6, 51
te na ô maira te Fatu ;
o te amu i taua päne ra, e ora ïa e a muri noa atu.
Alleluia.

EVANELIA
                                                                      « O ta’u tino teie, o ta’u toto teie »
† A taio tatou i te Evanelia a Mareko peata     14, 12-16.22-26
’E, tae a’era i te mahana matamua o te mau faraoa faahopue-ore-hia, ei reira te Pāsa e tupu ai, ua parau maira tana mau pipi ia Iesu : « Ei hea matou e haere ai e faanahonaho i te Pāsa, ia amu oe ? » Ua tono atura oia i na pipi nana, ’e ua na ō atura ia raua : « Haere i roto i te oire ; e farerei orua i te hoe taata i te hopoiraa i te hoe farii pape, e pee atu orua iana. ’E, i te vahi e tomo ai oia, e parau atu orua i te fatu fare : te ui mai ra te orometua, tei hea ta’u piha e amu ai au i te Pāsa ’e ta’u mau pipi atoa ? ’E na taua taata ra e faaite mai ia orua i te hoe piha rahi, i te tahua i nia, ua atuatu ’e ua nahonaho. Ei reira outou e faanehenehe ai i ta tatou amuraa māa. » Haere atura taua na pipi ra, ’e, ia tae atura i te oire, ua itea atura ia raua te mau mea atoa, mai tei faaitehia mai e Iesu, ’e ua faaineine ihora raua i te Pāsa. ’E, te tamāa ra ratou, ua rave ihora Iesu i te pāne, e ori a’era te Atua i te haamaitaihia e ana, ua vavahi ihora oia i taua pāne ra, ’e ua tuu atura ia ratou ra, na ō atura : « A rave mai, o ta’u tino teie. » ’E, i muri mai, rave ihora oia i te au’a, ’e oti a’era te Atua i te haamaitaihia e ana, ua tuu atura ia ratou, ’e ua inu ihora ratou atoa. ’E ua na ō atura oia ia ratou : « O ta’u toto teie o te Faufaa, o te ha’amani’ihia no te taata e rave rahi. Oia mau tā’u e parau atu nei ia outou : e ore roa vau e inu faahou i to te tumu vine e tae noa atu i te mahana e inu ai au, ’e o outou atoa, i te mea api i roto i te Basileia o te Atua. » ’E, oti a’era te salamo i te himenehia, haere atura ratou i te mou’a ra o Oliveta.

- Haapopou tatou i te Parau a te Atua.