Te Toru-Tahi Mo'a B

TE TORU-TAHI MO’A- B
Oro’a hanahana

TAIORAA MATAMUA
                                                                « O te Fatu anae ra te Atua, i nia i te rai e i raro ae atoa i te fenua nei ; e aita’tu »
A taio tatou i te puta Deuteronomi   4, 32-34.39-40
Ua parau atura Mose i te nunaa : « E ui noa na oe, mai i te mau mahana tahito mai â, i mua ia oe, mai te mahana mai â i hamani te Atua i te taata i nia i te fenua nei, e mai te tahi pae rai ra tae roa’tu i te tahi pae, ua tupu anei te hoe mea mai teie iho nei, e ua itea hia’nei mai mua mai â e, ua faaroo te hoe nunaa i te reo no te Atua i te parauraa mai no roto mai i te auahi, mai ta oe hoi i faaroo ra, e te ora noa nei â oe ; ua na reira’nei te Atua ma te taeraa mai e ma te rave i te hoe nunaa nona iho i roto i te mau nunaa’toa ra, na roto i te tamataraa, e te tapao, e te ohipa mana, e te tamaî, e te rima puai, e te rima i faatoro hua hia, e te mau orama riaria, mai ta te Fatu ra to outou Atua i rave no outou i Aiphiti, i te hioraa’tu to oe mata. E faî hua na oe i teienei mahana, e haamanao hoi oe i roto i to mafatu e, o te Fatu anae ra te Atua i nia i te rai e i raro ae atoa i te fenua nei, e aita’tu. E haapao oe i tana mau faaueraa e tana mau ture, ta’u e poroi atu ia oe, ia maitai oe e to tamarii atoa i muri ae ia oe ra, e ia maoro hoi to oe parahiraa i nia i te fenua, ta te Fatu ra to Atua e horoa mai na oe ra. »

  - O te Parau ïa a te Atua.

SALAMO 32, 4-5, 6-9, 18-19, 20-22
R/
E ao to te nunaa
o te Fatu ra to ratou Atua !

Ua tia hoi te parau a te Fatu,
e e parau mau anae ta’na mau ohipa atoa ra.
Te here nei oia i te parau-tia e te parau-au,
ua î hoi te ao atoa nei i te here a te Fatu.

Na te parau a te Fatu i oti ai te mau rai ;
e to ratou atoa ra nuu, na roto i te aho o tona ra vaha.
Ua parau hoi oia, e oti aera ;
ua faaue oia, e ua mau atura.

Inaha, tei nia te mata o te Fatu i te feia e mataû iana ra,
e i nia i te feia e tiaturi i tona ra aroha.
Ei faaora i to ratou varua i te pohe,
E ei faaamu ia ratou i te tau oê ra.

Te tiaturi mai ra to matou varua i te Fatu,
o oia hoi to matou turu e to matou paruru.
Ei i nia ia matou to oe here, e te Fatu e,
mai ia matou i tiaturi ia oe na.

TAIORAA PITI
                                               « E Varua faatamarii rā tei horohia mai ia outou ’e nona tatou e tiaoro ai e : « Aba, e te Metua e. »
A taio tatou i te epitore a Paulo peata i to Roma       8, 14-17
E au mau taeae e, no te mea, te feia e arataihia e te Varua o te Atua, e tamarii ïa ratou na te Atua. E ere hoi te Varua i horoahia mai ia outou i te Varua faatītī, a mata’u faahou ai outou ; e Varua faatamarii rā tei horohia mai ia outou, ’e nona tatou e tiaoro ai e : « Aba, e te Metua e. » Na taua hoi Varua ra, e faaite mai i to tatou varua e : e tamarii tatou na te Atua. E tamarii na te Atua ra, e feia tufaa atoa ïa tatou, e feia tufaa i te Atua, e feia tufaa ’e te Kirito atoa ra ; te amo nei hoi tatou i te mauiui ’e oia atoa ra, ia faahanahanahia tatou ’e oia atoa ra.

  - O te Parau ïa a te Atua.

ALLELUIA
Alleluia. Alleluia.
Ia haamaitaihia te Metua, e te Tamaiti, e te Varua-Maitai :  cf. Ap 1, 8
te Atua e vai nei, tei vai na e, o te haere mai nei !
Alleluia.

EVANELIA
                                         « A papetito atu ai ia ratou i te i’oa o te Metua ’e o te Tamaiti ’e o te Varua-Maitai »
† A taio tatou i te Evanelia a Mataio peata    28, 16-20
I teie tau ra, area na pipi tino ahuru ma hoe ra, haere atura ïa i Galilea i te mou’a ta Iesu i faaue ia ratou e haere i reira. ’E, ite a’era ratou iana, ua tahopu ihora ratou ; feaa ihora rā te tahi pae. Ua faafatata maira Iesu, ’e ua parau maira ia ratou, na ō maira : « Ua hope roa i te pūpūhia mai ia’u te mau mana i te ra’i ’e i te fenua nei. No reira, a haere outou, a faariro i te mau nunaa atoa ei pipi na’u, a papetito atu ai ia ratou i te i’oa o te Metua ’e o te Tamaiti ’e o te Varua-Maitai, ma te haapii atu ia ratou i te haapao i te mau mea atoa tā’u i faaue atu ia outou. ’E inaha, tei ia outou na vau, i te mau mahana atoa e tae noa atu i te hopea o teie nei ao. »

- Haapopou tatou i te Parau a te Atua.