Te Utuafare Mo'a B

TE UTUAFARE MO’A o Iesu, Maria e Iosepha - B

Oro’a

A taio tatou i te puta Genese                                                                                             15, 1-6 ; 21, 1-3
151. [E oti aera te reira,] Te reo maira o te Fatu ia Aberama i te orama ra i te naô raa e : Eiaha e mataû, e Aberama e, o vau to oe paruru, e to oe taime rahi. 2.Ua parau atura Aberama e : e te Fatu, e te Atua e, e aha ta oe e ho mai ia’u ? Inaha, e pohe hoi au ma te tamarii ore, e e riro ta’u mau taoa i tera Damaseko, te tamaiti a Eliezera, te tiaau o to’u nei utuafare. 3.Ua parau faahou o Aberama e : aore oe i ho mai i te huaai no’u, e inaha, to’u nei tavini e riro ïa ei taata aia no’u nei. 4.Aore i mahia, tae faahou maira te reo o te Fatu iana i te naôraa e : e ore teie e riro ei taata aia no oe ; te taata rà no roto mai i to opu, o te riro ïa ei taata aia no oe na. 5.Aratai ihora oia iana i rapae, naô aera iana : a nânâ i to mata i nia i te rai, a taio oe i te mau fetia, mai te mea ra e, e tia ia oe. E ua naô â iana e : mai te reira’toa to oe na huaai. 6.Faaroo atura Aberama i te Atua, e ua haapao hia te reira ei parautia nana ra. 211.Ua aroha mai te Fatu ia Sara, mai tana i parau fafau maira, e ua faatupu i tana i faaite maira. 2.Ua tô hoi oia e ua fanau aera i te tamaiti i tona ra ruhiruhiaraa, e i te tau mau iho â i faaite atea hia mai e te Atua iana ra. 3.Mairi ihora Aberahama i te ioa i tana tamaiti ta Sara i fanau nana ra, ia Isaaka.

  (No te faaite e, ua hope te taioraa, e parau te taata taio : O te Parau ïa a te Atua.)

SALAMO                                                                                                                104,1-2, 3-4, 5-6, 8-9
1.E haamaitai i te Fatu, a tiaoro i tona ra ioa,
e faaite i tana mau ohipa tuiroo i rotopu i te mau nunaa !
2.A himene iana, a faaoto i te mau pu,
e faaite haere i tana ra mau ohipa maere !

3.E faahaha outou iô te taata i tona ra ioa moâ,
oâoâ to te mau mafatu o tei imi atu i te Fatu !
4.A imi i te Fatu e tona ra puai,
a imi ma te tuutuu ore i tona ra mata !

5.A haamanao i te mau ohipa faahiahia tana i rave
tana mau semeio e te mau ture no roto mai i tana ra vaha !
6.E te huaai o Abrahama e o tana ra tavini,
e te tamarii a Iakoba e i maiti hia e ana ra.

8.Ua manao tamau mai oia i tana ra Faufaa,
i te parau tana i tuu mai no te tauatini raa o te mau ui,
9.e parau faaau tana i fafau ia Aberahama,
e tapu tana i tapu ia Isaaka.

A taio tatou i te epitore i te mau Hebera                                                                          11, 8.11-12.17-19
118.No te faaroo i faarii ai Aberahama i te nominoraa a te Atua o tei faaue mai iana e haere i te hoe fenua, o te noaa mai iana ei ’āi’a, ’e ua reva atura oia, ma te taa ore i te vahi e haerehia e ana ra. 11.No te faaroo, rahi noa ai tōna paari, tō ihora Sara ’e ua fanau maira i te huaai, ua manao hoi oia e, e parau mau ta tei parau fafau mai iana ra. 12.’E no reira, no ō mai i te taata hoe ra - ’e oi pohe roa hoi taua taata ra - fanauhia maira te huaai, mai te fetia o te ra’i ra te rahi ’e mai te one tahatai, eita e hope ia taio… 17.No te faaroo i pūpū ai Aberahama ia Isaaka, iana i tamatahia e te Atua. Ua horoa oia i tāna tamaiti fanau tahi ei tutia, oia te taata i roto iana te parau i fafauhia mai ra. 18.Nona hoi te parau i parauhia mai ra : Na roto ia Isaaka e noaa ai to oe huaai, o te topahia i to oe iho i’oa. 19.Manao ihora oia e, e mana to te Atua ia faatiafaahou i tei pohe ra ; o te tumu ïa i noaa faahou mai ai iana tōna tamaiti, ’e ua riro atura tei reira ei taipe.

  (No te faaite e, ua hope te taioraa, e parau te taata taio : O te Parau ïa a te Atua.)

Alleluia. Alleluia. Ia haamaitai hia te ioa o te Fatu, oia tei haere mai ! Te Fatu ra, o te Atua ïa, ua hiti mai tona maramarama i nia ia tatou ! Alleluia.

 A taio tatou i te Evanelia a Luka Peata                                      2, 22-40 (Taioraa haapotohia : 2, 22.39-40)
222.E tae a’era i te mahana e tamāhia ai raua, mai tei au i tei faauehia mai e te ture a Mose ra, hopoi atura Maria raua o Iosepha i te tamaiti iti i Ierusalema no te pūpū iana i mua i te aro o te Fatu. [Faaearaa o te taioraa haapotohia]

23.Ua papaihia hoi, i roto i te ture a te Fatu : « Te mau tamaroa matahiapo atoa, ua mo’a ïa i te Fatu. » 24.’E no te hopoi atoa i e piti uupa, e aore rā, e piti fanau ’ū’ū’aira’o ei tutia, mai tei parauhia i roto i te ture a te Fatu. 25.’E inaha, tei Ierusalema te hoe taata, o Simeona te i’oa ; e taata parautia oia ’e te paieti hoi, te tiai ra oia i te haamahanahanaraa no Iseraela ’e tei nia iana te Varua-Maitai. 26.Ua heheu mai te Varua-Maitai iana e, e ore oia e pohe hou a ite ai i te Kirito a te Fatu ra. 27.Ua arataihia maira oia e te Varua-Maitai i te hiero. Ia hopoi mai na metua i te tamaiti, ia Iesu, e rave i tei titauhia nona e te ture ra, 28.ua rave ihora Simeona i te tamaiti iti, tapea a’era i roto i tana rima, ’e ua haamaitai atura i te Atua, i te na ōraa e : 29.« I teienei, e te Fatu e, e tuu noa oe i tō tavini nei, ia reva ma te hau ; inaha hoi, mai ta oe i parau fafau mai ra, 30.ua ite ta’u mata i te ora na oe, 31.o ta oe i faaineine i mua i te mata o te mau nunaa atoa. 32.O te tiarama ïa e heheuhia ai oe i te mau nunaa etene ra, ’e o te hanahana hoi no to oe nunaa o Iseraela. » 33.Maere ihora te metua tane ’e te metua vahine o te tamaiti i tei parauhia nōna. 34.Ua haamaitai atura Simeona ia ratou ’e ua parau atura i tōna metua vahine ia Maria : « Ua haapaohia teie tamaiti iti ei hi’araa no to Iseraela e rave rahi ’e ei tia-faahou-raa-hoi no to Iseraela e rave rahi. E riro oia ei tapao e mārōhia e te taata. 35.O oe rā, e putapū to oe varua i te ’o’e. ’E e na reira e itehia ai te mau manao huna o na mafatu e rave rahi. » 36.Te vai atoa ra te hoe peropheta vahine, o Ana, e tamahine na Phanuela, no te opu o Asera. Ua paari roa oia. E hitu ōna matahiti i te parahiraa i te tane tāna i faaipoipo i tōna vai-api-raa, 37.i te poheraa tāna tane, ua parahi vahine ’ivi noa oia ’e ua rae’a iana te va’u ahuru ma maha o te matahiti. E ore oia e faarue i te hiero, e haamori noa rā oia i te Atua, ma te pure ’e te neseteia, i te pō ’e te ao. 38.Tae maira oia, i reira ra, haamaitai atura i te Fatu, ’e ua haamata ihora i te ta’o i te parau no taua tamaiti iti ra i te feia atoa e tiai i te faaoraraahia o Ierusalema.

[Tuatiraa o te taioraa haapotohia :]

39.Hope a’era ia raua te mau mea atoa i faauehia mai e te ture a te Fatu ra, hōho’i atura raua i Galilea i to raua iho oire mau, i Nazareta. 40.Tupu a’era taua tamaiti ra, itoito atura ; ua ī oia i te paari ’e tei nia iana te here o te Atua.