10e dimanche T.O.

DOMINIKA 10 NO TE TAU NOA

A taio tatou i te puta toru no te mau Arii (17, 17-24)

I te mau mahana ra, e i muri i te reira, roohia ihora te tamaiti a taua vahine ra, (e metua vahine utuafare oia) i te maî pohe ; e mai rahi, aita e aho toe. Ua parau atura te vahine ia Elia : « E aha ta’u ia oe, e taata o te Atua e ? I haere mai anei oe ia haamanao hia ta’u mau hara, e ia taparahi oe i ta’u tamaiti na? » Ua parau maira Elia iana : « A horoa mai i to tamaiti ia’u nei. » Ua rave ihora oia no nia mai i tona éé, e ua hopoi i roto i te piha, tana i parahi ra, e ua tuu i nia i tona ra roi. Ua tiaoro atura oia i te Fatu, naō atura : « E te Fatu, ta’u Atua e ! o te vahine ivi nei, tei faaamu ia’u nei, ta oe i haapeapea nei, ma te taparahi i tana ra tamaiti ? » Ua titoo aera oia i nia iho i te tamaiti ra ; Tai toru tona faitoraa i te Fatu, i te naōraa e : « E te Fatu, e ta’u Atua e, te ani nei au ia hoi mai te varua o teienei tamaiti i roto i tona ra tino ! » Ua faatia aera te Fatu i te aniraa o Elia, e ua hoi maira te varua o te tamaiti i roto iana ra, e ua ora faahou ! Ua rave ihora Elia i te tamaiti, e ua hopoi no nia mai i te piha i roto i te fare i raro, ma te horoa’tu i tona ra metua vahine i te naōraa’tu iana e : « Inaha, ua ora to tamaiti ! » Ua parau atura te vahine ia Elia : « O te mea teie i ite ai au e, e taata mau oe no te Atua, e e parau mau te parau a te Atua i roto i to vaha na. » - O te Parau ïa a te Atua.

SALAMO 29, 3-4, 5-6ab, 6cd.12, 13

E te Fatu e, e te Atua e, i tiaoro noa na vau ia oe,
e ua faaora mai oe ia’u.
Na oe, e te Fatu e, i faahoi mai i to’u varua mai Hade mai,
e ua faaoraora mai oe ia’u, ia ratou i tei haere i raro i te apoo ra.

A pehe i te Fatu, outou atoa na tei here iana,
a arue atu i te manaoraa o tona mo’araa.
E uana poto noa hoi tona riri,
tona râ hamani-maitai, no te oraraa taatoa ïa.

I te ahiahi e tupu ai te oraraa taatoa ïa ;
I te ahiahi e tupu ai te roimata, poipoi ae râ, o te umere-oâoâ ïa.
Ua faariro oe i to’u nei hevaraa ei oriraa oâoâ,
ua tatara oe i to’u nei ahu-paau e ua tatua mai oe ia’u i te oâoâ.

No reira, e haamaitai atu â ta’u mafatu ia oe,
ma te faaea ore,
e te Fatu e ta’u Atua e,
e arue atu â vau ia oe e a muri noa’tu.

A taio tatou i te epitore a Paulo peata i to Galatia (1, 11-19)

Te faaite atu nei au ia outou, e au mau taeae na, e ere te Evanelia i a’ohia e au ia outou i te Evanelia no ō mai i te taata ra. Aita atoa taua Evanelia nei i tuuhia mai ia’u, ’e i haapiihia mai ia’u e te hoe taata ; e mea heheuhia rā e Iesu-Kirito ra. Ua faaroo hoi outou i tō’u huru i te matamua, a vai noa ai au i roto i te haapaoraa Ati-Iuda, ’e i tā’u hamani ino hau a’e i te Etaretia a te Atua : ua haamata hoi au i te haavï roa iana. Ua haere tō’u itoito no te haapaoraa Ati-Iuda i te rahi-roa-raa, ’e, i roto i tō’u nunaa, oi hemo roa atura ia’u te taatoaraa o te feia hoe ā paari to matou, ’e ua riro vau ei turu etaeta no te mau peu i tuuhia mai e to matou hui metua. Ua faataa mai rā te Atua ia’u mai te opu mai ā o tō’u metua vahine, ’e ua nomino mai oia ia’u na roto i tāna karatia. ’E, i te mahana i hinaaro ai oia i te heheu mai ia’u i tāna Tamaiti, ia faaite haere au iana i te etene, i reira ihora, ma te ani ore i te manao taata, ’e ma te ore e haere i Ierusalema i pihai iho i te taata i riro ei apotoro na mua ia’u, ua reva atura vau i Arabia, ’e, muri a’era, ua hoi maira vau i Damaseko. ’E, hope a’era e toru matahiti, haere atura vau i Ierusalema e farerei ia Kepha, ’e ua parahi ihora vau i pihai iho iana i na mahana hoe ahuru ma pae. Aita rā vau i farerei i te tahi atu apotoro, maori ra ia Iakobo, te taeae o te Fatu. - O te Parau ïa a te Atua.

ALLELUIA (Luk 7, 16)

E peropheta rahi tei ti’a mai nei i rotopu ia tatou, ’e ua haere mai te Atua i tōna nei nunaa.

A taio tatou i te Evanelia a Luka peata (7, 11-17)

I taua anotau ra, haere atura Iesu i te hoa oire, o Naina te io’a ; te apee atoa mai ra iana tāna mau pipi ’e te hoe hoi tiaa rahi taata. ’E, fatata maira ia Iesu te uputa oire, inaha te hopoihia mai ra i rapae te hoe taata pohe. O te tamaiti fanau tahi ïa o te hoe vahine ’ivi. Te pee mai ra te hoe tiaa rahi taata no te oire i taua vahine ra. I tōna iteraa atu iana, aroha roa atura te Fatu iana, ’e ua na ō atura : « Atira te oto ! » Ua faafatata atura oia, ’e ua tapea atura i te iri hopoiraa ; faaea noa ihora te taata e hopoi ra. Ua parau atura oia : « E teie nei tamaiti e, te faaue atu nei au ia oe : a ara ! » Parahi maira taua taata pohe ra ’e ua haamata maira i te paraparau. Ua tuu atura Iesu iana i tōna metua vahine. Ua roohia-anae-hia ihora ratou i te mata’u, ’e ua haamaitai atura i te Atua, na ō a’era : « E peropheta rahi tei ti’a mai nei i rotopu ia tatou, ’e ua haere mai te Atua i tōna nei nunaa. » Parare atura taua parau ra e ati noa a’e Iudea ’e te mau fenua i piri mai. - Haapopou tatou i te Parau a te Atua.