12e dimanche T.O.

DOMINIKA 12 NO TE TAU NOA

A taio tatou i te puta a Zakaria peropheta (12, 10-11a ; 13, 1)

O te Parau ia a te Atua : E e ninii au i nia i te utuafare o Davida e i nia i te mau taata no Ierusalema i te varua o te karatia e o te pure, e e tutonu ratou ia’u nei ta ratou i patia ; e e oto ratou iana ma te oto, mai te i te tamaiti fanautahi, e e mauiui ratou iana, mai te mauiui i tupu i te pohe o tona matahiapo. E oto rahi i Ierusalema, i te reira mahana. I te reira mahana, e iriti hia mai te pape pihaa no te utuafare o Davida e no tem au taata no Ierusalema ei hopuraa no te taata hara, e no te vahine viivii ra. - O te Parau ïa a te Atua.

SALAMO 62,2, 3-4, 5-6, 8-9

E te Atua e, e tau Atua e, te imi nei au ia oe,
ua pohia tau varua ia oe.
Te oriorio nei to’u tino no oe,
mai te fenua marô e te poiha e te pape ore.

Te hinaaro nei oe e hio ia oe i te vahi moà ra,
e ite i to mana e i to hanahana.
Mea au ae to aroha i te ora,
e umere to’u utu ia oe.

Te hinaaro nei au e haamaitai ia oe i tō’u oraraa taatoa,
e faateitei au i tau rima i ta oe na ioa.
E maha tau varua ia oe mai tei te toahua e te mei.
E arue atu tau vaha ia oe ma te oaoa.

O oe hoi tei tauturu mai ra ia’u,
e teie nei te oâoâ nei au i to maru pererau.
Te piri atu nei tau varua ia oe,
o to rima atau hoi to’u turu.

A taio tatou i te epitore a Paulo peata i to Galatia (3, 26-29)

E au mau taeae e, e tamarii anae hoi outou na te Atua no to outou faaroo ia Iesu-Kirito. Outou atoa hoi i papetitohia i roto i te Kirito, ua ahu ïa outou i te Kirito. Aita atura e Ati-Iuda, aita atura e Heleni, aita e tîtî, aita e tiama, aita e tane, aita e vahine : ua riro hoi outou atoa ei hoe i roto i te Kirito ia Iesu . No te Kirito outou na, e huaai ïa outou no Aberahama, e feia ’āi’a, mai te au i tei parau-fafau- hia mai ra. - O te Parau ïa a te Atua.

ALLELUIA (Ioa 10, 27)

Ua parau atura oia ia raua te Fatu : E faaroo mai tā’u mau mamoe i ta’u reo, ’e ua ite au ia ratou, ’e e pee mai ratou ia’u.

A taio tatou i te Evanelia a Luka peata (9, 18-24)

Muri a’era, ’ōpa’i ’ē a’era Iesu i te tiaa rahi taata e pure ; tei reira atoa ra hoi tāna mau pipi. Ua atura oia ia ratou : « O vai au i ta te tiaa rahi parauraa ? » Ua pahono maira ratou : « O Ioane-Papetito ; i ta te rahi ra mau taata, o Elia ; i ta te tahi atu ā mau taata, o te hoe ïa o te mau peropheta tahito, o tei tiafaahou mai nei. » Ua parau atura Iesu ia ratou : « O vai rā vau i ta outou na parauraa ? » a parau maira Petero, na ō maira : « O te Kirito a te Atua ra. » Ua opani etaeta atura Iesu ia ratou, eiaha roa ratou ia faaite noa a’e i taua parau ra. ’E ua parau atura oia ia ratou : « Ia mauiui rahi roa te Tamaiti a te taata e ti’a ai, ia faaruehia oia e te feia paari, te tahu’a rarahi ’e te haapii ture e ti’a ai, ia taparahi pohe-roa-hia ; ’e ia tae i te toru o te mahana e tiafaahou ai oia. » ’E ua parau atura oia i te taata atoa : « I hinaaro te tahi taata i te pee mai ia’u, e faarue oia iana iho, a rave ai i tana tatauro i te mau mahana atoa, a pee mai ai ia’u. O tei hinaaro hoi i te tapea i tōna ora ra, e ere oia i te ora ; o te tuu rā i tōna ora no’u nei, e ora mau ā ïa. » - Haapopou tatou i te Parau a te Atua.