DOMINIKA 13 NO TE TAU NOA

A taio tatou i te puta toru no te mau Arii (19, 16b.19-21)

Ua parau atura te Fatu na te Atua i te peropheta ra ïa Elia i te nao raa e : « E faatahinu oe ia Elisaia, te tamaiti a Saphata ei peropheta mono ia oe na. » Haere atura Elia mai reira’tu, e ite atura oia ia Elisaia, te tamaiti a Saphata ra, o tei arote ra i na apitiraa puaatoro e hoe ahuru e ma piti, oia te hoe o te feia arote i ropu i na apitiraa puaatoro e hoe ahuru e ma piti. E ia tae Elia iana ra, u ahuri atura oia i tona ahu i nia ia Elisaia. Ua faarue oia i tana ra mau puaatoro ma te peeraa iana e te naōraa hoi e : « Te ani nei ai ia haere au e hoi i ta’u metua tane e ta’u metua vahine a pee atu ai ia oe. » Naō atura oia : « A haere, e a hoi mai ; ua oti ta’u ohipa ia oe na. » E ia hoi mai oia, ua rave ihora oia i e piti puaatoro, e ua tupai, e te raau arote puaatoro ra o te vahie ïa no te tunuraa i te iō. Ua horoa’tura oia i te taata e ua amu ratou. Tia aera oia i nia, reva (tura ma te pee atu ia Elia e te raverave iana ra. - O te Parau ïa a te Atua.

SALAMO 16,1.2a.5, 7-8, 9-10, 2b.11

A paruru mai oe ia’u, e te Fatu e, tei roto ia oe to’u haapuraa.
A parau outou i te Fatu : « E to’u Fatu e,
E te Fatu e, o oe ta’u nei tufaa e ta’u nei auâ,
na oe e paruru papu i ta’u tuhaa.

Te haamaitai nei au i te Fatu o tei aô mai ia’u nei,
e ua hapii maite mai ta’u manao-aau ia’u i te rui ;
ua tuu â vau i te Fatu i mua i to’u nei aro ma te tuutuu ore ;
o oia hoi to’u rima-atau e eita roa vau e aueue.

No reira ua oâoâ to’u mafatu, e ua popou to’u varua,
E ua vai maite noa to’u nei tino ma te peapea ore.
No te mea e ore hoi oe e faarue atu i to’u Varua i Hade ;
e e ore roa hoi oe e tuu i to taua ia ite i te tahuti no te apoo.

E tō’u Fatu e, o oe to’u maitai, e aita’tu ai !
A haapii mai oe i te èà o te ora ;
i mua i to aro na te ïraa i te oâoâ ;
i to rima-atau hoi te mau oâoâraa etereno ra.

A taio tatou i te epitore a Paulo Peata i to Galatia (5, 1.13-18)

E au mau taeae e, ua faatiama te Kirito ia tatou, ia tiama mau ā tatou. A tapea tamau maoti outou i taua tiamaraa ra, eiaha outou ia tuu-faahou-hia i raro a’e i te zugo tavini ra. Ua nominohia hoi outou, a au mau taeae e, ia noaa mai ia outou te tiamaraa. Eiaha rā taua tiamaraa ra ia riro   ei otoheraa na te tino. Ia aratai rā te aroha taeae ia outou ia tavini outou te tahi i te tahi. E hope roa hoi te ture i te haapaohia i roto i te parau hoe nei : E here oe i to taata tupu mai ia oe iho na. Ia au rā outou i te taehae i te hohoniraa ’e te amuraa te tahi i te tahi, e ara ïa ’o te mou hoi outou ia outou iho. Teie tā’u parau : ia arataihia outou e te Varua-Maitai, e ore ïa outou e rave i te mau mea hinaarohia e te tino. E patoi hoi te hinaaro o te tino nei i to te Varua ’e e patoi te hinaaro o te Varua i to te tino. Te mārō nei raua iho, ’e no reira eita outou e rave i tei hinaarohia e outou. Ia arataihia rā outou e te Varua, aore ïa outou i raro a’e i te ture. - O te Parau ïa a te Atua.

ALLELUIA (cf. 1 Arii 3, 9 ; Ioa 6, 68c)

A parau mai oe, e te Fatu e, te faaroo nei hoi au to tavini nei ; tei ia oe na hoi te mau parau o te ora mure ore.

A taio tatou i te Evanelia a Luka peata (9, 51-62)

’E fatata a’era te tau e afai-‘ē-hia ai oia mai roto atu i te ao nei, reva atura Iesu i Ierusalema ma te feaa ore te manao. Ua tono atura oia i te ve’a na mua iana. Haere atura ratou ’e tomo atura i roto i te hoe oire iti i Samaria, e faanehenehe i te hoe tapaeraa nona. Aita rā to reira mau taata i faarii mai iana, i te mea e, te haere ra oia i Ierusalema. Ite a’era na pipi ra, o Iakobo raua o Ioane, i te reira, ua parau atura raua : « E te Fatu, e ti’a anei ia oa ia faaue maua i te auahi, mai nia mai i te ra’i, ’e ia haapau ia ratou ? » Ua fariu atura rā Iesu, ’e au a’o atura ia raua. ’E ua reva atura i te tahi atu oire iti. Te haere ra ratou i taua oire iti ra, ua parau maira te tahi taata ia Iesu : « E pee atu vau ia oe i te mau vahi atoa e haerehia e oe. » Ua parau atura Iesu : « A apoo to te alope, e ofaaraa to te manu o te reva, area te Tamaiti a te taata, aita ōna e tuaro’i. » Ua parau atura Iesu i te tahi atu taata : « A pee mai oe ia’u. » Ua pahono maira taua taata ra : « A tuu a’e na oe ia’u e haere e huna i tō’u metua tane. » Ua parau atura rā Iesu iana : « A vaiiho atu na tei pohe e huna i to ratou i pohe ra ; o oe rā, a haere, a poro haere i te Basileia o te Atua. » Ua parau maira te tahi atu ā taata : « E te Fatu e, e pee atu vau ia oe, e tuu noa rā oe ia’u e aroha i to te utuafare. » Ua parau atura Iesu iana : « O tei tuu i tana rima i nia iho i te arote, a hio ai i muri, e ore ïa e au i te Basileia o te Atua. » - Haapopou tatou i te Parau a te Atua.