14e dimanche T.O.

DOMINIKA 14 NO TE TAU NOA

A taio tatou i te puta a Isaïa peropheta (66, 10-14c)

E oaoa outou, e to Ierusalema’toa ra ! E e popou noa ïa i roto iana, outou atoa tei here iana ! E oāoā rahi roa outou, e oia’toa outou atoa o tei oto iana ! Ia ote outou, e ïa î outou i te û o tona mahanahana, ia noaa mai ia outou te û, e ia î outou i te mauruuru o tona mau huru hanahana. No te mea teie te parau a te Fatu : « Inaha, te faatahe nei au i nia iana mai te anavai o te hau ra, e mai te pape pue i te hanahana o te mau etene. » Ta outou e ote, e e afai hia outou i te û, e i nia i te turi e hii ai ratou ia outou. Mai te metua vahine e tauahi i tona aiu ra, mai te reira vau i te tamahanahanaraa’tu ia outou na, e i Ierusalema outou e mahanahana’i. E ite outou, e e oāoā to outou mafatu, e e tupu faahou to outou mau ivi mai te raau rii api ra ; e itea hia te rima o te Fatu e tona mau tavini. - O te Parau ïa a te Atua.

SALAMO 65,1-3a, 4-5, 6-7a, 16.20

A popo na i te Atua, e te ao taatoa e !
A himene i te hanahana no tona i’oa,
a arue atu I tona hinuhinu.
A nao atu i te Atua e : « Aue oe e te au ïa matau hia e !

I mua i to aro e tipapa te ao taatoa ;
e himene oia ia oe, e himene oia no to oe na io’a. »
A haere mai na e hio i te mau ohipa taa é a te Atua,
e mau ohipa matautau no te tamarii a te taata nei !

Ua riro ia’na te miti ei fenua marō.
Ua na raro noa te taata i te haere na roto i te anavai aano.
Ei iana to tatou oāoā.
Oia te Arii i etereno tona mana.

Haere mai na, e te feia mataû i te Atua e !
E tuatapapa vau i tana i rave no tau nei varua.
Ia haamaitai hia te Atua, oia tei ore i haapae i to’u pure
e tei ore i faaatea i tona aroha ia’u.

A taio tatou i te epitore a Paulo peata i to Galatia (6, 14-18)

E au mau taeae e, area vau, eiaha vau ia teoteo, maori ra i te tatauro o to tatou Fatu o Iesu-Kirito ; No taua tatauro ra hoi, e mea faatataurohia teie nei ao ia’u ; ’e o vau hoi, e mea faatataurohia ïa i teie nei ao ia Iesu-Kirito hoi, aita o te peritome e faufaa’e aita atoa hoi o te peritome ore ; teie noa te mea e au ia imi : ia riro tatou ei poieteraa api. Ei hau, ei aroha to te feia atoa e haapao i taua avei’a nei ’e i te Iseraela o te Atua. Eiaha ei taata e haapeapea mai ia’u, te vai nei hoi te mau puta o te Kirito i nia i to’u nei tino. E au mau taeae e, ei to outou varua te karatia a to tatou Fatu ra a Iesu-Kirito. Amene. - O te Parau ïa a te Atua.

ALLELUIA (Kol 3, 15a.16a)

Ia mana te hau o te Kirito i roto i to outou mau mafatu ; ia parahi mai te parau a te Kirito i totopu ia outou ma te rahi atoa o tāna faufaa.

A taio tatou i te Evanelia a Luka peata (10, 1-12.17-20)

I taua anotau ra, ’e muri a’era, ua maiti atura ā te Fatu i na pipi hitu ahuru ’e ma piti, ’e ua tono tataipiti atura ia ratou, na mua iana, i te mau oire’e i te mau vahi atoa e haerehia e ana ra. Ua parau atura oia ia ratou : « Te rahi mau nei te auhune sitona, te iti nei rā te rave ohipa. E pure maoti outou i te fatu o te auhune, ia tono ā oia i te rave ohipa i tāna nei auhune. A haere ! Inaha, te tono atu nei au ia outou, mai te arenio i roto i te luko. Eiaha e afai i te farii moni, eiaha ei pute, eiaha te tāma’a. Eiaha e ti’a noa i te aratia e aroha i te taata. ’E ia tomo outou i roto i te tahi fare, e matāna outou i te parau atu e : “Ei hau i to teie nei utuafare.” ’E, tei reira te hoe tamaiti no te hau ra, e vai mau ā ïa to outou hau i nia i taua taata ra, ’e aita ra, e hoi mai ïa to outou hau i nia ia outou. E parahi outou i roto i taua fare ra, e amu outou ’e e inu hoi i tei horohia mai, e au hoi te rave ohipa i tāna utua. Eiaha outou e haere noa i tera fare ’e i tera fare. Ia tomo outou i roto i te hoe oire, ’e ia ite-maitai-hia outou, e amu outou i te tuu-hia-mai i mua ia outou. E faaora outou i to reira mau ma’i, ’e e parau atu ia ratou : “Ua faafatata mai nei te Basileia o ta Atua ia outou.” Ia tomo rā outou i roto i te hoe oire, ’e aita atura ratou i ite mai ia outou, e haere ïa outou i te aroā a parau atu ai e : “Te repo o to outou oire i piri mai i to matou avae, te ueue atu hei ïa matou i nia ia outou. Ia ite rā outou e : ua faafatata mai te Basileia o ta Atua.” Te parau atu nei au ia outou : i te reira mahana, e māmā a’e te utua a Sodoma i ta taua oire ra. » Hoi faahou maira taua na pipi hitu ahuru ’e ma piti ra ma te oaoa, na ō maira : « E te Fatu, ua vî atoa te demoni ia matou i te mana o to oe na i’oa. » Ua parau atura oia ia ratou : « Ua ite au ia Satane i te mairiraa, mai nia mai i te ra’i, mai te uira ra te huru. Inaha, ua pûpû atu vau ia outou i te mana ia taataahi otou i te ophi’e te pata ’e i te puai atoa hoi o te enemi, ’e aore e mea e ti’a ia rave ino mai ia outou. Eiaha rā outou e oaoa i te mea e, ua vî te mau varua iino ia outou, i te mea rā e, ua tapaohia to outou mau i’oa i nia i te ra’i. » - Haapopou tatou i te Parau a te Atua.

E aore râ, taioraa haapotohia :

A taio tatou i te Evanelia a Luka peata (10, 1-9)

I taua anotau ra, ’e muri a’era, ua maiti atura ā te Fatu i na pipi hitu ahuru ’e ma piti, ’e ua tono tataipiti atura ia ratou, na mua iana, i te mau oire’e i te mau vahi atoa e haerehia e ana ra. Ua parau atura oia ia ratou : « Te rahi mau nei te auhune sitona, te iti nei rā te rave ohipa. E pure maoti outou i te fatu o te auhune, ia tono ā oia i te rave ohipa i tāna nei auhune. A haere ! Inaha, te tono atu nei au ia outou, mai te arenio i roto i te luko. Eiaha e afai i te farii moni, eiaha ei pute, eiaha te tāma’a. Eiaha e ti’a noa i te aratia e aroha i te taata. ’E ia tomo outou i roto i te tahi fare, e matāna outou i te parau atu e : “Ei hau i to teie nei utuafare.” ’E, tei reira te hoe tamaiti no te hau ra, e vai mau ā ïa to outou hau i nia i taua taata ra, ’e aita ra, e hoi mai ïa to outou hau i nia ia outou. E parahi outou i roto i taua fare ra, e amu outou ’e e inu hoi i tei horohia mai, e au hoi te rave ohipa i tāna utua. Eiaha outou e haere noa i tera fare ’e i tera fare. Ia tomo outou i roto i te hoe oire, ’e ia ite-maitai-hia outou, e amu outou i te tuu-hia-mai i mua ia outou. E faaora outou i to reira mau ma’i, ’e e parau atu ia ratou : “Ua faafatata mai nei te Basileia o ta Atua ia outou.” - Haapopou tatou i te Parau a te Atua.