19e dimanche T.O.

DOMINIKA 19 NO TE TAU NOA

A taio tatou i te puta a te Paari (18, 6-9)

E ua itea hia na te reira arui i to tatou ra huitupuna, ia rahi atu ā to ratou ra mataû ore, a ite ai e a faaroo ai i te mau parau tapu i faaite papu hia mai ia ratou ra. Roaa maira hoi i to oe ra mau taata te ora o te feia parautia, e te pohe o te feia parautia ore ra. A faautua’i hoi oe i taua mau enemi ra, ua faaitoito atoa mai oe e ua faateitei ia matou. Te pupu huna noa ra hoi te tamarii parautia a te feia maitatai ra i te tutia, e ua faataa otahi ratou i te hoe ture no te parautia, ia roaa i te feia parautia ra te ino e te maitai atoa ; e ua himene i te mau himene ma te haamaitai o te huimetua ra.- O te Parau ïa a te Atua.

SALAMO 32,1.12, 18-19, 20.22

A umere i te oaoa i te Fatu,
outou e te feia parautia e.
E ao to te nunaa o te Fatu to ratou Atua,
e to te nunaa tana i maiti ei tufaa-aia nona !

Inaha, tei nia te mata o te Fatu i te feia e mataû iana ra,
e i nia i te feia e tiaturi i tona ra aroha,
ei faaroa i to ratou varua i te pohe,
e ei faaamu ia ratou i te tau oê ra.

Te tiaturi mai ra to matou varua i te Fatu,
o oia hoi to matou turu e to matou paruru.
Ei i nia ia matou to oe here, e te Fatu e,
mai ia matou i tiaturi ia oe na.

A taio tatou i te epitore i te mau Hebera (11, 1-2.8-19)

E au mau taeae e, te faaroo, o te tumu ïa e papu ai to tatou tiaturiraa i te mau mea e tiaihia nei, o te ravea atoa hoi e itehia ai te mau mea aore e hiohia nei. No te faaroo i noaa ai te roo maitai i te feia tahito ra. No te faaroo i faarii ai Aberahama i te nominoraa a te Atua o tei faaue mai iana e haere i te hoe fenua, o te noaa mai iana ei ’āi’a, ’e ua reva atura oia, ma te taa ore i te vahi e haerehia e ana ra. No te faaroo i purutia noa ai oia i te fenua i parau-fafau-hia mai ra, mai te taata ’ē ra te huru ; te parahi ra hoi oia i roto i te tiahapa ; oia atoa o Isaaka ’e o Iakoba, na taata ’āi’a ïa, mai iana atoa ra, o te fenua i parau-fafau-hia mai ra. Te tiai ra hoi oia te oire faatinanahia i nia i te niu aueue ore ; o te Atua iho hoi te tahu’a ’e te tamuta o taua oire ra. No te faaroo, rahi noa ai tōna paari, tō ihora Sara ’e ua fanau maira i te huaai, ua manao hoi oia e, e parau mau ta tei parau fafau mai iana ra. ’E no reira, no ō mai i te taata hoe ra - ’e oi pohe roa hoi taua taata ra - fanauhia maira te huaai, mai te fetia o te ra’i ra te rahi ’e mai te one tahatai, eita e hope ia taio… Pohe anae atura taua feia atoa ra ma te faaroo ; aita te mea i parau-fafau-hia mai ra i noaa ia ratou, ua ite rā ratou ’e ua aroha atura i taua mea ra i te atea ’ē. Ua fā’i ratou e, e taata ’e’ē anae ratou ’e te purutia i nia i te fenua nei. Te feia e na reira i te parau, e faaite hua ïa e, e imi ratou i te hoe ’āi’a. Ahiri ratou i nounou i te ’āi’a no reira mai ratou, e ti’a noa ïa ia ratou ia hoi atu i reira, ua taimehia hoi ratou. Ua hinaaro rā ratou i te ’āi’a maitai roa a’e, oia hoi te ’āi’a o te ra’i. I ore ai te Atua i haama i te parau e, o oia to ratou Atua, ’e ua faaineine oia i te hoe oire no ratou. No te faaroo i pûpû ai Aberahama ia Isaaka, iana i tamatahia e te Atua. Ua horoa oia i tāna tamaiti fanau tahi ei tutia, oia te taata i roto iana te parau i fafauhia mai ra. Nona hoi te parau i parauhia mai ra : Na roto ia Isaaka e noaa ai to oe huaai, o te topahia i to oe iho i’oa. Manao ihora oia e, e mana to te Atua ia faatiafaahou i tei pohe ra ; o te tumu ïa i noaa faahou mai ai iana tōna tamaiti, ’e ua riro atura tei reira ei taipe. - O te Parau ïa a te Atua.

E aore râ, taioraa haapotohia :

A taio tatou i te epitore i te mau Hebera (11, 1-2.8-12)

E au mau taeae e, te faaroo, o te tumu ïa e papu ai to tatou tiaturiraa i te mau mea e tiaihia nei, o te ravea atoa hoi e itehia ai te mau mea aore e hiohia nei. No te faaroo i noaa ai te roo maitai i te feia tahito ra. No te faaroo i faarii ai Aberahama i te nominoraa a te Atua o tei faaue mai iana e haere i te hoe fenua, o te noaa mai iana ei ’āi’a, ’e ua reva atura oia, ma te taa ore i te vahi e haerehia e ana ra. No te faaroo i purutia noa ai oia i te fenua i parau-fafau-hia mai ra, mai te taata ’ē ra te huru ; te parahi ra hoi oia i roto i te tiahapa ; oia atoa o Isaaka ’e o Iakoba, na taata ’āi’a ïa, mai iana atoa ra, o te fenua i parau-fafau-hia mai ra. Te tiai ra hoi oia te oire faatinanahia i nia i te niu aueue ore ; o te Atua iho hoi te tahu’a ’e te tamuta o taua oire ra. No te faaroo, rahi noa ai tōna paari, tō ihora Sara ’e ua fanau maira i te huaai, ua manao hoi oia e, e parau mau ta tei parau fafau mai iana ra. ’E no reira, no ō mai i te taata hoe ra – ’e oi pohe roa hoi taua taata ra – fanauhia maira te huaai, mai te fetia o te ra’i ra te rahi ’e mai te one tahatai, eita e hope ia taio… - O te Parau ïa a te Atua.

ALLELUIA (cf. Mat 24, 42a.44)

E ara maoti outou, ia vai ineine atoa outou, no te mea, ei te hora manao-ore-hia e outou te Tamaiti a te taata e tae mai ai.

A taio tatou i te Evanelia a Luka peata (12, 32-48)

I taua anotau ra, ua parau atura oia Iesu i tana mau pipi : « Eiaha oe e mata’u, e teie nei nana iti e, ua ti’a hoi i to outou Metua i te horoa mai i te Basileia no outou. A hoo atu i ta outou faufaa,  a horoa noa atu ai i te moni na te feia veve. A hamani i te pute-moni motu ore na outou ; a haaputu i te taoa pau ore i nia i te ra’i, i te vahi e ore e taea e te eia, ’e e ore e pau i te huhu. No te mea, i te vahi tei reira ta outou taoa ra, tei reira atoa ïa to outou mafatu. Ia tatuahia to outou tau’upu, ’e ia vai ’ama ta outou mori. Ia au outou i te taata i te tiairaa i to ratou fatu, no te iriti iana, ia tae mai oia mai te faaipoiporaa mai, ’e ia pātōtō mai. E ao to taua mau tavini ra, ia roohia ratou e to ratou fatu te ara ra ratou. Oia mau tā’u e parau atu nei ia outou, e riro oia i te tatua i tōna tau’upu, a haaparahi ai ia ratou i nia i te airaa māa, ’e a raverave ai i te māa na ratou. ’E, ia tae mai oia i te piti o te araraa’e i te toru o te araraa, ’e te ara nei ratou, e ao to taua mau tavini ra. Ua ite outou, ahiri te fatu fare i ite i te hora e tae mai ai i te eia, e ore oia e tuu i tōna fare ia vavahi-noa-hia ana. Ia vai ineine atoa outou, no te mea, ei te hora manao-ore-hia e outou te Tamaiti a te taata e tae mai ai. » Ua parau maira Petero iana : « E te Fatu e, no matou anei oe e parau ai i tena parabole, ’e aore rā no te taata atoa ? » Ua pahono atura te Fatu : « O vai hoi te ti’a’au haapao maitai ’e te paari e tuuhia e tōna fatu i nia i tōna atoa ram au tavini, no te opera i ta ratou tuhaa sitona i te taime au ? E ao to taua tavini ra, ia roohia oia e tōna fatu ten a reira ra oia. Oia mau, te faaite atu nei au ia outou, e tuu oia iana i tana mau taoa atoa ra. Ia parau rā taua tavini ra, i roto i tōna mafatu : “ua maoro roa ta’u fatu”, ’e ua haamata ihora i te papa’i i te mau tavini tane’e te mau tavini vahine, ’e ua amu rahi roa ihora, ’e ua inu e taero roa atura, e tae mai te fatu o taua tavini ra i te mahana manao-ore-hia e ana ’e i te hora itea-ore-hia e ana, ’e e faautua iana i te utua teimaha roa, a amui atu ai iana i te feia taiva. E papa’i-rahi-roa-hia teie tavini, ua ite hoi oia i te hinaaro o tōna fatu, ’e aita a’era i faaineine a’e i te fare, ’e aita atoa i haapao noa a’e i te hinaaro o tōna fatu. Area te tavini aore i ite i te hinaaro o tōna fatu, ua rave rā i te ohipa e au i te tairiraa, e iti ïa tōna tairiraahia. O tei horoahia atu i te mea rahi ra, e mea rahi atoa te titauhia atu iana ; ua rahi tei tuuhia atu iana ra, e rahi atoa te anihia atu iana. » - Haapopou tatou i te Parau a te Atua.

E aore ra, taioraa haapotohia :

A taio tatou i te Evanelia a Luka peata (12, 35-40)

I taua anotau ra, ua parau atura oia Iesu i tana mau pipi : « Ia tatuahia to outou tau’upu, ’e ia vai ’ama ta outou mori. Ia au outou i te taata i te tiairaa i to ratou fatu, no te iriti iana, ia tae mai oia mai te faaipoiporaa mai, ’e ia pātōtō mai. E ao to taua mau tavini ra, ia roohia ratou e to ratou fatu te ara ra ratou. Oia mau tā’u e parau atu nei ia outou, e riro oia i te tatua i tōna tau’upu, a haaparahi ai ia ratou i nia i te airaa māa, ’e a raverave ai i te māa na ratou. ’E, ia tae mai oia i te piti o te araraa’e i te toru o te araraa, ’e te ara nei ratou, e ao to taua mau tavini ra. Ua ite outou, ahiri te fatu fare i ite i te hora e tae mai ai i te eia, e ore oia e tuu i tōna fare ia vavahi-noa-hia ana. Ia vai ineine atoa outou, no te mea, ei te hora manao-ore-hia e outou te Tamaiti a te taata e tae mai ai. » - Haapopou tatou i te Parau a te Atua.