TE DOMINIKA 1 NO TE MAHA AHURURAA

A taio tatou i te puta Deuteronomi (26, 4-10a)

Ua parau atura Mose i te nunaa Iseraela : ia pupu atu o’e i te mau oho matamua o ta o’e ra mau hotu, i reira te tahua e rave ai i te été i to rima, e hopoi atu ai i mua i te fata o te Fatu ra o to Atua. E teie ta oe e parau atu i mua i te aro o te Fatu ra o to Atua : « Ia auau mai te taata Suria i ta’u metua ra, o tei haere i Aiphiti ra, e ua purutia oia i reira, aita rea ratou, ua riro atura ei hunaa rahi e te puai, e te taata rahi toa ra. Ua hamani ino mai to Aiphiti ia tatou, e ua faafao mai ia tatou ma te faateiaha ia tatou i te ohipa rahi ra. Ua tiaoro atu tatou i te Fatu ra i te Atua no to tatou hui metua, e ua faaoroo mai oia tatou, e ua hio oia i to tatou faahaehaaraa hia, i to tatou rohirohi e to tatou ahoaho ra. E ua aratai mai oia ia tatou mai Aiphiti ma te rima puai, e ma te rima faatoro hia ra, mai te haamataû rahi, e te tapao e te ravea maere hia : e ua faatomo mai ia tatou i teienei vahi, e ua horoa mai ia tatou i te fenua tahe pape noa te û e te meri. No reira vau i hopoi mai ai i teienei i te mau oho matamua o te mau maâ o te fenua ta te Fatu i horoa mai ia’u nei. » - O te Parau ïa a te Atua.

SALAMO 90 (91.), 1-2, 10-11, 12-13, 14-15ab

O tei parahi i raro ae i te paruru o te Teitei ra,
e o tei faaea i raro ae i te tapoi o te Mana-Hope ra,
e parau ïa i te Fatu :
To’u ïa pare e to’u haapuraa, ta’u Atua, e ta’u e tiaturi nei !

E ore roa e roohia e te ino,
e ore hoi te mai pohe ra e faafatata mai i to oe ra tiahapa :
Ua poroi hoi a oia i tana merahi ia oe,
ei tiai ia oe i to mau haerea’toa ra.

E mau ratou ia oe i to ratou ra rima,
oi tiai noa’tu to avae i te ofai ;
e tataahi noa oe i nia i te liona e te asepi,
i te liona api e te teni ta oe e tataahi.

Ua hiaai rahi hoi oia ia’u, e faaora vau iana ;
e paruru vau iana, no te mea ua haapao oia i to’u nei io’a.
Ia tiaoro mai oia ia’u ra, e faaroo vau iana ;
e i pihaiiho vau iana ia roohia oia e te ati ra.

A taio tatou i te epitore a Paulo peata i to Roma (10, 8-13)

E au mau taeae e, te nafea mai ra rā taua parautia ra : tei pihai iho te parau ia oe na, tei roto i tō vaha, tei roto i tō mafatu. Taua parau ra, o te faaroo ïa ta tatou e a’o haere nei. No te mea,   ia fā’i tō vaha e : o Iesu te Fatu, ’e ia faaroo tō mafatu : ua faatiafaahou te Atua iana mai roto mai i tei pohe ra, e ora ïa oe. Ia faaroo hoi tō mafatu ra, e arataihia ïa oe i te parautia ; ’e ia fā’i tō vaha, e arataihia ïa oe i te ora. Te parau nei hoi te papairaa mo’a : te taata atoa e faaroo iana ra, e ore ïa e vare. Aita atura ïa e huru-’ē-raa i roto i te Ati-Iuda ’e te Heleni. Hoe ā hoi Fatu to te taata atoa, e hamani maitai rahi tōna i te taata atoa e tiaoro iana ra. Te parau nei hoi te papairaa mo’a : Te mau taata atoa e faaroo iana ra, e ore ïa e vare. - O te Parau ïa a te Atua.

IRAVA I MUA I TE EVANELIA

Ta oe Parau, e te Fatu e, e Parau mau ia, e ta oe na ture e faaoraraa ia.
E ore te taata e ora i te faraoa anae ra, te mau parau atoa râ no ò mai i te vaha o te Atua.
Ta oe Parau, e te Fatu e, e Parau mau ia, e ta oe na ture e faaoraraa ia.

A taio tatou i te Evanelia a Luka peata (4, 1-13)

I teie tau ra, hoi maira Iesu, mai te pape mai ra, o Ioridania ; ua ï oia i te Varua-Maitai, ’e ua arataihia atura e te Varua-Maitai i roto i te medebara. ’E ua faahemahia oia e te diabolo e a maha a’era ahuru mahana. Aore roa oia i amu a’e i te māa i taua mai mahana ra ; ’e hope a’era, poia ihora oia. I reira to te diabolo parauraa mai iana e : « E Tamaiti oe na te Atua ra, a faaue atu oe i teie nei ofai ia riro ei faraoa. » Pahono atura Iesu : « Ua papaihia : E ore te taata e ora i te faraoa anae ra. » Aratai atura te diabolo iana i te hoe vahi teitei ’e ua faaite atura iana i te mau basileia atoa o te fenua nei, a parau mai ai e : « E horoa atu vau i teie mana ’e te hinuhinu hoi o teie mau basileia no oe ; ua pūpūhia mai hoi te reira ia’u, ’e e horoa vau no tā’u taata i hinaroo. No reira, ia haamori noa mai oe ia’u, na oe anae ïa teie mau mea toa ra. » Na ō atura Iesu iana : « Ua papaihia : E haamori oe i te Fatu, i tō Atua ’e o oia anae ra ta oe e tavini. » O to te diabolo ïa aratairaa ia Iesu i Ierusalema, tuu atura iana i nia i te vahi teitei roa a’e o te hiero, ’e ua na ō maira iana : « E Tamaiti oe na te Atua ra, a haamairi ia oe iho i raro. Ua papaihia hoi : E faaue oia i tana mau melahi e tiai ia oe. ’E ua papai-atoa-hia e : Na to ratou rima e mau ia oe, ’o te ti’a’ia noa atu tō avae i te ofai. » Ua pahono atura Iesu iana : « Ua papaihia e : Eiaha oe e ’a’a atu i te Fatu ra i tō Atua. » Hope a’era tāna mau faahemaraa atoa, ’ē atura te diabolo ia Iesu e tae roa atu i te tau i faataahia ra. - Haapopou tatou i te Parau a te Atua.