23e dimanche T.O.

DOMINIKA 23 NO TE TAU NOA

A taio tatou i te puta a te Paari (9, 13-18)

O vai hoi to rotopu i te taata nei te ite i te opuaraa a te Atua ? E o vai te tia ia ite i te hinaaro a te Atua ? E manao tai anoa hoi to te taata e pohe nei, e ta matou nei imiraa manao e mea papu ore ïa. E teimaha hoi te varua i te tino tahuti noa nei ; e teie nei fare repo te nenei nei ïa i te ââu i feruri i te mau mea e raverahi ra. E e ore hoi e ite area hia ia matou te mau mea o te fenua nei ; e ma te ohipa rahi e itea hia’i ia matou te mau mea i mua i to matou nei aro. Area te mau mea i nia i te rai ra, e itea ïa ia vai ia imi ? E e itea ia vai to oe na manao ia ore oe ia horoa mai i te paari, e ia tono mai i te Varua Maitai ra mai nia mai. E i reira ra e faatitiaifaro hia’i te haerea o ratou tei parahi i te ao nei, e e ite hoi te taata i te mau mea e au hia mai e oe ?    - O te Parau ïa a te Atua.

SALAMO 89 (90.),3-4, 5-6, 12-13, 14.17ab

Te faariro faahou nei oe i te taata nei ei repo,
te parau ra hoi oe : « A fariu mai, e te tamaiti a Adamu. »
Ia oe ra hoi hoe tauatini i te matahiti ra e au ïa i te mahana hoe,
i mahemo ra, e mai te araraa hoe i te ui ra.

Te hopoi è atu oe ia ratou mai te varea taoto i te poipoi,
te faariro nei oe ia ratou mai te aihere tei tupu ra ;
o tei oteu e tei tupu i te poipoi ra,
e ua ahiahi anae ra, ua maro e oriorio atura.

E haapii mai ia matou i te taio i to matou pue mahana,
ia riro to matou mafatu i te haapao maitai !
A fariu mai, e te Fatu e, a hea ra ïa ?
A aroha mai oe i to mau tavini nei.

I te poipoi ra, a faaî mai oe ia matou i to here,
ia oâoâ e ia rearea matou i to matou nei pue mahana toe.
Ia vai maite â te here o te Fatu i nia ia matou !
A haapapu oe i te ohipa a to matou nei mau rima.

A taio tatou i te epitore a Paulo peata ia Philomena (9b-10.12-17)

E ta’u tamaiti here ra, o Paulo teie e parau atu ia oe, o Paulo ruhiruhia nei, o tei riro a’enei ei taata tapehia no Iesu-Kirito. Te ani onoono atu nei au ia oe no ta’u tamaiti, tā’u i fanau i roto i te fare tapearaa nei, no Onesimo. Te faahoi atu nei au iana ra ia oe na, mai te mea ra e, o tō’u iho mafatu tā’u e tono atu. I hinaaro hoi au i te tapea iana i pihai iho ia’u nei, ia poihere mai oia ia’u, ei mono no oe, i roto i te tapearaa i tapeahia ai au no te Evanelia ? Aita rā vau i hinaaro i te rave i tei ore i ti’a ia oe, ia ore to oe hamani maitai ia riro ei mea faahepohia, ia tupu rā no to oe iho hinaaro. Penei a’e hoi, ua faataa-’ē-hia Onesimo ia oe i te hoe ma’a taime iti poto, ia faahoihia atu oia ia oe na e a muri noa atu. Eiaha rā mai te hoe tavini, mai te hoe rā e hau roa atu i te tavini, maori ra mai te hoe taeae here-rahi-hia. Ua riro mau ā oia ei taeae no’u, e aha atu ā ïa no oe i te hoiraa i te tino nei ’e i te hioraa hoi i te Fatu ra ? ’E tenā na, te parau na oe ia’u e taeae, e faarii ïa oe iana, mai te mea ra e, o vau iho. - O te Parau ïa a te Atua.

ALLELUIA (Ps 118, 135)

A faaanaana i to mata i nia i to tavini nei : e a haapii mai ia’u i ta oe na mau faaueraa.

A taio tatou i te Evanelia a Luka peata (14, 25-33)

I taua anotau ra, e tiaa rahi taata te haere atoa ra’e o Iesu i tōna haereraa. Ua fariu atura oia ia ratou, ’e ua parau atura : « Ia pee mai te tahi taata ia’u nei, ’e aore tōna here ia’u i hau a’e i te here i tana metua tane ’e tana metua vahine ’e tana mau tamari, i tana mau taeae ’e tana mau tuahine e tae noa atu hoi i te here i tōna iho ora, e ore e ti’a iana ia riro ei pipi na’u. O te ore e amo i tāna tatauro, a pee mai ai ia’u, e ore atoa ïa e ti’a iana ia riro ei pipi na’u. O vai hoi te taata io outou na, ia opua oia i te patu i te hoe pare, e ore e matāna i te parahi i raro, e numera i te haamāu’raa, e navai anei tāna moni ia faaoti-roa-hia te ohipa ? Ia haamau noa atu rā oia i te niu, ’e aita e ti’a iana faaoti roa, e ’ata ï ate feia atoa e hio mai, a parau ai e : “A hio na i teie taata, ua haamata oia i te faatia i te pare, ’e aita a’enei i oti iana !” ’E o vai te arii, ia haere oia e ’aro atu i te tahi arii, e ore e matāna i te parahi i raro, e hiopoa e, e ti’a anei iana ’e na taata hoe ahuru tauatini ia faaruru atu i te taata e haere mai iana ra ’e na taata e piti ahuru tauatini ? ’E aore anae i ti’a iana, a vai atea noa ai ā te tahi, e tono oia i te ve’a, e ani iana i te hau. Oia atoa hoi outou : o te ore e haapae i tāna atoa ra mau taoa, e ore atoa ïa e ti’a iana ia riro ei pipi na’u. » - Haapopou tatou i te Parau a te Atua.