26e dimanche T.O.

DOMINIKA 26 NO TE TAU NOA

A taio tatou i te puta Amosa peropheta (6, 1a.4-7)

Teie te parau a te Fatu o te mau nuu : Aue outou e, tei hia i Siona, e tei tiaturi i te moua o Samaria. O outou tei taoto i nia i te roi ivori, e ei tarava navenave i nia i to outou mau taotoraa ; o tei amu i te arenio o te nana, e i te mau kafa o te nana. O tei pehe ma te oto o te nabala ; te manao ra ratou e tauihaa himene te ratou mai ta Davida ra. O tei inu i te uaina na roto i te aua rahi, e tei tahinu hia i te monoi maitai roa, ma te mauiui ore te aau i te ati o Iosepha. No reira i teienei, e haere tîtî ratou i na mua i te feia e afai tîtî hia, e e hopoi è hia te tiaa o te feia navenave ia ratou iho. - O te Parau ïa a te Atua.

SALAMO 145,6c.7,8.9a-9bc-10

Na’na te parau tia e a muri noa’tu,
na’na e faatiama mai i tei hamani ino hia,
nana e horoa i te pane na tei poia,
e tatara te Fatu i tei taamu hia i te fifi.

e faaaraara te Fatu i te mata o tei matapo hia,
e faatia te Fatu i tei haapio hia i raro.
E au te Fatu i te taata parau tia.
E paruru te Fatu i te taata ee,

e tauturu oia i te otare e i te vahine ivi,
e taoi ra oia i te haerea a te feia paieti ore.
E vai Arii â te Fatu i te mau anotau atoa.
To Atua, e Siona e, e mai tera ui e tera ui.

A taio tatou i te epitore matamua a Paulo peata ia Timoteo (6, 11-16)

Area oe, e te taata o te Atua na, e ma’ue ’ē atu i taua mau mera ra. E titau atu i te parautia, i te paieti, i te faaroo, i te here, i te aho roa ’e te marū. E ’aro oe i te ’aroraa nehenehe no te faaroo, e haru i te ora mure ore i nominohia ai oe na, mai ta oe i fā’i i roto i te hoe fā’i ra’a faroo nehenehe i mua i te aro o na ite e rave rahi. Te faaue atu nei au ia oe, i mua i te aro o te Atua, o tei tuu i te ora i roto i te mau mea atoa nei, ’e i mua hoi i te aro o Iesu-Kirito, o tei riro ei ite i mua i te aro o Ponotio Pilato, na roto i te hoe fā’ira’a nehenehe : e tapea maite oe i te faaueraa ma te mafatu viivii ore ’e te hapa ore e tae noa atu i te fāraa mai o to tatou Fatu ra o Iesu-Kirito. O tei faaitehia mai, ia tae i tōna ra tau, e te Atua maitai, nona anae te mana, te arii o te mau arii, te Fatu o te mau fatu. Nona anae te pohe ore. Te parahi ra oia i roto i te maramarama taea-ore-hia, ’e ore roa hoi e taata i hio iana, ’e aore roa e taata e ti’a ia hio iana. Ei iana ra te hanahana ’e te mana mure ore. Amene. - O te Parau ïa a te Atua.

ALLELUIA (2 Kor 8, 9)

Inaha o Iesu Kirito, e e taoa rahi tāna, ia faataoahia outou i taua veve nona ra.

A taio tatou i te Evanelia a Luka peata (16, 19-31)

I taua anotau ra, ua parau atura oia Iesu teie parabole : « Te vai ra te hoe taata taoa rahi, e ahu ’ura ’e te lino maitai roa tāna e ahu, ’e e amuraa māa rahi nehenehe tāna, i te mau mahana atoa. ’E e parahi noa te hoe taata veve roa, o Lazaro te i’oa, i te uputa rahi o tōna fare. Ua ï roa tōna tino i te ’a’āi. E hiaai oia i te mau hu’a rii māa e mairi no nia mai i te amuraa māa a te taata taoa rahi. E haere mai te mau uri e mitimiti i tona mau ma’ima’i. E pohe ihora taua taata veve ra, hopoihia atura oia e te mau melahi i pihai iho ia Aberahama. Pohe atoa ihora te taata taoa rahi, ’e ua hunahia ihora. E mauiui rahi roa to te taata taoa i Hade ; nānā a’era tana mata i nia, ’e ite atura ia Aberahama i te atea ’ē ra ’e ia Lazaro hoi i pihai iho iana. Ua pii atura oia, naō atura : “E pā’ino, e Aberahama e, aroha mai oe ia’u, a tomo mai ia Lazaro e uhi i tana auru rima i roto i te pape, a faatoetoe mai ai i ta’u arero, ua ati roa hoi au i te mauiui rahi i roto i teie auahi ura. Ua parau maira Aberahama iana : E ta’u tamaiti, haamanao na oe i te mau maitai i noaa ia oe i tō oraraa rā ’e i te ati hoi o Lazaro. I teienei ra, ua noaa iana te tamahanahanaraa, ’e ua ati oe i te mauiui. E ere te reira anae, e ari rahi tei ropu ia tatou, ia ore to ō nei ia tae atu io outou na, ’e ia ore atoa hoi to ō na ia tae mai i ō nei, ia matou nei.” Ua parau atura te taata taoa : “Te ani haehaa atu nei ïa vau ia oe, ia tono oe ia Lazaro i te utuafare o tō’u metua tane. Toopae hoi ō’u pu’e taeae. Ia faaara oia ia ratou, ’o te tae atoa mai ratou i ō nei, i roto i teie nei vahi mauiui rahi. Ua parau maira Aberahama iana : “Tei ia ratou Mose ’e te mau peropheta, ia faaroo tō mau taeae ia ratou ! Ua na ō atura taua taata taoa ra : Eiaha, e pā’ino, e Aberahama e, ia haere atu rā te tahi taata, mai roto atu tei pohe ra, e tatarahapa ïa ratou. Ua parau maira Aberahama : “Ia ore ratou e faaroo ia Mose’e te mau peropheta ra, eita atoa ratou e faaroo, ti’a noa atu ā te hoe mai roto atu i tei pohe.”»                - Haapopou tatou i te Parau a te Atua.